Полный Тропарион. Том II

Тропарь преподобным Марку, Ионе, Корнилию и Вассе Псково-Печерским, глас 4

Пусты́нническаго жития́ нача́льницы,/ оби́тели Богома́терния устрои́телие,/ преподо́бнии отцы́ Ма́рко, Ио́но и Корни́лие,/ и сподви́жница сла́вная Ва́ссо,/ во святе́й горе́ у пото́ка Каменца подвиза́вшиеся,/ и та́мо во глуби́нах недр земли́ храм ископа́вшии;/ последи́же и́ноки ту собра́вшеся,/ доброде́тельми сия́юще, оби́тель украша́ху./ Ны́не же в Небе́снех Черто́зех лику́ете,/ моля́щеся ко Го́споду приле́жно,/ во е́же спасти́ся нам.

Ин тропарь, глас 8

Яко свети́льницы, яви́стеся всесве́тлии/ в верте́пе Цари́цы Богома́тери,/ преподо́бнии отцы́ на́ши Ма́рко, Ио́но и Корни́лие,/ вы бо, крест Христо́в на ра́мо взе́мше,/ усе́рдно Тому́ после́довасте/ и, чистото́ю Бо́гови приближи́вшеся,/ отону́дуже си́лами чуде́с обога́тистеся./ Тем и мы любе́зно прибега́ем к вам и уми́льно глаго́лем:/ о преподо́бнии, моли́те Христа́ Бо́га/ спасти́ся душа́м на́шим.

Кондак, глас 8

Днесь ве́рнии лико́вствуют,/ па́мять преподо́бных Пско́во-Пече́рских соверша́юще./ Днесь бо в черто́зех Царя́ сла́вы мо́лятся,/ помина́юще на́ши не́мощи и печа́ли,/ непреста́нно про́сят дарова́ть нам мир/ и ве́лию ми́лость.

Ин кондак, глас 2

Христо́вою любо́вию уязви́вшеся,/ преподо́бнии, и Того́ крест на ра́мо взе́мше,/ понесли́ есте́ Боже́ственне, вооружи́вшеся на неви́димыя враги́/ и непреста́нныя моли́твы, я́ко копие́, в рука́х иму́ще кре́пко,/ победи́ли есте́ бесо́вская ополче́ния,/ тем зове́м вам:/ ра́дуйтеся, преподо́бнии отцы́ на́ши Ма́рко, Ио́но и Корни́лие,/ ве́рных удобре́ние.

Величание

Ублажа́ем вас,/ преподо́бнии отцы́ Ма́рко, Ио́но и Корни́лие, со Ва́ссою сла́вною,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

30/12 Преподобного Иоанна Лествичника (649). Святителя Софрония, епископа Иркутского (1771). Сретение Пресвятой Владычицы нашей Богородицы и Приснодевы Марии и св. праведной Елисаветы, матери св. Иоанна Предтечи. Святой Еввулы, матери великомученика Пантелеимона (ок. 303).

Тропарь преподобному Иоанну Лествичнику, глас 1

Пусты́нный жи́тель и в телеси́ а́нгел и чудотво́рец яви́лся еси́, богоно́се о́тче наш Иоа́нне;/ посто́м, бде́нием, моли́твою Небе́сная дарова́ния прии́м,/ исцеля́вши неду́жныя и ду́ши ве́рою притека́ющих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин тропарь, глас 8

Слез твои́х тече́ньми, пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Иоа́нне о́тче наш,/ моли́ Христа́ Бо́га спасти́ся душа́м на́шим.

Ин тропарь, глас 4

Я́ко Боже́ственную ле́ствицу, обрето́хом, Иоа́нне преподо́бне,/ твоя́ Боже́ственныя доброде́тели,/ к Небеси́ возводя́щая ны:/ доброде́телей бо ты был еси́ воображе́ние./ Тем моли́ Христа́ Бо́га, да спасе́т ду́ши на́ша.

Кондак, глас 1

Плоды́ присноцвету́щия/ от твоея́ кни́ги принося́ уче́ния, прему́дре,/ услажда́вши сердца́, сим с трезве́нием вне́млющих, блаже́нне,/ ле́ствица бо есть, ду́ши возводя́щая от земли́ к Небе́сней и пребыва́ющей сла́ве,/ ве́рою чту́щих тя.

Ин кондак, глас 4

На высоте́ Госпо́дь воздержа́ния и́стинна тя положи́,/ я́коже звезду́ неле́стную, световодя́щую концы́,/ наста́вниче Иоа́нне о́тче наш.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Софронию, епископу Иркутскому, глас 4

От ю́ности Христа́ возлюби́л еси́, блаже́нне Софро́ние,/ до́бре упра́вил еси́ и́ноческия оби́тели/ и, архиере́йства са́ном почте́н быв,/ упа́сл еси́ Ирку́тскую па́ству,/ те́мже и по преставле́нии дарова́ния чуде́с от Бо́га прия́л еси́/ и мо́лиши Христа́ Бо́га/ изба́вити нас от бед и спасти́ ду́ши на́ша.

Ин тропарь, глас 1

Ско́рый в беда́х и ско́рбех засту́пниче,/ о́тче иера́рше, страны́ Сиби́рския,/ святи́телю Софро́ние,/ на Небеси́ предстоя́й с первоиера́рхом Ирку́тския Це́ркви и все́ми святы́ми,/ вы́ну и́маши благоволе́ние Го́спода сла́вы;/ при́зри на лю́ди, притека́ющия к честны́м оста́нкам святы́х моще́й твои́х,/ с ве́рою и любо́вию сле́зно прося́щия твоея́ по́мощи и заступле́ния,/ моли́, Его́же пропове́дал еси́ лю́дем Сиби́ри,/ изба́вити я от находя́щих зол и наве́тов вра́жиих,/ просвети́ти лю́дие олядене́вшая* дре́вле неве́рием сердца́,/ дарова́ти утвержде́ние ве́ры Христо́вы/ и спасти́ ду́ши на́ша.

Кондак, глас 3

Па́стырей Нача́льнику, Христу́,/ труди́лся еси́, святи́телю Софро́ние,/ на па́жити духо́вней се́верныя страны́ на́шея,/ язы́цы монго́льстии от пре́лести и скве́рны и́дольския избавля́я,/ приве́л еси́ я к све́ту ве́ры Христо́вы,/ и ны́не со а́нгелы Влады́чню престо́лу предстоя́,/ моли́ непреста́нно о всех нас,/ изба́вити ны от бед и спасти́ ду́ши на́ша.

Ин кондак, глас 4