Великий князь Александр Невский

…Прииде время в лето 7055 (1547), внегда, божественною ревностию подвижем, благочестивый и Богом венчанный царь и великий князь Иван Васильевич, всея Русии самодержец, Божиим благоволением от благоумныа доброты просветися разум его, осиаваем благодатию Святаго Духа, возжеле от всея душа, еже ему Бог на память возведе, иже в Русской земли царския ему державы премирное богатство взыскати и собрата, иже от мног времен и доныне сокровено и забвению предано, великиа светилни-кы, новейшиа чюдотворцы, овех своима царскыма очима видев, а овех же от многых известных самовидец слышав, Богом прославляемы многыми и неизреченными чюдесы, и вси приходящий к ним с верою всякым многоразличным недугом исцеление получаху и всяк праведный гнев Божий молением их на милосердие претворяем и вся благая потребная молитвами их исправляются. И праздновати же повсюду всим великым светильником не узаконено бысть, но идеже коегождо их честныа ракы со святыми мощьми бяху, ту и славими быша. И сего ради христолюбивый царь и великий князь Иван възвещаеть боголюбезнейшему митрополиту Макарию всея Русии[240]

и совета блага просит от него, еже от многаго благоговении и любви имея желание в мысли своей, дабы сим новейшим чудотворцем уставити празднество в святых Божиих церквах повсюду, якоже и прежним, иже в Руской земли провозсиавшим новым чюдотворцем. Пресвященнейший же митрополит Макарий возрадовася душею, ведый, яко Божиим хотением сицево бысть тщание и вера благочестиваго царя, и вкупе Богом подвизаеми, созывают всех архиепископов, и епископов, и архимандритов, и игуменов, и весь священническый и иноческый чин всея Рускиа митрополиа. Егда же снидошася от предел своих в царствующий град Москву, и тогда Богом венчанный царь и великий князь со отцем своим Макарием митрополитом многое моление простирает ко всем иже в Русий-ском царствии его архиепископом и епископом, да коиждо их потщится во своих пределех, в градех, и в селех, и в монастырех, и в пустынях о тех великых чюдотворцех новых известно и достолепно изсведетельствовати всеми священными святыми мужми, и инокы, и пустынникы, и боголюбивыми князьми, и боляры, и богобоязнивыми людьми, где коегождо чюдотворца Бог прославил великыми знамении и чюдесы от коликых времен и в кая лета. И святителие же, слышаще таковое благое начинание и повеление, паче же смиреномудрое моление и теплейшую веру Богом венчаннаго царя, радостию духовною и желанием сердечным без закоснениа събирают люботрудным подвигом и подобопечалным собранием каноны, и житиа, и чюдеса, от многых времен чюдодействуемы, тех святых новых чюдотворцев по свидетельству тамо сущих жителей всех предиреченных чинов, и котороиждо святитель от своих предел яко многоценный дар Богу и яко всеплодну жрътву и яко приношение приатно принесоша в богоспасаемый град Москву на боголюбивый собор к благочестивому царю и великому князю Ивану и пресвященному Макарию, митрополиту всея Русии. Вкупе же с ними бяху и честнии архимандриты и игумени и весь освященный собор и предложиша сиа во приобщение церковному уставу пети и праздновати сим в предняя лета, якоже и прочим святым, от века Богу угодившим…

Такоже и сим новейшим чюдотворцем подобообразно празднество с прежними святыми съчеташа… Святых же сих, иже со святым Ионою ново Богом прославленных, имена суть сии[241]

: святии святителие. Великаго Новаграда архиепископи Иван, и Евфимие, и Иона, и пермьскый епископ Стефан, и тферскый епископ Арсений, ростовьскый епископ Иаков, сербьскый архиепископ Арсений. И святым праведным имена: блаженный великий князь Александр Невьскый, псковьскый князь Всеволод, муромстии князь Петр и княгиня Феврониа, муромстии же князь Костянтин и чада его Михаил и Феодор, и клопьскый Михаил. Святым же мучеником имена: великий князь Михаил тферскый, Иван белоградскый, Иван и Антоний и Евстафий, иже в Литве пострадаша. Преподобным же имена: Пахнотий боровскый, Никон, ученик Сергиев чюдотворцев, Савва сторожевьской, Макарий колязинский, Дионисие глушицкый, Павел комелский, Саватий и Зосима соловетстии, Александр свирьскый, Евфимие суждальскый, Авраамие смоленьскый, Савва вешерьский, Евфросин пьсковьскый, Ефрем переокомский, Григорий иже на Пелшьме реце. Святым же иже Христа ради уродивым имена: Максим московский, Иван и Прокопий устюжский. И сих всех святыя памяти празднуем и ликоствуем по настоящаго месяца дне и числу коегождо преставлениа и обретениа честных мощей их.

(Цит. по: 97. С. 460–463)

Из «Летописца Владимирского собора»