Новый Завет (на цсл., гражданский шрифт, с ударениями)

²³ Но гряде́т час, и ны́не есть, егда́ и́стиннии покло́нницы покло́нятся Отцу́ ду́хом и и́стиною, и́бо Оте́ц таковы́х и́щет покланя́ющихся Ему́.

²⁴ Дух есть Бог, и и́же кла́няется Ему́, ду́хом и и́стиною досто́ит кла́нятися.

²⁵ Глаго́ла Ему́ жена́: вем, я́ко Месси́а прии́дет, глаго́лемый Христо́с, егда́ Той прии́дет, возвести́т нам вся.

²⁶ Глаго́ла ей Иису́с: Аз есмь, глаго́ляй с тобо́ю.

²⁷ И тогда́ приидо́ша ученицы́ Его́ и чужда́хуся, я́ко с жено́ю глаго́лаше. Никто́же бо рече́: чесо́ и́щеши? Или́: что глаго́леши с не́ю?

²⁸ Оста́ви же водоно́с свой жена́, и и́де во град, и глаго́ла челове́ком:

²⁹ Прииди́те и ви́дите Челове́ка, И́же рече́ ми вся, ели́ка сотвори́х, еда́ Той есть Христо́с?

³⁰ Изыдо́ша же из гра́да и грядя́ху к Нему́.

³¹ Между́ же сим моля́ху Его́ ученицы́ Его́, глаго́люще: Равви́, яждь.

³² Он же рече́ им: Аз бра́шно и́мам я́сти, его́же вы не ве́сте.

³³ Глаго́лаху же ученицы́ к себе́: еда́ кто принесе́ Ему́ я́сти?

³⁴ Глаго́ла им Иису́с: Мое́ бра́шно есть, да сотворю́ во́лю Посла́вшаго Мя и совершу́ де́ло Его́.

³⁵ Не вы ли глаго́лете, я́ко еще́ четы́ри ме́сяцы суть, и жа́тва прии́дет? Се, глаго́лю вам: возведи́те о́чи ва́ши и ви́дите ни́вы, я́ко пла́вы суть к жа́тве уже́.

³⁶ И жняй мзду прие́млет и собира́ет плод в живо́т ве́чный, да и се́яй вку́пе ра́дуется и жняй.

³⁷ О сем бо сло́во есть и́стинное, я́ко ин есть се́яй, и ин есть жняй.

³⁸ Аз посла́х вы жа́ти, иде́же вы не труди́стеся, ини́и труди́шася, и вы в труд их внидо́сте.

³⁹ От гра́да же того́ мно́зи ве́роваша в Онь от самаря́н, за сло́во жены́ свиде́тельствующия, я́ко рече́ ми вся, ели́ка сотвори́х.

⁴⁰ Егда́ у́бо приидо́ша к Нему́ самаря́не, моля́ху Его́, дабы́ пребы́л у них, и пребы́сть ту два дни.

⁴¹ И мно́го па́че ве́роваша за сло́во Его́.

⁴² Жене́ же глаго́лаху, я́ко не ктому́ за твою́ бесе́ду ве́руем, са́ми бо слы́шахом и ве́мы, я́ко Сей есть вои́стинну Спас міру, Христо́с.

⁴³

По двою́ же дню́, изы́де отту́ду, и и́де в Галиле́ю:

⁴⁴ Сам бо Иису́с свиде́тельствова, я́ко проро́к во свое́м оте́чествии че́сти не и́мать.

⁴⁵ Егда́ же прии́де в Галиле́ю, прия́ша Его галиле́ане, вся ви́девше, я́же сотвори́ во Иерусали́мех в пра́здник: и ти́и бо приидо́ша в пра́здник.

⁴⁶ Прии́де же па́ки Иису́с в Ка́ну Галиле́йскую, иде́же сотвори́ во́ду в вино́. И бе не́кий царе́в муж, его́же сын боля́ше в Капернау́ме.

⁴⁷ Сей слы́шав, я́ко Иису́с прии́де от Иуде́и в Галиле́ю, и́де к Нему́ и моля́ше Его́, да сни́дет и исцели́т сы́на Его́, хотя́ше бо умре́ти.

⁴⁸ Рече́ у́бо Иису́с к нему́: а́ще зна́мений и чуде́с не ви́дите, не и́мате ве́ровати.

⁴⁹ Глаго́ла к Нему́ царе́в муж: Го́споди, сни́ди, пре́жде да́же не у́мрет отроча́ мое́.

⁵⁰ Глаго́ла ему́ Иису́с: иди́, сын твой жив есть. И ве́рова челове́к словеси́, е́же рече́ ему́ Иису́с, и идя́ше.

⁵¹ А́бие же входя́щу ему́, се раби́ его́ срето́ша его́ и возвести́ша ему́, глаго́люще, я́ко сын твой жив есть.

⁵² Вопроша́ше у́бо от них час, в кото́рый легча́е ему́ бысть, и ре́ша ему́, я́ко вчера́ в час седмы́й оста́ви его́ огнь.

⁵³ Разуме́ же оте́ц, я́ко той бе час, во́ньже рече́ ему́ Иису́с, я́ко сын твой жив есть, и ве́рова сам и весь дом его́.

⁵⁴ Сие́ па́ки второ́е зна́мение сотвори́ Иису́с, прише́д от Иуде́и в Галиле́ю.

Глава 5

¹ По сих же бе пра́здник иуде́йский, и взы́де Иису́с во Иерусали́м.

² Есть же во Иерусали́мех на О́вчей купе́ли, [133] я́же глаго́лется евре́йски Вифесда́, [134] пять притво́р иму́щи.

³ В тех слежа́ше мно́жество боля́щих, слепы́х, хромы́х, сухи́х, ча́ющих движе́ния воды́.

⁴ А́нгел бо Госпо́день на вся́ко ле́то схожда́ше в купе́ль и возмуща́ше во́ду, и и́же пе́рвее вла́зяше по возмуще́нии воды́ здрав быва́ше, яце́м же неду́гом одержи́мь быва́ше.

⁵ Бе же ту не́кий челове́к, три́десять и осмь лет имы́й в неду́зе свое́м.

⁶ Сего́ ви́дев Иису́с лежа́ща и разуме́в, я́ко мно́га ле́та уже́ имя́ше в неду́зе, глаго́ла ему́: хо́щеши ли цел бы́ти?

⁷

Отвеща́ Ему́ неду́жный: ей, Го́споди, челове́ка не и́мам, да егда́ возмути́тся вода́, вве́ржет мя в купе́ль, егда́ же прихожду́ аз, ин пре́жде мене́ сла́зит.

⁸ Глаго́ла ему́ Иису́с: воста́ни, возми́ одр твой и ходи́.

⁹ И а́бие здрав бысть челове́к, и взем одр свой и хожда́ше. Бе же суббо́та в той день.

¹⁰ Глаго́лаху же жи́дове исцеле́вшему: суббо́та есть, и не досто́ит ти взя́ти одра́ твоего́.

¹¹ Он же отвеща́ им: И́же мя сотвори́ це́ла, Той мне рече́: возми́ одр твой и ходи́.

¹² Вопроси́ша же его́: кто есть Челове́к реки́й ти, возми́ одр твой и ходи́?

¹³ Исцеле́вый же не ве́дяше, Кто есть, Иису́с бо укло́нься, наро́ду су́щу на ме́сте.

¹⁴ Пото́м же обре́те его́ Иису́с в це́ркви и рече́ ему́: се здрав бысть, ктому́ не согреша́й, да не го́рше ти что бу́дет.

¹⁵ И́де же челове́к и пове́да иуде́ом, я́ко Иису́с есть, и́же мя сотвори́ це́ла.

¹⁶ И сего́ ра́ди гоня́ху Иису́са иуде́е и иска́ху Его́ уби́ти, зане́ сия́ творя́ше в суббо́ту.

¹⁷ Иису́с же отвещава́ше им: Оте́ц Мой досе́ле де́лает, и Аз де́лаю.

¹⁸ И сего́ ра́ди па́че иска́ху Его́ иуде́е уби́ти, я́ко не то́кмо разоря́ше суббо́ту, но и Отца́ Своего́ глаго́лаше Бо́га, ра́вен Ся творя́ Бо́гу.