Полный Тропарион. Том II

Я́ко врача́ всеизря́дна и моли́твенника благоприя́тна,/ к ра́це твое́й Боже́ственней притека́юще, Сампсо́не Богому́дре преподо́бне,/ соше́дшеся любо́вию, псалмы́ и пе́сньми ра́дующеся, Христа́ прославля́ем,/ такову́ю тебе́ благода́ть подава́юща исцеле́ний.

Величание

Ублажа́ем тя,/ преподо́бне о́тче Сампсо́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Господу Богу ради праздника победы, дарованной русским войскам над шведами, под Полтавою, глас 8

Препросла́влен еси́, Го́споди Бо́же наш,/ дарова́вый кре́пость на враги́ оте́честву на́шему,/ я́коже Дави́ду на прего́рдаго Голиа́фа,/ осени́л еси́ над главо́ю его́ в день бра́ни,/ препоя́сал еси́ немощны́я си́лою свы́ше,/ и теми́ всю де́рзость вра́жию низложи́л еси́,/ Многоми́лостиве, сла́ва Тебе́.

Кондак, глас 2

В Вы́шних живы́й и на смире́нныя призира́яй,/ И́же не дал еси́ ве́прю*, от дубра́вы озоба́ти*,/ и уедине́нному ди́вому поя́сти виногра́да Твоего́,/ утверди́, Бо́же, е́же соде́лал еси́ в нас,/ при́зри с Небесе́ и ви́ждь, и посети́ виногра́д сей, и соверши́ его́,/ его́же насади́ десни́ца Твоя́.

Величание

Велича́ем Тя,/ Триипоста́сный Бо́же,/ вознесе́нную го́рдость смири́вшаго/ и на Тя упова́ющим/ побе́ду дарова́вшаго.

Тропарь преподобному Амвросию Оптинскому, глас 5

Я́ко к целе́бному исто́чнику/ притека́ем к тебе́, Амвро́сие, о́тче наш,/ ты бо на путь спасе́ния нас ве́рно наставля́еши,/ моли́твами от бед и напа́стей охраня́еши,/ в теле́сных и душе́вных ско́рбех утеша́еши,/ па́че же смире́нию, терпе́нию и любо́ви науча́вши,/ моли́ Человеколю́бца Христа́/ и Засту́пницу усе́рдную/ спасти́ся душа́м на́шим.

Кондак, глас 2

Заве́т Пастыренача́льника испо́лнив,/ ста́рчества благода́ть насле́довал еси́,/ боле́знуя се́рдцем о всех с ве́рою притека́ющих к тебе́,/ те́мже и мы, ча́да твоя́, с любо́вию вопие́м ти:/ о́тче святы́й Амвро́сие,/ моли́ Христа́ Бо́га спасти́ся душа́м на́шим.

Величание

Ублажа́ем тя,/ преподо́бне о́тче Амвро́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Мартину Туровскому, глас 6

Тя́жким неду́гом стра́ждущий и людьми́ забы́тый,/ моли́л еси́ жа́жду утоли́ти, преподо́бне Марти́не,/ те́мже Христо́с посла́ с Небесе́ благове́рных Бори́са и Гле́ба/ тебе́ послужи́ти и неду́г исцели́ти,/ моли́ся ны́не ко Го́споду/ спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся... (общий преподобному).

Величание

Ублажа́ем тя,/ преподо́бне о́тче Марти́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

28/11 Перенесение мощей мучеников бессребреников и чудотворцев Кира и Иоанна (412). Преподобных Сергия и Германа, Валаамских чудотворцев (ок. 1353). Преподобного Ксенофонта Робейского (1262). Иконы Божией Матери, именуемой «Троеручица» (VIII).

Тропарь мученикам бессребреникам и чудотворцам Киру и Иоанну, глас 5

Чудеса́ святы́х Твои́х му́ченик,/ сте́ну необори́му нам дарова́вый, Христе́ Бо́же,/ тех моли́твами сове́ты язы́ков разори́,/ я́ко еди́н Благ и Человеколю́бец.

Ин тропарь, глас тойже

Святи́и сла́внии Ки́ре и Иоа́нне,/ безсре́бреницы, му́ченицы и чудотво́рцы,/ милосе́рдием свои́м, я́ко стено́ю необори́мою,/ нас огради́те от всех бед/ и от враго́в ви́димых и неви́димых сохрани́те/ непреста́нною ва́шею моли́твою ко Го́споду.

Ин тропарь, глас тойже

Прему́дрии вселе́нней вра́чеве,/ Ки́ре и Иоа́нне,/ от Бо́га прия́сте вла́сть цели́те неду́ги душе́вныя,/ вку́пе же и теле́сныя,/ и ны́не моли́теся/ сохрани́ти град и лю́ди от одержа́щих зол/ и спасти́ моли́твами ва́шими ду́ши на́ша.

Ин тропарь, глас тойже

Тро́ичная благода́ть все́льшися в честна́я сердца́ ва́ша,/ преблаже́ннии Ки́ре и Иоа́нне,/ на ду́хи нечи́стыя стра́шни прогони́телие яви́стеся./ И не то́чию явле́нным, но и та́йным/ неду́гом вра́чеве бысте,/ те́мже, дерзнове́ние иму́ще к Человеколю́бцу Бо́гу,/ непреста́нною моли́твою душе́вныя на́ша стра́сти исцели́те.

Кондак, глас 3

От Боже́ственныя благода́ти дар чуде́с прие́мше,/ святи́и, чудоде́йствуете непреста́нно,/ вся на́ша стра́сти рукоде́йством секу́ще неви́димо,/ Ки́ре Богому́дре со Иоа́нном сла́вным:/ вы бо Боже́ственнии вра́чеве есте́.

Ин кондак, глас 6

Вели́кое врачевство́ вселе́нней,/ супряже́ние Христо́во возлю́бленное,/ свети́льники сия́ющия, зарю́ исцеле́ний,/ воспое́м, ве́рнии, велегла́сно,/ внутрь це́ркве им вопию́ще:/ Ки́ре и Иоа́нне,/ пода́тели чудесе́м, вра́чеве неду́жным,/ освяща́ете вся стра́ны.

Величание

Велича́ем вас,/ чудотво́рцы сла́внии Ки́ре и Иоа́нне,/ и чтим честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ чудотво́рцы сла́внии, Ки́ре и Иоа́нне,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы а́нгелом.