Том 9 (Конец XIV - первая половина XVI века, подъем общественного значения литературы)

О сих убо преуспокоивше слово, мала некаа словеса изречем о нынешнем православном царствии пресветлейшаго и высокостолнейшаго государя нашего, иже въ всей поднебесной единаго христианом царя и броздодръжателя святых Божиихъ престолъ, святыа вселенскиа апостолскиа церкве, иже вместо римской и костянтинополской, иже есть в богоспасном граде Москве святого и славнаго Успения пречистыя Богородица, иже едина въ вселеннеи паче солнца светится. Да веси, христолюбче и боголюбче, яко вся христианская царства приидоша в конец и снидошася во едино царство нашего государя, по пророческим книгам, то есть Ромеиское царство[540]: два убо Рима падоша, а третий стоит, а четвертому не быти.[541] Многажды и апостолъ Павел поминает Рима в посланиих, в толкованиих глаголет: «Рим — весь мир».

[542] Уже бо христианской церкви исполнися блаженаго Давида глаголъ: «Се покой мой въ век века, зде вселюся, яко изволих и».[543] По великому же Богослову: «Жена облъчена в солнце, и луна под ногама ея, и чадо въ руку еа, и абие изыде змий от бездны, имеа глав 7 и сем венец на главах ему, и хотяше чадо жены пожрети. И даны быша жене криле великаго орла, да бежит въ пустыню, змий же изо устъ своих испусти воду, яко реку, да ю в реце потопит».[544] Воду же глаголют неверие, видиши ли, избранниче Божий, яко вся христианскаа царства потопишася от неверных, токмо единаго государя нашего царство едино благодатию Христовою стоит. Подобает царствующему дръжати сие с великым опасением и к Богу обращением, не уповати на злато и богатство изчезновение, но уповати на все дающаго Бога. А звезды, якоже и преже рекох, не помогут ничим, ни придадут ни уймут. Глаголет убо връховный апостолъ Петръ в соборномъ Послании: «Един день пред Господомъ, яко тысяща лет, а тысяща лет, яко един день, — не опоздит Господь обета, еже обеща, но долго тръпит, не хотя некиа погубити, хотя всех в покаание вместити».[545]

Видиши ли, боголюбче, яко в руце его дыхание всех сущих, глаголет бо, яко: «Еще единою потрясу не токмо землею, но и небом».[546] Понеже и апостолом еще не свершенным, выше силы не велел пытати: богословесный же наперсник во «Откровении» своем глаголет: «В последнее время спасаа, спаси душу свою, да не умрем второю смертию, геонскою,[547] но обратимся ко всемогущему спасти нас господу с молбами прилежными, и теплыми слезами приплачемся пред ним, яко да смилится обратити ярость свою от нас, и помилует нас, и сподобит нас услышати сладкый блаженый и въжделенный его глас: “Приидите, благословленнии, Отца моего наследуйте уготованное вам царство преже сложениа миру”».[548]

Буди, спасаяся и здравствуя о Христе.

ПОСЛАНИЕ К ВЕЛИКОМУ КНЯЗЮ ВАСИЛИЮ, В НЕМЪЖЕ О ИСПРАВЛЕНИИ КРЕСТНАГО ЗНАМЕНИЯ И О СОДОМСКОМ БЛУДЕ

Иже от вышняа и от всемощныя вся содръжащиа десница Божиа, имьже царие царствуют и имьж велицыи величаются и силнии пишут правду тебе, пресветлейшему и высокостолнейшему государю великому князю, православному христианьскому царю и всех владыце, броздодержателю святых Божиих престолъ, святыа вселенскыя соборныя апостольскыя церкви Пречистыя Богородицы, честнаго и славнаго еа Успения иж вместо римския и константинопольския просиавшу, — стараго убо Рима церкви падеся неверием аполинариевы ереси, втораго Рима, Константинова града церкви, Агаряне внуцы секирами и оскордъми разсекоша двери, сиа же ныне третиаго, новаго Рима, дръжавнаго твоего царствиа святая соборная апостольскаа церкви, иж в концых вселенныа в православной христианьстей вере во всей поднебесней паче солнца светится, — и да весть твоа держава, благочестивый царю, яко вся царства православныя христианьския веры снидошася въ твое едино царство: един ты во всей поднебесной христианом царь.

Подобает тебе, царю, сие держати со страхом Божиимъ, убойся Бога, давшаго ти сия, не уповай на злато, и богатство, и славу: вся бо сиа зде собрана и на земли зде остают. Помяни, царю, оного блаженнаго, иж скипетръ в руце и венец царствиа на своей главе нося, глаголаше: «Богатство, аще течет, не прилагайте сердца»;[549]

премудрый же Соломонъ рече: «Богатьство и злато не во скровищих знается, но егда помогаетъ требующим»;[550] апостолъ же Павелъ, сим последуа, глаголет: «Корень всем злым — сребролюбие»,[551] — не не имети велит, но не прилагати упования ниже сердца к нему, но уповати на все дающаго Бога. Вся убо твоя к Богу чистая вера и любовь — ко святым Божиимъ церквам; но и еще, царю, исправи две заповеди.

Еже во твоем царствии не пологают человецы на себе право знамения честнаго креста, о нихъж издалеча проведый апостолъ Павел глаголаше: «Преже писах вам, ныне же плача глаголю о вразех креста Христова, имже конець пагуба».[552]