Том 15 (XVII век)

И внезаапу обретохомся у тела моего, Елисей же от мене невидим бысть. И видехъ архангела Михаила стояща, и зрях, яко врата растворишася. И глагола ми архангелъ: „Поиди во врата сия". Аз внидох и, не вем како, обретохся в теле моемъ. И возведъ очи мои, яко от сна возбнувъ[224], и видехъ старца некоего седяща с кадиломъ у тела моего. И рече ми старецъ: „Мы вси видехом, яко мертвъ был еси с полчаса, и тело твое осязахом, и свещу ко устом твоимъ приносихом тонкаго ради дыхания[225] твоего. Отнюдь[226] без дыхания лежал еси — сего ради и кадихом тя. И како ныне ожил еси, не вемъ, Богъ весть единъ". Аз же о сем не поведах ему ничтоже. И потом зело изнемогохъ болезнию лютою, десять дней не могох брашна вкусити. Аще что и покушахся вкусити, но утроба не принимаше. И тако помалу едва устрабихся от немощи во многи дни и оздравих благодатию Христовою. И пребых во обители Живоначалныя Троицы до Великия четыредесятницы

[227]. Потом посланъ бых от настоятеля обители тоя в монастырьское село и тамо лето едино пребых. И забых испытающаго сердца и утробы[228], праведно истязающаго тайная, тамо пребывая, по реченному: муринъ[229] не обеляшеся, и ракъ прямо ходити не научашеся. Наступих бо на тижение[230]

греховное, избодох ноги моя душевныя, и благия пути погладих[231], и правыя стезя порастих былием леностнымъ, и яко в безлунной нощи кривыми стопами жизнь мою измерихъ — и сими душу мою помрачих, и в покое телеснем и во всяком сладострастии живях. И что архангелъ три заповеди сохранити мне повеле, и те все преступихъ. И паки во обитель приидохъ и едино лето в ней пребых. И паки послан бысть на службу в другую монастыръскую весь и тамо такожде по прежнему обычаю вся притяжах, яже ненавидит Богъ.

В то же время бысть Божие посещение на люди: прииде бо язва смертоносная, глаголемая пострелъ. Язва же та не на долгое время простреся, но обаче кого постреляше, того в третий день и гробу предаяше. В то же время ятъ бых и аз тою же язвою и в лице устреленъ наказаниемъ Божиимъ. Носъ мой и лице все опухло бяше, и очи воглубившеся и невидими быша, покрышася кожею иже со главы, яко мехомъ, даже и до носа. И отнюдь[232] страшно видение бысть зрящимъ на мя. Объятъ же мя страх велий, и вниде трепетъ в кости моя[233], во мне смятеся крепость моя, и исчезох о обличении моемъ о беззакониих моих

[234]. И помышлях в себе, яко зол душа моя наполнися, и живот мой аду приближихся[235], и яко страшно есть еже впасти в руце Бога живаго[236]. И помышлях в себе виновна быти таковыя язвы греховъ ради моих и преступления ради заповедей оных, ихже архангелъ мне рекъ сохранити и не соблюдохъ. И сего ради вмале[237]

не отчаяхся спасения своего. Обаче уповаю на милость Божию[238], веде, яко милостивъ и щедръ[239] есть, дерзнух поискати своей немощи во уме, приемъ пророческое слово, глаголюще: „Поражю и аз исцелю"[240]. И паки глаголет Господь: „Во гневе же моем поразих его и за милость мою исцелихъ и́"[241]. И тако язвою тою лютою люди уязвляеми, скорбяще зело и умирающе мнози.