Новый Завет (на цсл., гражданский шрифт, с ударениями)

⁴⁰ И возвра́щься обре́те я́ па́ки спя́щя, [бя́ху бо очеса́ им тя́готна,] и не ве́дяху, что бы́ша Ему́ отвеща́ли.

⁴¹ И прии́де трети́цею и глаго́ла им: спи́те про́чее и почива́йте, приспе́ коне́ц, прии́де час, се предае́тся Сын Челове́ческий в ру́ки гре́шником.

⁴² Воста́ните, и́дем, се предая́й Мя прибли́жися.

⁴³ И а́бие еще́ Ему́ глаго́лющу, прии́де Иу́да, еди́н сый от обоюна́десяте, и с ним наро́д мног со ору́жием и дреко́льми, от архиере́й и кни́жник и ста́рец.

⁴⁴ Даде́ же предая́й Его́ зна́мение им, глаго́ля: Его́же а́ще лобжу́, Той есть, ими́те Его́ и веди́те Его́ сохра́нно.

⁴⁵ И прише́д, а́бие присту́пль к Нему́, глаго́ла Ему́: Равви́, Равви́. И облобыза́ Его́.

⁴⁶ Они́ же возложи́ша ру́це свои́ на него́ и я́ша Его́.

⁴⁷ Еди́н же не́кто от стоя́щих извле́к нож, уда́ри раба́ архиере́ова и уре́за ему́ у́хо.

⁴⁸ И отвеща́в Иису́с рече́ им: я́ко на разбо́йника ли изыдо́сте со ору́жием и дреко́льми я́ти Мя?

⁴⁹ По вся дни бех при вас в це́ркви учя́, и не я́сте Мене́, но да сбу́дется Писа́ние.

⁵⁰

И оста́вльше Его́, вси бежа́ша.

⁵¹ И еди́н не́кто ю́ноша и́де по Нем, оде́ян в плащани́цу по на́гу, и я́ша того́ ю́ношу. [75]

⁵² Он же оста́вль плащани́цу, наг бежа́ от них.

⁵³ И ведо́ша Иису́са ко архиере́ю, и снидо́шася к нему́ вси архиере́е и кни́жницы и ста́рцы.

⁵⁴ И Петр издале́ча вслед Его́ и́де до внутрь во двор архиере́ов, и бе седя́ со слуга́ми и гре́яся при свещи́.

⁵⁵ Архиере́е же и весь сонм иска́ху на Иису́са свиде́тельства, да умертвя́т Его́, и не обрета́ху.

⁵⁶ Мно́зи бо лжесвиде́тельствоваху на Него́, и ра́вна свиде́тельства не бя́ху.

⁵⁷ И не́цыи воста́вше лжесвиде́тельствоваху на Него́, глаго́люще:

⁵⁸ Я́ко мы слы́шахом Его́ глаго́люща, я́ко Аз разорю́ це́рковь сию́ рукотворе́ную и треми́ де́ньми и́ну нерукотворе́ну сози́жду.

⁵⁹ И ни та́ко ра́вно бе свиде́тельство их.

⁶⁰

И воста́в архиере́й посреде́, вопроси́ Иису́са, глаго́ля: не отвещава́еши ли ничесо́же? Что си́и на Тя свиде́тельствуют?

⁶¹ Он же молча́ше и ничто́же отвещава́ше. Па́ки архиере́й вопроси́ Его́ и глаго́ла Ему́: Ты ли еси́ Христо́с, Сын Благослове́ннаго?

⁶² Иису́с же рече́: Аз есмь, и у́зрите Сы́на Челове́ческаго одесну́ю седя́ща си́лы и гряду́ща со о́блаки небе́сными.

⁶³ Архиере́й же растерза́в ри́зы своя́, глаго́ла: что еще́ тре́буем свиде́телей?

⁶⁴ Слы́шасте хулу́, что вам мни́тся? Они́ же вси осуди́ша Его́ бы́ти пови́нна сме́рти.

⁶⁵ И нача́ша не́цыи плюва́ти Нань, и прикрыва́ти лице́ Его́, и му́чити Его́, и глаго́лати Ему́: прорцы́. И слуги́ по лани́тома Его́ бия́ху.

⁶⁶ И су́щу Петро́ви во дворе́ ни́зу, прии́де еди́на от рабы́нь архиере́овых,

⁶⁷ И ви́девши Петра́ гре́ющася, воззре́вши на него́, глаго́ла: и ты с Назаряни́ном Иису́сом был еси́.

⁶⁸ Он же отве́ржеся, глаго́ля: не вем, ниже́ зна́ю, что ты глаго́леши. И изы́де вон на преддво́рие, и але́ктор возгласи́.

⁶⁹ И рабы́ня ви́девши его́ па́ки, нача́т глаго́лати предстоя́щим, я́ко сей от них есть.

⁷⁰ Он же па́ки отмета́шеся. И пома́ле па́ки предстоя́щии глаго́лаху Петро́ви: вои́стинну от них еси́, и́бо Галиле́анин еси́, и бесе́да твоя́ подо́бится.

⁷¹

Он же нача́ роти́тися и кля́тися, я́ко не вем Челове́ка Сего́, Его́же вы глаго́лете.

⁷² И второ́е але́ктор возгласи́. И помяну́ Петр глаго́л, его́же рече́ ему́ Иису́с, я́ко пре́жде да́же пе́тель не возгласи́т двакра́ты, отве́ржешися Мене́ трикра́ты. И наче́н пла́кашеся.

Глава 15

¹ И а́бие нау́трия сове́т сотвори́ша архиере́е со ста́рцы и кни́жники, и весь сонм, связа́вше Иису́са ведо́ша и преда́ша Его́ Пила́ту.

² И вопроси́ Его́ Пила́т: Ты ли еси́ Царь Иуде́йский? Он же отвеща́в рече́ ему́: ты глаго́леши.

³ И глаго́лаху на Него́ архиере́е мно́го.

⁴ Пила́т же па́ки вопроси́ Его́, глаго́ля: не отвещава́еши ли ничто́же? Виждь, коли́ко на Тя свиде́тельствуют.

⁵ Иису́с же ктому́ ничто́же отвеща́, я́ко диви́тися Пила́ту.

⁶ На всяк же пра́здник отпуща́ше им еди́наго свя́зня, его́же проша́ху.

⁷ Бе́ же нарица́емый Вара́вва с ко́вники свои́ми свя́зан, и́же в ко́ве уби́йство сотвори́ша.

⁸ И возопи́в наро́д нача́ проси́ти, я́коже всегда́ творя́ше им.

⁹

Пила́т же отвеща́ им, глаго́ля: хо́щете ли, пущу́ вам Царя́ Иуде́йска?

¹⁰ Ве́дяше бо, я́ко за́висти ра́ди преда́ша Его́ архиере́е.

¹¹ Архиере́е же поману́ша наро́ду, да па́че Вара́вву пу́стит им.

¹² Пила́т же отвеща́в па́ки рече́ им: что у́бо хо́щете сотворю́, Его́же глаго́лете Царя́ Иуде́йска?

¹³ Они́ же па́ки возопи́ша глаго́люще: пропни́ Его́.

¹⁴ Пила́т же глаго́лаше им: что бо зло сотвори́? Они́ же и́злиха вопия́ху: пропни́ Его́.

¹⁵ Пила́т же хотя́ наро́ду хоте́ние сотвори́ти, пусти́ им Вара́вву, и предаде́ Иису́са, бив, да про́пнут Его́.

¹⁶ Во́ини же ведо́ша Его́ внутрь двора́, е́же есть прето́р, и созва́ша всю спи́ру,

¹⁷ И облеко́ша Его́ в препря́ду, и возложи́ша на Него́ спле́тше терно́в вене́ц,

¹⁸ И нача́ша целова́ти Его́ и глаго́лати: ра́дуйся, Царю́ Иуде́йский.

¹⁹ И бия́ху Его́ по главе́ тро́стию, и плюва́ху на Него́, и прегиба́юще коле́на покланя́хуся Ему́.

²⁰ И егда́ поруга́шася Ему́, совлеко́ша с Него́ препря́ду и облеко́ша Его́ в ри́зы Своя́, и изведо́ша Его́, да про́пнут Его́.