Том 1 (XI-XII века)

В лето 6622. Преставися Святославъ, сынъ Володимеръ, месяца марта 16 день, и положенъ бысть во Переяславле у церкви святаго Михаила; ту бо отець ему далъ столъ, выведы ̀и изъ Смоленьска. В се же лето Мьстиславъ заложи Новъгородъ болий перваго. В се же лето заложена бысть Ладога камениемъ на приспе Павломъ посадникомъ при князе Мьстиславе.

Пришедшю ми в Ладогу, поведаша ми ладожане, яко сде есть: «Егда будеть туча велика, находять дети наши глазкы стекляныи, и малы и великыи, провертаны, а другые подле Волховъ беруть, еже выполоскываеть вода», от нихъ же взяхъ боле ста, суть же различь.

[795] Сему же ми ся дивлящю, рекоша ми: «Се не дивно; и суть и еще мужи старии ходили за Югру и за Самоядь,[796] яко видивше сами на полунощныхъ странахъ: спаде туча, и в той тучи спаде веверица млада, акы топерво рожена, и възрастъши, и расходится по земли. И пакы бываеть другая туча, и спадають оленци мали в ней, и възрастають и расходятся по земли». Сему же ми есть послухъ посадникъ Павелъ ладожкый и вси ладожане.

Аще ли кто сему веры не иметь, да почтет

фронографа.[797] «Въ царство Прово, дожгьцю бывшю и тучи велиции, пшеница с водою многою смешена спаде, юже събравше, насыпаша сусекы велия. Тако же при Аврильяне крохти сребреныя спадоша, а въ Африкеи три камени спадоша превелици». И бысть по потопе и по разделеньи языкъ «поча царьствовати первое Местромъ от рода Хамова, по немь Еремия, по немь Феоста», иже и Соварога нарекоша егуптяне. «Царствующю сему Феосте въ Егупте, въ время царства его спадоша клеще съ небесе, нача ковати оружье, преже бо того палицами и камениемъ бьяхуся. Тъ же Феоста законъ устави женамъ за единъ мужь посагати и ходити говеющи, а иже прелюбы деющи, казнити повелеваше. Сего ради прозваша ̀и богъ Сварогъ». «Преже бо сего жены блудяху к немуже хотяше, и бяху, акы

скотъ, блудяще. Аще родяшеть детищь, который ей любъ бываше, дашеть: “Се твое детя”. Он же, створяше празнество, приимаше. Феость же сь законъ расыпа и въстави единому мюжю едину жену имети и жене за одинъ мужь посагати; аще ли кто переступить, да ввергуть ̀и в пещь огнену». «Сего ради прозваша и́ Сварогомъ и блажиша и́ егуптяне. И по семъ царствова сынъ его, именемъ Солнце, егоже наричють Даждьбогъ, семъ тысящь и 400 и семъдесять дний, яко быти летома двемадесятьмя ти полу. Не видяху бо егуптяне инии чисти; ови по луне чтяху, а друзии деньми лета чтяху; двою бо на десять месяцю число потомъ уведаша, отнележе начаша человеци дань давати царемъ. Солнце царь, сынъ Свароговъ, еже есть Дажьбогъ, бе бо мужь силенъ. Слышавше не от кого жену некую от егуптянинъ богату и в сану

сущю и некоему, въсхотевшю блудити с нею, искаше ея, яти ю хотя. И не хотя отца своего закона расыпати, Сварожа, поемъ со собою мужь неколко своихъ, разумевъ годину, егда прелюбы дееть, нощью припаде на ню, не удоси мужа с нею, а ону обрете лежащю съ инемъ, с нимъже хотяше. Емъ же ю, и мучи, и пусти ю водити по земли в коризне, а того любодеица всекну. И бысть чисто житье по всей земли Егупетьской, и хвалити начаша».[798] Но мы не предолжимъ слова, но рцемъ съ Давидомъ: «Вся елико въсхоте и створи Господь на небеси и на земли, в мори, въ всихъ безнахъ, възводяй облакы от последнихъ земли».[799] Се бо и бысть последняя земля, о нейже сказахомъ первое.