Иван III

Милостью Божьею и пречистые его Богоматери, и по благословению отца нашего Филиппа Митрополита всея Руси, и по нашей любви. На сем на всем, брате молодший князь Михайло Ондреевич, целуй ко мне крест к своему брату старейшему Великому князю Ивану Васильевичу: держати ти собе мене братом старейшим, и моего брата молодшого князя Юрья Васильевича держати ти собе братом же сиврейшим, а брата нашего князя Ондрея держати ти собе братом, и нашу меньшую братью князя Бориса и князя Ондрея держати ти собе братьею молодшою; а мне Великому князю держати ти собе братом молодшим. А мене ти Великого князя и мое Великое княженье держати честно и грозно, без обиды; а мне Великому князю и моему брату молодшему князю Юрью и князю Ондрею и меншой нашей братии тобе держати в братстве и в любви и во чти, без обиды. А хотети ти мне Великому князю, и моему брату молодшему князю Юрью и князю Ондрею, и меншой нашей братии добра везде и во всем и до живота; и быти ти со мною с Великим князем, и с моим братом молодшим с князем Юрьем и со князем Ондреем, и с меншою нашею братьею везде за один и до живота на всякого недруга, и твоим детем с моими детми; а мне Великому князю, и моему брату молодшему князю Юрью и князю Ондрею, и меншой нашей братии хотети добра тобе своему брату молодшему везде и во всем и до живота; и быти ми с тобою везде за один и до живота. А кто будет мне Великому князю, и моему брату молодшему князю Юрью и князю Ондрею, и меншой нашей братии друг, то и тобе друг; а кто будет мне Великому князю и моей братии молодшей недруг, то и тобе недруг. А не канчивати ти, не ссылатися ни с кем без моего веданья Великого князя; а мне Великому князю так же без тобя не канчивати, не ссылатися ни с кем. А с кем яз князь Великий буду в докончаньи, и мне и тобя с тем учинити в докончаньи; а с кем будешь ты в целованьи, и тобе к тому целованье сложити. А мне Великому князю тебя жаловати, и печаловатися тобою и твоею отчиною. А чем тобя благословил отец твой князь Ондрей Дмитриевич по душевной грамоте отца своего, деда твоего, а моего прадеда Великого князя Дмитрия Ивановича, в Москве, и Верею с волостьми и с отъезжими месты, и Белым Озером с волостьми, и что к нему потягло из старины по душевной грамоте отца твоего князя Ондрея Дмитриевича; и что промысл отца твоего и твой, и что себе примыслишь: того мне великому князю всего под тобой блюсти, ни обидети, ни вступатися, ни моему молодшему брату князю Юрью и князю Ондрею, и меншой нашой братии, ни моим детем под твоими детми. А жити ми с тобою в Москве по душевной грамоте деда твоего, а моего прадеда Великого князя Дмитрия Ивановича; а отчина ми твоя держати под тобою по душевной грамоте отца твоего князя Ондрея Дмитриевича, и блюсти и не обидети, ни вступатися, ни моему брату молодшому князю Юрью и князю Ондрею, и меншой нашей братии, ни моим детем под твоими детми. А чем мя благословил мой отец Великий князь Василий Васильевич в Москве, и Коломною с волостьми, и всем Великим княженьем, и что примысл отца моего Великого князя и мой, или что яз себе примыслил, или что даст Бог себе примыслю; и тобе подо мною Великого княженья не хотети, ни под моим сыном подо князем под Иваном, ни под моими детми, кого ми еще даст Бог; так же ти и под моею братьею молодшею под князем под Юрьем и подо князем под Ондреем и меншою братьей их уделов блюсти и не обидети, и не вступатися, ни твоим детем. А что тя был пожаловал отец мой князь Великии, да и яз княз Великии Вышегородом своею отчиною с волостьми и с путми и с селы, да Плеснью, опрочь Плесенского села и деревень того села, да Смоляными, да Сохною, да Зарадыльем, да Заремом, да Торусицкими бортники в отчину и в удел; и ты, мой брате, тое моее отчины отступися мне сам со всем тем, как тя был пожаловал отец мой князь Великии, да и яз князь Великии; и того ти, брате, подо мною всего блюсти, ни обидети, ни вступатися, ни под моим сыном под князем под Иваном, ни под моими детми, кого ми Бог даст, не подыскивати. А по грехом отоймет Бог мене Великого князя; и тобе под моими детми Великого княджения не хотети, ни твоим детем, и блюсти, ни обидети, ни вступатися; а отоймет бог тобе нашего брата молодшего; и мне Великому князю, и моему брату молодшему князю Юрью и князю Ондрею, и меншой нашей братии в твою отчину не вступатися, ни моим детем под твоими детми. А Орда знати и ведати мне Великому князю, а тобе Орды не знати; а имати ми у тебя выход по старым дефтерем, по крестному целованью; а коли яз князь Великии выхода в Орду не дам, и мне и тобя не взяти. А князей ти служебных с отчинами не принимати. А где мне Великому князю всести на конь самому, и тобе со мною пойти; а где ми тебя послати, и тобе пойти без ослушанья. А кто имеет жити твоих бояр и детей боярских и слуг в моей отчине в Великом княженье, и мне их блюсти как и своих; а кто имет жити моих бояр и детей боярских и слуг в твоей отчине, и тобе их блюсти как и своих. А кто которому князю служит, где бы ни жил, тому стем и ехати, которому служит; о городная осада, где кто живет, тому туто и сести, опрочь бояр введенных и путников. А бояром и детем боярским и слугам межи нас вольным воля. А сел ти в моей отчине в Великом княдженье не купити, ни закладней не держати; так же мне Великому князю в твоей отчине сел не купити, ни закладней не держати. А данному, положенному, холопу, робе от века суд; а татя, беглеца по исправе выдати; а заемному и поручному, и всему обидному межи нас суд без перевода; а судьям нашим третей волной. А на сем на всем, брате молодший князь Михайло Андреевич, целуй ко мне крест к своему брату старейшему Великому князю Ивану Васильевичу в правду, по любви, безо всякие хитрости.