Молитвы и каноны, чтомые по усопшим

Затем поем или читаем следующие стихи трижды без припева:

¹⁷⁵ Жива будет душа моя и восхвалит Тя, и судьбы Твоя помогут мне.¹⁷⁶ Заблудих, яко овча погибшее: взыщи раба Твоего, яко заповедей Твоих не забых.

Тропари, глас 5-й

Припев:Благословен еси, Господи, научи мя оправданием Твоим.

Святых лик обрете источник жизни, и дверь райскую, да обрящу и аз путь покаянием. Погибшее овча аз есмь, воззови мя, Спасе, и спаси мя.

Припев:Благословен еси, Господи, научи мя оправданием Твоим.

Агнца Божия проповедавше, и заклани бывше якоже агнцы, и к жизни нестареемей, святии, и присносущней преставльшеся, Того прилежно, мученицы, молите долгов разрешение нам даровати.

Припев:Благословен еси, Господи, научи мя оправданием Твоим.

В путь узкий хождшии прискорбный, вси в житий крест яко ярем вземшии, и Мне последовавший верою, приидите насладитеся, ихже уготовах вам почестей, и венцев небесных.

Припев:Благословен еси, Господи, научи мя оправданием Твоим.

Образ есмь неизреченныя Твоей славы, аще и язвы ношу прегрешений; ущедри Твое создание, Владыко, и очисти Твоим благоутробием, и вожделенное отечество подаждь ми, рая паки жителя мя сотворяя.

Припев:Благословен еси, Господи, научи мя оправданием Твоим.

Древле убо от не сущих создавый мя, и образом Твоим Божественным почтый, преступлением же заповеди паки мя возвративши в землю, от неяже взят бых, на еже по подобию возведи, древнею добротою возобразитися.

Припев:Благословен еси, Господи, научи мя оправданием Твоим.

Упокой, Боже, раба Твоего (рабу Твою, рабы Твоя) и учини его (ю, я) в рай, идеже лицы святых, Господи, и праведницы сияют яко светила; усопшаго раба Твоего (усопшую рабу Твою, усопшия рабы Твоя) упокой, презирая его (ей, их) вся согрешения.

Слава: Трисиятельное Единаго Божества благочестно поем, вопиюще: Свят еси, Отче безначальный, собезначальный Сыне, и Божественный Душе, просвети нас верою Тебе служащих, и вечнаго огня исхити.

И ныне: Богородицей:

Радуися, Чистая, Бога плотню рождшая во спасение всех, Еюже род человеческий обрете спасение, Тобою да обрящем рай, Богородице чистая благословенная.

Аллилуия, аллилуия, аллилуия, слава Тебе, Боже. (Трижды)

Господи, помилуй. (40 раз)

Помяни, Господи Боже наш, в вере и надежди живота вечнаго усопшаго раба Твоего (усопшую рабу Твою, усопшия рабы Твоя) (имя), и яко Благ и Человеколюбец, отпущаяй грехи и потребляли неправды, ослаби, остави и прости вся вольная его (ея, их) согрешения и невольная, возставляя его (ю, их) во святое второе пришествие Твое в причастие вечных Твоих благ, ихже ради в Тя Единаго верова, истиннаго Бога и Человеколюбца, яко Ты еси воскресение и живот, и покой рабу Твоему (рабе Твоея, рабом Твоим) (имя), Христе Боже наш, и Тебе славу возсылаем, со безначальным Твоим Отцем, и с Пресвятым Духом, ныне и присно и во веки веков, аминь.

Седален, глас 5-й

Покой, Спасе наш, с праведными раба Твоего (рабу Твою, рабы Твоя), и сего (сию, сия) всели во дворы Твоя, якоже есть писано, презирая, яко Благ, прегрешения его (ея, их), вольная и невольная, и вся яже в ведении, и не в ведении, Человеколюбче.

Слава Отцу и Сыну и Святому Духу, и ныне, и присно, и во веки веков. Аминь.

Богородичен: От Девы возсиявый миру, Христе Боже, сыны света Тою показавый, помилуй нас.

Псалом 50