Новый Завет (на цсл., гражданский шрифт, с ударениями)

⁴³ И жена́ су́щи в точе́нии кро́ве от двоюна́десяте ле́ту, я́же враче́м изда́вши все име́ние, и не возмо́же ни от еди́наго исцеле́ти,

⁴⁴ И присту́пльши созади́, косну́ся кра́я риз Его́, и а́бие ста ток кро́ве ея́.

⁴⁵ И рече́ Иису́с: кто есть косну́выйся Мне? Отмета́ющимся же всем, рече́ Петр и и́же с Ним: Наста́вниче, наро́ди одержа́т Тя и гнету́т, и глаго́леши: кто есть косну́выйся Мне?

⁴⁶ Иису́с же рече́: прикосну́ся Мне не́кто, Аз бо чух си́лу изше́дшую из Мене́.

⁴⁷ Ви́девши же жена́, я́ко не утаи́ся, трепе́щущи прии́де, и па́дши пред Ним, за ню́же вину́ прикосну́ся Ему́, пове́да Ему́ пред все́ми людьми́, и я́ко исцеле́ а́бие.

⁴⁸ Он же рече́ ей: дерза́й дщи, ве́ра твоя́ спасе́ тя, иди́ в ми́ре.

⁴⁹ Еще́ Ему́ глаго́лющу, прии́де не́кий от архисинаго́га, глаго́ля ему́, я́ко у́мре дщи твоя́, не дви́жи Учи́теля.

⁵⁰ Иису́с же слы́шав отвеща́ ему́, глаго́ля: не бо́йся, то́кмо ве́руй, и спасе́на бу́дет.

⁵¹ Прише́д же в дом, не оста́ви ни еди́наго вни́ти, то́кмо Петра́ и Иоа́нна и Иа́кова, и отца́ отрокови́цы, и ма́тере.

⁵² Пла́кахуся же вси и рыда́ху ея́. Он же рече́: не пла́читеся, не у́мре бо, но спит.

⁵³ И руга́хуся Ему́, ве́дяще, я́ко у́мре.

⁵⁴ Он же изгна́в вон всех, и ем за ру́ку ея́, возгласи́, глаго́ля: отрокови́це, воста́ни.

⁵⁵ И возврати́ся дух ея́, и воскре́се а́бие, и повеле́ да́ти ей я́сти.

⁵⁶ И диви́стася роди́теля ея́. Он же повеле́ и́ма никому́же пове́дати бы́вшее.

Глава 9

¹ Созва́в же обана́десяте, даде́ им си́лу и власть на вся бе́сы, и неду́ги цели́ти.

² И посла́ их пропове́дати Ца́рствие Бо́жие и исцели́ти боля́щия.

³ И рече́ к ним: ничесо́же возьми́те на путь, ни жезла́, ни пи́ры, ни хле́ба, ни сребра́, ни по двема́ ри́зама име́ти.

⁴

И во́ньже дом вни́дете, ту пребыва́йте, и отту́ду исходи́те.

⁵ И ели́цы а́ще не прие́млют вас, исходя́ще от гра́да того́, и прах от ног ва́ших оттряси́те, во свиде́тельство на ня.

⁶ Исходя́ще же прохожда́ху сквозе́ ве́си, благовеству́юще и исцеля́юще всю́ду.

⁷ Слы́шав И́род четвертовла́стник о Иису́се быва́ющая от Него́ вся и недоумева́шеся, зане́ глаго́лемо бе от не́ких, я́ко Иоа́нн воста́ от ме́ртвых,

⁸ От ине́х же, я́ко Илиа́ яви́ся, от други́х же, я́ко проро́к еди́н от дре́вних воскре́се.

⁹ И рече́ И́род: Иоа́нна аз усе́кнух, кто же есть Сей, о Не́мже аз слы́шу такова́я? И иска́ше ви́дети Его́.

¹⁰ И возвра́щшеся Апо́столи пове́даша Ему́, ели́ка сотвори́ша, и пои́м их, оты́де еди́н [89] на ме́сто пу́сто гра́да, нарица́емаго Вифсаи́да.

¹¹ Народи́ же разуме́вше, по Нем идо́ша, и прие́м их, глаго́лаше им о Ца́рствии Бо́жии и тре́бующия исцеле́ния целя́ше.

¹² День же нача́т прекланя́тися. Присту́пльше же обана́десяте реко́ша Ему́: отпусти́ наро́д, да ше́дше во окре́стныя ве́си и се́ла вита́ют и обря́щут бра́шно, я́ко зде в пу́сте ме́сте есмы́.

¹³ Рече́ же к ним: дади́те им вы я́сти. Они́ же ре́ша: несть у нас вя́щше, то́кмо пять хлеб и ры́бе две, а́ще у́бо не ше́дше мы ку́пим во вся лю́ди сия́ бра́шна.

¹⁴ Бе́ху бо муже́й я́ко пять ты́сящ. Рече́ же ко ученико́м Свои́м: посади́те их на ку́пы по пяти́десят.

¹⁵ И сотвори́ша та́ко, и посади́ша их вся.

¹⁶ Прии́м же пять хлеб и о́бе ры́бе, воззре́в на не́бо, благослови́ их, и сломи́, и дая́ше ученико́м предложи́ти наро́ду.

¹⁷ И ядо́ша, и насы́тишася вси, и взя́ша избы́вшия им укру́хи ко́шя двана́десяте.

¹⁸ И бысть егда́ моля́шеся еди́н, с Ним бе́ху ученицы́, и вопроси́ их, глаго́ля: кого́ Мя глаго́лют наро́ди бы́ти?

¹⁹ Они́ же отвеща́вше ре́ша: Иоа́нна Крести́теля, ини́и же Илию́, друзи́и же, я́ко проро́к не́кий от дре́вних воскре́се.

²⁰ Рече́ же им: вы же кого́ Мя глаго́лете бы́ти? Отвеща́в же Петр рече́: Христа́ Бо́жия.

²¹ Он же запре́щь им, повеле́ никому́же глаго́лати сего́,

²²

Рек, я́ко подоба́ет Сы́ну Челове́ческому мно́го пострада́ти, и искуше́ну [90] бы́ти от ста́рец и архиере́й и кни́жник, и убие́ну бы́ти, и в тре́тий день воста́ти.

²³ Глаго́лаше же ко всем: а́ще кто хо́щет по Мне ити́, да отве́ржется себе́, и во́змет крест свой, и после́дует Ми.

²⁴ И́же бо а́ще хо́щет ду́шу свою́ спасти́, погуби́т ю́, а и́же погуби́т ду́шу свою́ Мене́ ра́ди, сей спасе́т ю́.

²⁵ Что бо по́льзует челове́к приобре́т міръ весь, себе́ же погуби́в или́ отщети́в?

²⁶ И́же бо а́ще постыди́тся Мене́ и Мои́х слове́с, сего́ Сын Челове́ческий постыди́тся, егда́ прии́дет во сла́ве Свое́й и О́тчей и святы́х А́нгел.

²⁷ Глаго́лю же вам вои́стинну: суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие.

²⁸ Бысть же по словесе́х сих я́ко дний осмь, и пое́м Иису́с Петра́, и Иоа́нна, и Иа́кова, взы́де на гору́ помоли́тися.

²⁹ И бысть, егда́ моля́шеся, виде́ние лица́ Его́ и́но, и одея́ние Его́ бело́ блиста́яся.

³⁰ И се му́жа два с Ним глаго́люща, я́же бе́ста Моисе́й и Илиа́,

³¹ Я́вльшася во сла́ве, глаго́ласта же исхо́д Его́, и́же хотя́ше сконча́ти во Иерусали́ме.

³² Петр же, и су́щии с ним, бя́ху отягче́ни сном, убу́ждшеся же ви́деша сла́ву Его́, и о́ба му́жа стоя́ща с Ним.