Полный Тропарион. Том II

Дво́ице свята́я,/ правилонача́льная, бы́вшая в це́ркви/ и в пра́виле и́ночестем возсия́вшая све́тло,/ всечестни́и канона́рси,/ моли́те Христа́ Бо́га,/ да прегреше́ний оставле́ние пода́ст душа́м на́шим.

Ин кондак, общий, глас 1

Канона́ршествующе, честни́и канона́рси,/ и пе́ние церко́вное пою́щим предводи́тельствуще в це́ркви,/ уподо́бистеся вои́стинну а́нгелом,/ пою́щим Бо́га на Небеси́, и́хже житию́ подража́вше,/ и, с ни́ми ны́не лику́юще,/ помина́йте ны, любо́вию хва́лящих вас.

Величание

Ублажа́ем тя,/ преподо́бне о́тче Лео́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Боголюбская» («Боголюбивая»), глас 1

Боголюби́вая Цари́це,/ Неискусому́жная Де́во, Богоро́дице Мари́е!/ Моли́ за ны Тебе́ Возлюби́вшаго/ и Ро́ждшагося от Тебе́ Сы́на Твоего́, Христа́ Бо́га на́шего,/ пода́ти нам оставле́ние прегреше́ний,/ ми́рови мир, земли́ плодо́в изоби́лие,/ па́стырем святы́ню/ и всему́ челове́чу ро́ду спасе́ние./ Гра́ды на́ша и всю зе́млю Росси́йскую от нахожде́ния иноплеме́нных заступи́/ и от междоусо́бныя бра́ни сохрани́./ О Ма́ти, Боголюби́вая Де́во!/ О Цари́це всепе́тая!/ Ри́зою Свое́ю покры́й нас от вся́каго зла,/ от ви́димых и неви́димых враг защити́/ и спаси́ ду́ши на́ша.

Ин тропарь, глас тойже

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская Наде́ждо и Засту́пнице,/ печа́льных Утеше́ние, ненаде́ющихся и отча́явшихся ско́рое Наде́яние!/ Мо́лим Тя, ми́лостива бу́ди нам, гре́шным,/ и не оста́ви раб Свои́х,/ и не отри́ни моле́ния ве́рных,/ в скорбе́х и бе́дах пред честны́м о́бразом Твои́м избавле́ния тре́бующих./ О Влады́чице, блага́я Помо́щнице!/ Ри́зою Твое́ю честно́ю нас защити́ и от всех зол изба́ви,/ моля́щи Сы́на Твоего́, Христа Бо́га на́шего,/ да спасе́т ду́ши на́ша, я́ко Милосе́рд.

Кондак, глас 3

Де́ва днесь предстои́т Сы́ну,/ ру́це Свои́ к Нему́ простира́ющи,/ святы́й князь Андре́й ра́дуется,/ и с ним Росси́йская страна́ торжеству́ет,/ нас бо ра́ди мо́лит Богоро́дица Преве́чнаго Бо́га.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ его́же благове́рный князь Андре́й даде́ нам на враги́ в побе́ду/ и всем ве́рным во спасе́ние.

Тропарь Божией Матери ради иконы Ее, именуемой «Свято-Крестовская», глас 1

Чрез святу́ю Твою́ ико́ну, я́вленную на Кавка́зе, о Влады́чице,/ лю́ди гра́да Свята́го Креста́/ от стра́шнаго ага́рянскаго нападе́ния чуде́сно свободи́ла еси́,/ Блага́я Врата́рнице!/ Плене́ние, скорбь и у́зы/ в ра́дость и свобо́ду премени́ла еси́,/ Скоропослу́шнице на́ша./ Мо́лим Тя, Ма́терь Бо́жия,/ и на бу́дущее вре́мя защища́й всех,/ на Кавка́зе живу́щих чад Твои́х,/ от восстаю́щих и оби́дящих нас,/ непреста́нно моля́щеся у Креста́ Сы́на Твоего́, Всенепоро́чная.

19/2 Апостола Иуды, брата Господня (ок. 80). Святителя Иова, первого патриарха Московского и всея Руси (1607). Преподобного Паисия Великого (V). Преподобного Варлаама Пинежского, Важского, Шенкурского (1462). Преподобного Паисия Хилендарского, Болгарского (после 1762).

Тропарь апостолу Иуде, брату Господню, глас 1

Христо́ва тя сро́дника, о Иу́до, ве́дуще, и му́ченика тве́рда,/ свяще́нно восхваля́ем, пре́лесть попра́вша, и ве́ру соблю́дша./ Те́мже днесь всесвяту́ю твою́ па́мять пра́зднующе,/ грехо́в разреше́ние моли́твами твои́ми прие́млем.

Ин тропарь, глас тойже

Чистоту́ душе́вную и житие́ непоро́чно стяжа́в,/ Пречи́стаго Све́та, нам прибли́жшагося, быв по пло́ти брат и учени́к,/ благоче́стия пропове́дник и язы́ком учи́тель и́стинный,/ Иу́до всехва́льне,/ моли́ Христа́ Бо́га,/ да спасе́т ду́ши на́ша.

Кондак, глас 2

Тве́рдым умо́м избра́н учени́к ты яви́лся еси́/ и столп необори́м Це́ркве Христо́вы,/ язы́ком пропове́дал еси́ сло́во Христо́во,/ ве́ровати глаго́ля во еди́но Божество́,/ от Него́же просла́вився, прия́л еси́ дар исцеле́ний,/ цели́ти неду́ги притека́ющим к тебе́,/ апо́столе Иу́до всехва́льне.

Ин кондак, глас тойже

Па́влу я́влься собесе́дник, апо́столе,/ с сим нам про́поведь возвести́л еси́ Боже́ственныя благода́ти,/ тайноглаго́льниче, Иу́до блаже́нне;/ сего́ ра́ди вопие́м ти:/ не преста́й моля́ся о всех нас.

Величание

Велича́ем тя,/ апо́столе Христо́в Иу́до,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь святителю Иову, первому патриарху Московскому и всея Руси, глас 3

Да торжеству́ет Це́рковь Христо́ва/ и да ра́дуется град Москва́,/ я́ко возсия́ свети́льник земли́ Росси́йския,/ во испове́дании и́стины непоколеби́мый И́ов патриа́рх,/ его́же моли́твами, Го́споди,/ вся собла́зны ми́ра сего́ и е́реси искорени́,/ лю́ди во благоче́стии наста́ви/ и утверди́ в Правосла́вии.

Ин тропарь, глас 5