Чудотворные и исцеляющие молитвы и иконы Святой Троицы, Спасителя, Божьей Матери, преподобных святых и угодников

Молитва

О преслáвный му́чениче и до́блий во́ине Небе́снаго Царя́, Пантеле́имоне всеблаже́нне, Ми́лостиваго Бо́га преизря́дный подражáтелю, и́же Христа́ на земли́ дерзнове́нно испове́дав, и многообра́зныя за Него́ му́ки претерпе́в, неувядае́мый при́ял еси́ вене́ц на небеси́, иде́же ве́чнаго наслаждае́шися блаже́нства, и со дерзнове́нием Престо́лу трисо́лнечнаго Божества́ предсто́иши! К твоему христоподражáтельному сострадáнию по Бо́зе прибегае́м вси мы гре́шнии, и всеусе́рдно мо́лим тя, те́плаго засту́пника и предстáтеля нáшего: не престáй призирáти на нас, су́щих в ну́ждах и ско́рбных обсто́яниих, и твое́ю моли́твенною по́мощию и цельбоподáтельною си́лою избавля́й нас при́сно от лю́тых зол, всегуби́тельства и вся́кия ины́я беды́ и боле́зни. Ты бо при́ял еси́, свя́те, неоску́дную благодáть исцеле́ний от Спа́са нáшего Иису́са Христа́ за тве́рдую тво́ю к Нему́ ве́ру, при чи́стом и непоро́чном жити́и запечатле́нную му́ченичеством и многопобе́дною твое́ю кончи́ною, в не́йже по дáнной ти благодáти и наимено́ван от Христа́ Пантеле́имоном, ми́лости тезоимени́тым, ми́лующим все́х притекающих к тебе́ в ско́рбех и боле́знех. Сего́ рáди, ве́дуще тя́ ми́лостиваго ко все́м помо́щника и цели́теля, с ве́рою взывае́м к тебе́: услы́ши нас, и богопри́ятным ходáтайством тво́им подавáй нам вся благопотре́бная в жити́и сем и ну́жная к ве́чному спасе́нию. Му́ченическим же дерзнове́нием тво́им умоли́ ми́лостиваго Бо́га, да поми́лует нас гре́шных и недосто́йных по вели́цей ми́лости Свое́й, да избáвит от тру́са, пото́па, огня́, меча́, и вся́каго прáведнаго гне́ва и преще́ния, благовре́менне подвизая́ нас к очисти́тельному и умилостиви́тельному во гресе́х нáших пока́янию, рáди мно́жества щедро́т Сво́их, да подáст все́м нам безбе́дное, ти́хое и богоуго́дное жити́е, правосла́вным же власте́м и во́инству нáшему на вся враги́ побе́ду и одоле́ние, и все́х нас от вра́г ви́димых и неви́димых да сохрани́т благодáтию Свое́ю и непобеди́мым ополче́нием А́нгел Сво́их, и́миже ограждае́ми и наставля́еми да поживе́м в ве́це сем в пока́янии, чистоте́ и в творе́нии богоуго́дных де́л: да сподо́бимся же тво́им те́плым предстáтельством христиáнскую кончи́ну улучи́ти безболе́зненну, ми́рну, непосты́дну, и избáвитися от ко́зней возду́шных князе́й тьмы́ и ве́чныя му́ки, и тáко бы́ти насле́дниками безконе́чнаго, всеблаже́ннаго Ца́рствия. Ей, уго́дниче Бо́жий! Не престáй моли́тися за ны гре́шныя, да тво́им ходáтайством вре́менных и ве́чных бед избáвлени, величае́м тебе́ засту́пника нáшего и моли́твенника, и ве́чно прославля́ем о́бщаго Влады́ку и Го́спода нáшего Иису́са Христа́, Ему́же подобае́т вся́кая слава, честь и поклоне́ние со Безначáльным Его́ Отце́м и Пресвяты́м Ду́хом, ны́не и при́сно, и во ве́ки веко́в. Ами́нь.