Читаем Полный Тропарион. Том II полностью

Полный Тропарион. Том II

Христо́вою любо́вию уязви́вся, преподо́бне,/ во след Его́ невозвра́тно ше́ствовал еси́,/ посто́м и воздержа́нием плотски́я стра́сти умертви́л еси́,/ бде́нием же и моли́твами вселука́ваго врага́ до конца́ низложи́л еси́/ и слеза́ми, я́ко елее́м, свещу́ све́тлу себе́ угото́вал еси́;/ те́мже в Небе́сныя оби́тели невозвра́тно вшел еси́,/ иде́же, ра́дуяся, Го́сподеви предстои́ши,/ Ему́же приле́жно моли́ся, мо́лим тя,/ я́ко да ми́лостив нам бу́дет в день стра́шнаго Его́ прише́ствия,/ и да не пребу́дем и мы вне черто́га Христо́ва,/ но да сподо́бит ны одесну́ю Себе ста́ти/ моли́твами твои́ми, преподо́бне, да зове́м ти:/ ра́дуйся, Богому́дре о́тче наш Ти́хоне.

Величание

Ублажа́ем тя,/ преподо́бне о́тче Ти́хоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

17/30 Мучеников Мануила, Савела и Исмаила (362). Преподобных Никиты, Кирилла, Никифора, Климента и Исаака, братьев Алфановых, Новгородских (Сокольницких) (XIV).

Тропарь мученикам Мануилу, Савелу и Исмаилу, глас 4

Му́ченицы Твои́, Го́споди... (общий мученикам).

Кондак, глас 2

Ве́рою Христо́вою уя́звлени, всеблаже́ннии,/ и Сего́ ве́рно испи́вше ча́шу,/ пе́рсская служе́ния и де́рзость на зе́млю низложи́сте,/ Тро́ицы равночи́сленнии,/ моли́твы творя́ще о всех нас.

Величание

Велича́ем вас,/ страстоте́рпцы святи́и Ману́иле, Саве́ле и Исма́иле,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобным Никите, Кириллу, Никифору, Клименту и Исааку, братий Алфановым, Новгородским (Сокольницким), глас 1

Послу́шаша Госпо́дня гла́са,/ до́брии рачи́тели бы́вше,/ благи́й Его яре́м на ся взе́мше,/ усе́рдно понесо́сте/ и по́стничества путь дости́гше,/ преподо́бнии отцы́, святи́и чудотво́рцы,/ во́ини Небе́снаго Царя́ Христа́,/ Ники́то, Кири́лле, Ники́форе, Кли́менте и Исаа́кие,/ сего́ ра́ди от Вседержи́тельныя десни́цы/ венцы́ неувяда́емыми увязо́стеся*, и Небе́сною сла́вою оде́ястеся,/ и чудотворе́нии обогати́стеся,/ те́мже и о нас моли́ти не преста́йте,/ да полу́чим ве́чных благ,/ мы же си́це взыва́ем:/ сла́ва Да́вшему вам к по́двигу кре́пость,/ сла́ва Венча́вшему вас,/ сла́ва Даю́щему ва́ми всем исцеле́ния.

Кондак, глас 8

Благода́ть прие́мше исцеле́нием,/ простира́ете здра́вие су́щим в боле́знех,/ преподо́бнии отцы́ и чудотво́рцы сла́внии,/ Ники́то чу́дне, и Кири́лле блаже́нне, и Ники́форе прече́стне,/ Кли́менте свя́те и Исаа́кие преподо́бне,/ но моли́твами ва́шими проти́вных шата́ние* разори́те,/ и боле́зни на́ша исцели́те,/ и грехо́в проще́ние испроси́те,/ да благода́рне воззове́м вам:/ ра́дуйтеся, Вели́кому Новугра́ду похвала́ и утвержде́ние.

Величание

Ублажа́ем вас,/ преподо́бнии отцы́ Ники́то, Кири́лле, Ники́форе, Кли́менте и Исаа́кие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

18/1 Мученика Леонтия (70–79). Преподобного Леонтия, канонарха Печерского, в Дальних пещерах почивающего (XIV). Боголюбской иконы Божией Матери в Боголюбове, Владимирской области (1157). Чтимые списки с Боголюбской иконы Божией Матери: Зимаровская (XIII), Московская (1157), Угличская (1654), Юрьевская (1771), Тульская (1771), Козловская (1771), Елатемская (1771), Усманская (1831), Тарусская (1848 и 1870). Иконы Божией Матери, именуемой «Свято-Крестовская» (1995).

Тропарь мученику Леонтию, глас 4

Му́ченик Твой, Го́споди... (общий мученику).

Кондак, глас 3

Мучи́телей посрами́л еси́ лука́вая кова́рства/ и е́ллинов обличи́л еси́ безбо́жное служе́ние,/ возсия́л еси́ богоразу́мие всем челове́ком, уче́ньми благоче́стия,/ богому́дре му́чениче;/ сего́ ра́ди твою́ па́мять почита́ем любо́вию,/ прему́дре Лео́нтие.

Величание

Велича́ем тя,/ страстоте́рпче святы́й Лео́нтие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Леонтию, канонарху Печерскому, в Дальних пещерах почивающему, глас 3

Всечестны́й канона́рше Лео́нтие,/ правилонача́льный бы́вый в це́ркви/ и в пра́виле и́ночестем возсия́вший све́тло,/ моли́ Христа́ Бо́га,/ да прегреше́ний оставле́ние/ пода́ст душа́м на́шим.

Кондак, глас 1

Канона́ршествуя, честны́й канона́рше Лео́нтие,/ и пе́ние церко́вное пою́щим предводи́тельствуя в це́ркви,/ уподо́бился вои́стину а́нгелам,/ пою́щим Бо́га на Небеси́,/ и́хже и житию́ подража́я и с ни́ми лику́я,/ помина́й ны, любо́вию хва́лящих тя.