Украинцы, которые были (XVI – начало ХХ века): документы, материалы, исследования

Велможный мосце пане гетмане войска их царского пресветлого величества запорозского, а наш велде милостивый пане и ласвавый добродею. Послаыний велможности вашой добродея нашего козак Сидор Горбылецкой прибил до нас з листом велможности вашой мая 12 дня, которий лист ваш панский подлуг звиклости нашой прежней вичиталисмо и все речи, в нем вираженные, барзо добре в нем вирозумелисмо, иж ужете сими часи, постех воскресенских, засилаючи свой уже то повторний лист. Поздоровляешь нас урочастим праздником воскресеньем Христа Бога нашего, зичачи нам оный в добром здоровю опровадыти, чому и естесми велце вдячны и уже перед сим через Якова Попенка, товарища сотне переволочанской, заимним способом от вас пишучи обо всем, тим же светлим воскресением веншовали велможность вашу, рейментара своего, и теперь веншуем и всего добра и щасливого на долгие лета пановавя соусердно зичим. А при той нашой поволной зичливости, першие наши прозби и речи виражаєм до велможности вашой, же пишешь, ваша милость, до нас все едно тож а тож, а болш нечого, жебисмо з неприятелем примирье наше нам потребнее, болше не держачи, розиривали и всяким способом взялися за воений промысл, до которого дела, милость ваша, побужаешь. А помочи нам жадной и вспоможенья не грошового, не запасу борошенного не чиныш, а не тилко того, и теж люду охотного пропускати не повелеваешь, а не толко уводячи нас своими солодкими обетницами невласне детей подбаваючи уводишь, вшак ми юж перед сим не раз не два пишучи до велможности вашой виражалисмо тое в листах нашых, иж свадно помкнутися неуважне, але треба уважати и в каждих справах конца ричом угля-даты, бо ним и дни зийде солнце, жеби роса очи их не виела, а до того наибарзей, жеби вместо поправи славы стариной войсковой одвагою молодцов добрих набитой, которою весь народ славный козацкий здобытся, не привели в згубу, чего не дай, Боже, ми того себе не зичим, а вшак уже писали ми до велможности вашой, потребуючи, того по милости вашой, абись нам прислал всякое удоволствованя и вшелякие потреби до военого способу грошей с потребу на сторожу, борошенный запасы на все войско, да той слушный людем охотным аби тракт бил до нас и проход незборонний, теди того, велможность ваша, яко жыво не учинилисте, а не чините, але тилко ласкою своею потешаючи нас впевняєте, а самую речу и скутком исполныти ве хочете, теди мы не видячи от велможности вашой жадной ласки и обачносты, за для чого ж маем власне з неприятелем розмирати и що нам буде напотим за потеха якая нагорода, тилко хиба сами собе уменшимо пожитку, да и з несилою нашею противно того немирного неприятеля не могом ся застановити, але и о вшем нелга буде распостертися да и носа витинути, ежели теж цале потребуешь, велможность ваша, по нас, жеби кы розмирили, теди ведлуг первого и сего листу нашего, чого потребуем од велможности вашой, все тое неиначей учинете досить, що и ми подлуг охоти войсковой не будем болш в том деле милость вашу турбовати, а ежели би не мело тое подлуг прозбы нашой так стати и иначей одменытися, болш себе и нас не труднете да и такових писом до вас не присилайте, бо иначей стати не може; а що пишешь велможность ваша до нас, ознаймуючи нам тое, иж пресветлие монархи наши указали сего лета на военной службе быти в готовности, зичим и ми всегда остаемо до промислу военого з належитым порядком в поготове и за нами дело военное не стане да и приборов нам жадных не богато чиныти, як скоро зачуем о зближеню сил монарших, не замешкаем и примирье наше з неприятелем того ж часу розирвати, а на сей час ведомости якие себе и повоженю неприятелевом маем, ознаймуем и велможности вашой, иж сам хан кримский остает сего часу в Ядерном, орда вся оного повернула до Криму, а син его галга салтан достает в Белагороде. То все велможности вашой ознаймивши и звиш предложение речи до здорового розсудку вашего панского и уваги подавшы, на сей час и далший з унежонным поклоном ласце панской и приязве ожедуемся. Дата с Коша мая 14 дня року от сотвореня света 7198, а от Рожества Христова 1690. Велможности вашой всего добра щиро зичливий и увежоний слуга, Иван Гусак атаман кошовий войска их царского пресветлого величества запорозского низового с товариством. Велможный добродеюмосци пане гетмане, за обисканне нас гостинцем, мене самогодвадцатьми левами и всей старшины зо мною по 8 левах, которий гостинец и дар од велможности вашой дойшол рук нашых, за що упавши до ног, яко пану и реемеатару своему, чинимо, як найпокорнейшее подякованне, и обецуемося всим добрим одвдячати и зычливыми услугами одслуговати, тилько покорне, а покорне просимо велможности вашей, хтей прозбу всего войска нашего запорозкого исполните и жаданнию их досыть учинити неиначей, прекладаем теж и скаргу пред велможностию вашею на врад переволочанский, именно на сотника и шапара, в таковии способ и в таковой мери, иж незносной кривди, збитки и беды над людми зостаючи так чинят, а ше болшая из нас войска запорожзкого насмехаются, мовячи так до людей, же не возите туда болш ничого, тилко деготь да горелку, теды нам чуючи тое, есть великий жаль и скорбь на тих неуважных людей; просимо и велможности ваштой, не хтей им того оставити»[33]

.