Полный Тропарион. Том II

Апо́стольским преда́нием, и́стинней ве́ре пропове́дницы,/ и от тьмы к све́ту Богоразу́мия челове́ком наста́вницы,/ и за ны к Бо́гу моле́бницы,/ на Небе́сная любо́вь возложи́сте к Лю́бящему вы./ И ны́не на Небеси́ со а́нгелы и со все́ми святы́ми ликовству́юще/ у Престо́ла сла́вы всех Царя́, Христа́ Бо́га на́шего,/ святи́и чудотво́рцы Лео́нтие, и Иса́ие, и Игна́тие,/ моли́те дарова́ти стране́ на́шей мир,/ на враги́ одоле́ние,/ Це́ркви единомы́слие/ и душа́м на́шим ве́лию ми́лость.

Кондак, глас 8

Я́ко во вселе́нней трие́ вели́цыи святи́телие,/ бы́сте вы благоче́стием и доброде́телию наста́вницы Росто́ву/ и, благове́рием прии́мше па́ству, ста́до Христо́во упасо́сте/ и ве́чный поко́й насле́довасте./ Мо́лим вас, святи́и чудотво́рцы,/ пода́ти доброде́телем исправле́ние,/ и боле́знем на́шим исцеле́ние, и собла́зном избавле́ние,/ и душа́м спасе́ние, да зове́м вам:/ ра́дуйтеся, гра́ду на́шему Росто́ву похвала́ и утвержде́ние.

Величание

Велича́ем вас,/ вси святи́и земли́ Росто́вския и Яросла́вския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобной Евфросинии, игумении Полоцкой, глас 4

Подража́ющи дванадесятоле́тна дванадесятоле́тну Христу́,/ учи́вшему во святи́лищи, Бо́жию сло́ву/ после́довала еси́, Евфроси́ние,/ сла́ву вре́менную и земна́го обру́чника оста́вльши,/ и вся мирска́я презре́вши,/ красне́йшему па́че всех Христу́ себе́ уневе́стила еси́,/ крест взе́мши, путе́м а́нгельскаго жития́ ше́ствующи,/ и мно́гия к Нему́ наставля́ющи,/ во благоуха́нии ми́ра в Небе́сный черто́г востекла́ еси́,/ иде́же моли́, Его́же возлюби́ла еси́,/ о чту́щих благоче́стно па́мять твою́.

Ин тропарь, глас тойже

Бога́тство свое́ ни́щим расточи́вши,/ и сла́ву кня́жескую нивочто́же вмени́вше,/ обру́чника вре́меннаго, кра́сная де́во, возгнуша́лася еси́/ и, уневе́стившися Жениху́ Христу́,/ Тому́, я́коже ве́но*, чистоту́ душе́вную и теле́сную принесла́ еси́, Евфроси́ние,/ Ему́же ны́не в весе́лии предстоя́,/ помина́й нас, чту́щих па́мять твою́.

Кондак, глас 8

Избра́нней Бо́гом от самаго́ рожде́ния,/ и призва́нней на служе́ние Ему́,/ в чи́не а́нгельстем Го́сподеви послужи́вшей свя́то,/ и преподо́бно пожи́вшей,/ и ны́не с небе́сными си́лами Го́спода восхваля́ющей,/ о нас же гре́шных пред Го́сподем хода́тайствующей,/ с ра́достию и любо́вию воззове́м:/ ра́дуйся, Евфроси́ние, неве́сто Христо́ва всечестна́я.

Ин кондак, глас тойже

Чи́стое свое́ де́вство и честно́е/ ми́лостынею, я́ко свети́льник елее́м, украси́вшую,/ с му́дрыми де́вами в пресве́тлый черто́г Христо́в вше́дшую,/ Евфроси́нию сла́вную ублажи́м,/ и, припа́дше к честны́м ея́ мощем, наслади́мся ея́ благоуха́ния/ и уми́льне к ней возопии́м:/ я́ко име́я дерзнове́ние ко Христу́ Бо́гу,/ моли́ изба́витися злово́ния страсте́й и спасти́ся душа́м на́шим.

Ин кондак, глас 4

Превита́вши* от земли́ По́лотския,/ оте́чество свое́, я́ко Авраа́м, насле́довавши, Евфроси́ние,/ зе́млю высо́ку сообра́зну Го́рний Сио́н,/ те́мже те́ло твое́ душе́вным благому́жествием, страда́нием по́стным,/ я́ко же́ртву, приноси́ла еси́/ милосе́рдием Свои́м, Да́вшему Себе́ за челове́ки Же́ртву благоприя́тну.

Величание

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Паисию Галичскому, глас 8

Днесь возсия́ нам па́мять твоя́, сла́вне Паи́сие,/ я́ко со́лнце светоза́рное, луча́ми озаря́ющи весь мир,/ та́ко и ты, преподо́бне,/ чудесы́ свои́ми тьму но́щи злых ду́хов от нас отгоня́я./ Днесь Небе́сныя си́лы, и святы́х а́нгел,/ и ду́ши пра́ведных мы́сленно торжеству́ют, ра́дующеся./ Днесь и мы, гре́шнии, припа́дающе честно́му твоему́ о́бразу, мо́лимся:/ о преподо́бне Паи́сие,/ Христа́ Бо́га моли́ непреста́нно/ спасти́ град и лю́ди, и́же тебе́ почита́ющия.

Кондак, глас 3

Возсия́, Го́споди, гра́ду Твоему́ Га́личу,/ я́ко светоза́рное со́лнце, уго́дник Твой Паи́сий,/ ра́достно вселе́нную озаря́я свои́ми чудесы́,/ и приходя́щих с ве́рою ко гро́бу его́ свято́му./ Та́ко моли́твами Пречи́стыя Богородицы от бед всех нас изба́ви,/ и упраздни́ ва́рварская шата́ния,/ я́ко мы, лю́ди Твои́, Го́споди,/ и град наш и страна́ вельми́* Тобо́ю хва́лится,/ и спаса́ется моли́твами преподо́бнаго Паи́сия.

Величание

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

24/6 Преподобного Симеона столпника на Дивной горе (596). Преподобного Никиты столпника, Переславльского, чудотворца (1186).

Тропарь преподобному Симеону столпнику, Дивногорцу, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Симео́не,/ посто́м, бде́нием, моли́твою небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас 2