Новый Завет (на цсл., гражданский шрифт, с ударениями)

¹ И бысть посе́м, и той прохожда́ше сквозе́ гра́ды и ве́си, пропове́дуя и благовеству́я Ца́рствие Бо́жие, и обана́десяте с Ним.

² И жены́ не́кия, я́же бя́ху исцеле́ны от духо́в злых и неду́г, Мари́а нарица́емая Магдали́на, из нея́же бесо́в седмь изы́де,

³ И Иоа́нна жена́ Хуза́ня, приста́вника И́родова, и Суса́нна, и и́ны мно́ги, я́же служа́ху Ему́ от име́ний свои́х.

⁴ Разумева́ющу же наро́ду мно́гу, и от всех градо́в гряду́щим к Нему́, рече́ при́тчу:

⁵ Изы́де се́яй се́яти се́мене своего́, и егда́ се́яше, о́во паде́ при пути́, и попра́но бысть, и пти́цы небе́сныя позоба́ша е́.

⁶ А друго́е паде́ на ка́мени, и прозя́б у́сше, зане́ не име́яше вла́ги.

⁷ И друго́е паде́ посреде́ те́рния, и возрасте́ те́рние, и подави́ е́.

⁸ Друго́е же паде́ на земли́ бла́зе, и прозя́б сотвори́ плод стори́цею. Сия́ глаго́ля, возгласи́: име́яй у́ши слы́шати, да слы́шит.

⁹ Вопроша́ху же Его́ ученицы́ Его́, глаго́люще: что есть при́тча сия́?

¹⁰ Он же рече́: вам есть дано́ ве́дати та́йны Ца́рствия Бо́жия, про́чим же в при́тчах, да ви́дяще не ви́дят и слы́шаще не разуме́ют.

¹¹ Есть же сия́ при́тча: се́мя есть сло́во Бо́жие.

¹² А и́же при пути́, суть слы́шащии, пото́м же прихо́дит диа́вол и взе́млет сло́во от се́рдца их, да не ве́ровавше спасу́тся,

¹³ А и́же на ка́мени, и́же егда́ услы́шат, с ра́достию прие́млют сло́во, и си́и ко́рене не и́мут, и́же во вре́мя ве́руют, и во вре́мя напа́сти отпа́дают.

¹⁴ А е́же в те́рнии па́дшее, си́и суть слы́шавшии, и от печа́ли и бога́тства и сластьми́ жите́йскими ходя́ще подавля́ются, и не сверша́ют плода́.

¹⁵ А и́же на до́брей земли́, си́и суть, и́же до́брым се́рдцем и благи́м слы́шавше сло́во, держа́т и плод творя́т в терпе́нии. Сия́ глаго́ля, возгласи́: име́яй у́ши слы́шати, да слы́шит.

¹⁶ Никто́же у́бо свети́льника вжег, покрыва́ет его́ сосу́дом, или́ под одр подлага́ет, но на све́щник возлага́ет, да входя́щии ви́дят свет.

¹⁷

Несть бо та́йно, е́же не явле́но бу́дет, ниже́ утае́но, е́же не позна́ется и в явле́ние прии́дет.

¹⁸ Блюди́теся у́бо, ка́ко слы́шите, и́же бо и́мать, да́стся ему́, и и́же а́ще не и́мать, и е́же мни́тся име́я, во́змется от него́.

¹⁹ Приидо́ша же к Нему́ Ма́ти и бра́тия Его́, и не можа́ху бесе́довати к Нему́ наро́да ра́ди.

²⁰ И возвести́ша Ему́, глаго́люще: Ма́ти Твоя́ и бра́тия Твоя́ вне стоя́т, ви́дети Тя хотя́ще.

²¹ Он же отвеща́в рече́ к ним: ма́ти Моя́ и бра́тия Моя́ си́и суть, слы́шащии сло́во Бо́жие, и творя́ще е́.

²² И бысть во еди́н от дни́й, Той вле́зе в кора́бль и ученицы́ Его́, и рече́ к ним: пре́йдем на он пол е́зера. И поидо́ша.

²³ Иду́щим же им, у́спе. И сни́де бу́ря ве́треная в е́зеро, и скончава́хуся и в беде́ бе́ху.

²⁴ И присту́пльше воздвиго́ша Его́, глаго́люще: Наста́вниче, Наста́вниче, погиба́ем. Он же воста́в запрети́ ве́тру и волне́нию водно́му, и улего́ста, и бысть тишина́.

²⁵ Рече́ же им: где есть ве́ра ва́ша? Убоя́вшеся же чуди́шася, глаго́люще друг ко дру́гу: кто у́бо Сей есть, я́ко и ве́тром повелева́ет и воде́, и послу́шают Его́?

²⁶ И преидо́ша во страну́ Гадари́нску, я́же есть об он пол Галиле́и.

²⁷ Изше́дшу же Ему́ на зе́млю, сре́те Его́ муж не́кий от гра́да, и́же имя́ше бе́сы от лет мно́гих, и в ри́зу не облача́шеся, и во хра́ме не живя́ше, но во гробе́х.

²⁸ Узре́в же Иису́са и возопи́в, припаде́ к Нему́, и гла́сом ве́лиим рече́: что мне и Тебе́, Иису́се Сы́не Бо́га Вы́шняго? Молю́ся Ти, не му́чи мене́.

²⁹ Повеле́ у́бо ду́хови нечи́стому изы́ти от челове́ка, от мног бо лет восхища́ше его́, и вяза́ху его́ у́зы желе́зны и пу́ты, стрегу́ще его́, и растерза́я у́зы, гони́мь быва́ше бе́сом сквозе́ пусты́ни.

³⁰ Вопроси́ же его́ Иису́с, глаго́ля: что ти есть и́мя? Он же рече́: легео́н, я́ко бе́си мно́зи внидо́ша вонь.

³¹ И моля́ху Его́, да не повели́т им в бе́здну ити́.

³² Бе же ту ста́до свине́й мно́го пасо́мо в горе́, и моля́ху Его́, да повели́т им в ты вни́ти. И повеле́ им.

³³ Изше́дше же бе́си от челове́ка, внидо́ша во свиния́, и устреми́ся ста́до по бре́гу в е́зеро, и истопе́.

³⁴

Ви́девше же пасу́щии бы́вшее, бежа́ша, и возвести́ша во гра́де и в се́лех.

³⁵ Изыдо́ша же ви́дети бы́вшее, и приидо́ша ко Иису́сови и обрето́ша челове́ка седя́ща, из него́же бе́си изыдо́ша, оболче́на и смы́сляща, при ногу́ Иису́сову, и убоя́шася.

³⁶ Возвести́ша же им ви́девшии, ка́ко спасе́ся беснова́вый.

³⁷ И моли́ Его́ весь наро́д страны́ Гадари́нския отити́ от них, я́ко стра́хом ве́лиим одержи́ми бе́ху. Он же влез в кора́бль, возврати́ся.

³⁸ Моля́шеся же Ему́ муж, из него́же изыдо́ша бе́си, дабы́ с Ним был. Отпусти́ же его́ Иису́с, глаго́ля:

³⁹ Возврати́ся в дом твой и пове́дай, ели́ка ти сотвори́ Бог. И и́де, по всему́ гра́ду пропове́дая, ели́ка сотвори́ ему́ Иису́с.

⁴⁰ Бысть же егда́ возврати́ся Иису́с, прия́т Его́ наро́д: бе́ху бо вси ча́юще Его́.

⁴¹ И се, прии́де муж, ему́же и́мя Иаи́р, и той князь со́нмищу бе, и пад при ногу́ Иису́сову, моля́ше Его́ вни́ти в дом свой,

⁴² Я́ко дщи единоро́дна бе ему́, я́ко лет двоюна́десяте, и та умира́ше. Егда́ же идя́ше, наро́ди угнета́ху Его́.