Новый Завет (на цсл., гражданский шрифт, с ударениями)

²⁰ Си́це же потща́хся благовести́ти, не иде́же именова́ся Христо́с, да не на чуже́м основа́нии сози́жду,

²¹ Но я́коже есть пи́сано: и́мже не возвести́ся о Нем, у́зрят, и и́же не слы́шаша, уразуме́ют.

²² Те́мже и возбране́н бых мно́гажды приити́ к вам.

²³ Ны́не же ктому́ ме́ста не имы́й в страна́х сих, жела́ние же имы́й приити́ к вам от мно́гих лет,

²⁴ Я́ко а́ще поиду́ во Испа́нию, прииду́ к вам. Упова́ю бо ми́мо гряды́й ви́дети вас и ва́ми проводи́тися та́мо, а́ще вас пре́жде от ча́сти насы́щуся.

²⁵ Ны́не же гряду́ во Иерусали́м, служя́й святы́м.

²⁶ Благоволи́ша бо Македо́ниа и Аха́иа обще́ние не́кое сотвори́ти к ни́щим святы́м живу́щим во Иерусали́ме.

²⁷ Благоволи́ша бо, и до́лжни им суть. А́ще бо в духо́вных их прича́стники бы́ша язы́цы, до́лжни суть и в плотски́х послужи́ти им.

²⁸ Сие́ у́бо сконча́в, и запечатле́в им плод сей, поиду́ ва́ми во Испа́нию.

²⁹ Вем же, я́ко гряды́й к вам, во исполне́нии благослове́ния благове́стия Христо́ва прииду́.

³⁰ Молю́ же вы, бра́тие, Го́сподем на́шим Иису́с Христо́м и любо́вию Ду́ха, споспе́шствуйте ми в моли́твах о мне к Бо́гу,

³¹ Да изба́влюся от противля́ющихся во Иуде́и, и да слу́жба моя́, я́же во Иерусали́ме, благоприя́тна бу́дет святы́м.

³² Да с ра́достию прииду́ к вам во́лею Бо́жиею и упоко́юся с ва́ми.

³³ Бог же ми́ра со все́ми ва́ми. Ами́нь.

Глава 16

¹ Вруча́ю же вам Фи́ву, сестру́ на́шу, су́щу служи́тельницу це́ркве, я́же в Кегхре́ех.

² Да прии́мете ю́ о Го́споде досто́йне святы́м, и споспе́шствуйте ей, о не́йже а́ще от вас потре́бует ве́щи, и́бо сия́ засту́пница мно́гим бысть, и самому́ мне.

³ Целу́йте Приски́ллу и Аки́лу, споспе́шника моя́ о Христе́ Иису́се,

⁴ И́же по души́ мое́й своя́ вы́я положи́ша, и́хже не аз еди́н благодарю́, но и вся це́ркви язы́ческия, и дома́шнюю их це́рковь.

⁵ Целу́йте Епене́та возлю́бленнаго ми, и́же есть нача́ток Аха́ии во Христа́.

⁶

Целу́йте Мариа́мь, я́же мно́го труди́ся о нас.

⁷ Целу́йте Андрони́ка и Иуни́ю, сро́дники моя́ и спле́нники моя́, и́же суть наро́читы во Апо́столех, и́же и пре́жде мене́ ве́роваша во Христа́.

⁸ Целу́йте Ампли́а возлю́бленнаго ми о Го́споде.

⁹ Целу́йте Урва́на споспе́шника на́шего о Христе́, и Стахи́а возлю́бленнаго ми.

¹⁰ Целу́йте Апе́ллиа иску́сна о Христе́. Целу́йте су́щия от Аристову́ла.

¹¹ Целу́йте Иродио́на сро́дника моего́. Целу́йте и́же от Нарки́сса су́щия о Го́споде.

¹² Целу́йте Трифе́ну и Трифо́су тружда́ющияся о Го́споде. Целу́йте Перси́ду возлю́бленную, я́же мно́го труди́ся о Го́споде.

¹³ Целу́йте Ру́фа избра́ннаго о Го́споде, и ма́терь его́ и мою́.

¹⁴ Целу́йте Асигкри́та, Фле́гонта, Е́рма, Патро́ва, Ерми́а, и су́щую с ни́ми бра́тию.

¹⁵ Целу́йте Филоло́га и Иули́ю, Нире́а и сестру́ его́, и Олимпа́на, и су́щия с ни́ми вся святы́я.

¹⁶ Целу́йте друг дру́га лобза́нием святы́м. Целу́ют вы вся це́ркви Христо́вы.

¹⁷ Молю́ же вы, бра́тие, блюди́теся от творя́щих ра́спри и раздо́ры, кроме́ уче́ния, ему́же вы научи́стеся, и уклони́теся от них.

¹⁸ Такови́и бо Го́сподеви на́шему Иису́су Христу́ не рабо́тают, но своему́ чре́ву: и́же благи́ми словесы́ и благослове́нием прельща́ют сердца́ незло́бивых.

¹⁹ Ва́ше бо послуша́ние ко всем дости́же. Ра́дуюся же е́же о вас. Хощу́ же вас му́дрым у́бо бы́ти во благо́е, просты́м же в зло́е.

²⁰ Бог же ми́ра да сокруши́т сатану́ под но́ги ва́ша вско́ре. Благода́ть Го́спода на́шего Иису́са Христа́ с ва́ми. Ами́нь.

²¹ Целу́ет вас Тимофе́й споспе́шник мой, и Луки́й и Иа́сон и Сосипа́тр, сро́дницы мои́.

²² Целу́ю вы и аз, Те́ртий, написа́вый посла́ние сие́, о Го́споде. Целу́ет вы Га́ие странноприи́мец мой и це́ркве всея́.

²³ Целу́ет вы Ера́ст строи́тель гра́дский, и Куа́рт брат.

²⁴ Благода́ть Го́спода на́шего Иису́са Христа́ со все́ми ва́ми. Ами́нь.

Пе́рвое посла́ние к Кори́нфянам

Глава 1

¹

Па́вел, зван Апо́стол Иису́с Христо́в во́лею Бо́жиею, и Сосфе́н брат,

² Це́ркви Бо́жией су́щей в Кори́нфе, освяще́нным о Христе́ Иису́се зва́нным святы́м, со все́ми призыва́ющими и́мя Го́спода на́шего Иису́са Христа́, во вся́ком ме́сте, тех же и на́шем.

³ Благода́ть вам и мир от Бо́га Отца́ на́шего и Го́спода Иису́са Христа́.

⁴ Благодарю́ Бо́га моего́ всегда́ о вас, о благода́ти Бо́жией да́нней вам о Христе́ Иису́се,

⁵ Я́ко во всем обогати́стеся о Нем, во вся́ком сло́ве и вся́ком ра́зуме,

⁶ Я́коже свиде́тельство Христо́во извести́ся в вас,

⁷ Я́ко вам не лиши́тися ни во еди́ном дарова́нии, ча́ющим открове́ния Го́спода на́шего Иису́са Христа́,

⁸ И́же и утверди́т вас да́же до конца́ непови́нны в день Го́спода на́шего Иису́са Христа́.

⁹ Ве́рен Бог, И́мже зва́ни бы́сте во обще́ние Сы́на Его́ Иису́са Христа́, Го́спода на́шего.

¹⁰ Молю́ же вы, братие, и́менем Го́спода на́шего Иису́са Христа́, да то́жде глаго́лете вси, и да не суть в вас ра́спри, да есте́ же утвержде́ни в то́мже разуме́нии и в то́йже мы́сли.

¹¹ Возвести́ся бо ми о вас, бра́тие моя́, по́сланным от Хло́иса, [214] я́ко рве́ния в вас суть.

¹² Глаго́лю же се я́ко ко́йждо вас глаго́лет: аз у́бо есмь Па́влов, аз же Аполло́сов, аз же Ки́фин, аз же Христо́в.