История русской церкви (Том 3)

В лето 6747, во дни великаго князя Василия костромскаго и галицкаго, рекомаго Квашни, сия чюдотворная Богородицына икона обретена бысть и принесена во град Кострому сице: месяца августа в 16 день преждереченный великий князь Василий пойде вне града на ловитву, яко обычай есть князем веселитися, и егда бе вне града поприще едино, начашя пси лаяти притужно. Великий же князь на то место ускори, и, приехав сам, зрит пречудную ону икону Пречистыя Богородицы, на соснове древе стоящу, и скоро с коня сниде, хотя святую икону взята; икона же взятся горе и не дадеся ему взята. Он же отступи мало и нача покланяние творити со слезами, и паки вторицею покусися, хотя взята ону Божественную икону, и не получи желаемаго. И всед на конь, скоро пойде во град, и поведа протопопу бывшее, и повеле ему со кресты и со освященным собором пойти немедленно на место то, идеже явися ему Богородицына икона. Сам же князь пойде со множеством народа, и приидоша на место, и молитвовавше довольно, и подъяша Пречистыя икону священническими руками с великою честию невозбранно, и принесоша во град, и поставиша в соборной церкви святаго великомученика Феодора Стратилата; и видеша народи честную ону икону, и начаша поведати, глаголюще, яко мы вчера видехом сию икону, несому сквозе град наш воином неким, подобен той воин видением святому великомученику Феодору Стратилату, и тако свидетельствоваху народи. На месте же том, идеже обретеся икона Богородицына, повеле великий князь церковь возградити во имя Господа Бога и Спаса нашего Иисуса Христа, Нерукотворенаго образа Его, и монастырь устроити повеле, и отчины многи даде на пропитание братии. И по некоем времени приидоша человецы от града, глаголемаго Городца, и вшедше во святую церковь, и видеша икону Пресвятыя Богородицы, и поведаша о ней, яко тая икона из их града. Глаголюще же, егда попущением Божиим Городец град прегордый царь Батый попленив пожже, и от того времени не обретеся икона тая у них во граде. И видевше ю, поклонишася ей и поведаша многая чюдеса, бывшая от тоя иконы во граде их. По сем же быша многая чюдеса и во граде Костроме от иконы тоя: дважды бо церковь уторе, икона же она невредима пребысть от огня. Потом же приидоша погании татарове на град Кострому, и князь великий Василий пойде противу них; икону же ту Богоматере повеле пред собою носити. И тогда видеша погании от иконы лучи огненыя, и видевше, смутишася, и на бежание устремишася. Князь же великий гнаше вслед их, и многих поби, и живых пойма. И потом великий князь повеле устроити церковь соборную каменную во имя Пресвятыя Богородицы — честнаго и славнаго Ея Успения. В той бо день принесена бысть икона Богородицына во град Кострому святым великомучеником Феодором Стратилатом. Феодора же Стратилата церковь повеле князь устроити в приделе у соборныя церкве, и оттоле нача именоватися икона Пречистыя Богородицы Феодоровская, и многая чюдеса творяше с верою приходящим к Пречистому Ея образу и до сего дне о Христе Иисусе Господе нашем, Емуже слава ныне и присно и во веки веком. Аминь.

5. Месяцеслов по церковному обиходу XIII в.

(К прим. 179)

Месяц сентябрь, р[е]комый рюин, иматъ дний 30. День имать час 12, а нощь 12.

1. Память св. отца Семеона Столпника и матере его Марфы.

2. Страсть св. муч. Мамонта.

3. Страсть св. отца Анфима.

4. Страсть св. Вавулы и с нимь 4 и младенечь.

5. Страсть св. пророка Захария, отца Предтечева; в тож день убиение Глеба, князя русьскаго.

6. Чюдо св. архистратига Михаила.

7. Страсть св. муч. Созонта.

8. Рождество св. Богородица.

9. Сбор св. праведнику Акима и Анны.

10. Поклонение Честному Древу, и св. Варипсава, и св. жен Минодоры, и Нифороды, и Митродоры.

11. Поклонение Честному Древу и св. и преподобныя Феодоры.

12. Поклонение Честному Древу, и св. Аутонома, и Корнута.

13. Поклонение Честному Древу, и св. Макровия, и Корнилия сотника.

14. Въздвижение празднуем Честнаго Креста.

15. Страсть св. муч. Никиты.

16. Страсть св. муч. Еуфимьи.

17. Страсть св. трий дев: Веры, Любве, Надежа — и матери их Софии.

18. Страсть св. святителя Семеона, брата Господня.

19. Страсть св. Трофима, Дорудомента и Саватия.

20. Страсть св. Еустафия стратилата.

21. Страсть св. Феодора, иже в Пергии, и св. святителю Исакия и Мелетия.

22. Св. святителя Фокы, и св. отца Ионы, и св. пророка Ионы.

23. Зачатье св. Елизавефи, егда зачат св. Иоанна Предтечю.

24. Страсть св. мученица Феклы.

25. Память св. отца Пафнотия, и св. матере нашея Евфросиние, и Змарагда.

26. Преставление св. Иоанна Богослова еуангелиста.

27. Страсть св. Епихарии, и св. Калистрата, и с нимь 49.

28. Память св. Харитона, началника пустыньником.

29. Память преподобнаго Кюрияка отходника.

30. Страсть св. святителя Григория Арменьскаго; в тож день св. жен Рипсимия и Гаияны, и с ними мужь 70, а жен 32.

Месяц октябрь, р[е]комый листопад, имать дний 31. День имать час 11, а нощь 13.

1. Память св. апостола Анание; в тож день Покров святый Богородици.

2. Страсть св. мученику Кюприяна и Устины.

3. Страсть св. Дионисия Ареопагита и св. другаго Дионисия епископа.