Том 10 (XVI век, литература «государственного устроения»)

От града же поприще на западную страну над Удолию Плачевною на горе стоитъ село Скудельниче в погребение страннымъ,[254] что откуплено кровию Господа нашего Исуса Христа. О томъ бо глаголетъ Писание: «Егда преда Июда Господа нашего Исуса Христа пребеззаконнымъ июдеемъ на тридесятих сребреницех, и тогда Господь нашь Исусъ Христосъ вольную страсть подьят нашего ради спасения от беззаконых июдей. Тогда завеса церковная раздрася надвое,[255]

и солнце померче, и камение распадеся. И нападе страх на беззаконнаго Июду и рече в собе Июда: «Согреших, продах кровь неповиную». И шедъ в церьковь поверже сребряники и шед удавися. Пребеззаконнии же июдеи реша: «К собе недостоитъ намъ техъ сребрениковъ положити в корнаву, сииречь в казну, но понеже цена крове есть». И купиша ими село Скудельниче в погребение страннымъ. А которые правоверные християне приходят от всех странъ, от востока и до запада поклонитися гробу Господа нашего Исуса Христа и святымъ местомъ; и которому пришельцу иных странъ лучитца отоити к Господу, и тех християнъ кладутъ в том селе Скудельниче. Аще ли будетъ инок в которомъ монастыре пришелецъ со иные страны, а лучитца отоити к Богу, и ис того монастыря приносятъ в то же село. А ерусалимца в томъ селе не положатъ никого. В томъ селе ископанъ погреб каменной в горе, кабы пещера, и дверцы малы ученены. И в томъ погребе пределана кабы закрома два, а кладутся християне в томъ погребе без гробовъ на земли. И егда положатъ християнина праведнаго или грешнаго, и лежит то тело его 40 дней цело и мяхко, а смрада от него нетъ. И егда исполнится 40 дней, то об одну нощь тело его земля будетъ, а кости наги станут. И пришед тотъ человекъ, которой в томъ селе живетъ, землю ту зберетъ лопатою во единъ закромъ, а въ другой закромъ кости.[256]

А кости целы и до сего дни; а земля аки голуба. И егда кто от православных приидет помолитися и не велятъ никому ис того села мощи имати ничто же. Аще который человекъ возьметъ втай от мощей тех и егда приидетъ в корабль на море, тогда корабль на море ити не можетъ. И учнутъ турки обыскивати християнъ и аще что найдутъ от тех костей, и ввергутъ того в море совсем, а корабль его пойдетъ своим путемъ. И того ради не взимаютъ то того села ничто же, понеже не повелено бе.

А от Ерусалима до того села поприще едино, а от Скудельнича села близь того иже Удоль Плачевная течетъ на полуденную страну, тотъ стоитъ домъ пустъ святого праведнаго Иева,[257] и до сего дни, да кладезь его же, камен, пределанъ надвое. А воды в нем нетъ ныне. И пошла та Удоль под лавру святого Савы Освещеннаго и в Содомское море.[258]

И тою Удолию, сказываютъ, хощетъ течи река огняна в день Страшного Суда. Да на томъ же потоке Силуямля купель, где слепецъ умывся и прозре, а Силуямля купель под горою под каменною. А вход к ней — учинена лестьвица каменна велика, какъ в походной погребъ, а ступеней 50, а по конецъ лествицы самая купель Силуямля, аки кладязь, в груди человеку глубина. И приходятъ многие люди, одержими всякими недуги различными и погружаются в той купели и здрави бываютъ.[259] А идетъ ис тое купели вода сквозе каменную гору разселиною каменною. А за горою ручей воды великъ, а на томъ ручью платье моютъ. А от града Иерусалима до купели поприще едино. Мы же воспросихомъ: «От коей купели, откуду есть?» И поведаша намъ людие: «Егда возврати Господь от Вавилона пленение сыновъ иизраилевъ и плен Сион, прииде Иеремеия пророкъ, весь пленъ с нимъ онъ на тот потокъ, и жаден бысть Иеремеия и весь пленъ. И помолися Иеремеия Богу и дастъ ему Господь в той купели воду».[260]

А рекъ и кладезей во Иерусалиме не бысть, бе бо место безводно, токмо едина купель Силуямля. А воду ис той купели арапи возятъ во град Иерусалимъ на верьблюдах, да продаютъ. А которые люди убогие, и те питаются дождевою водою. А дождь во Иерусалиме приходитъ с Семена дни[261] септеврия месяца и до Рожества Христова, а зимою и летомъ дождя не бываетъ. А егда падетъ дождь на храмех ихъ, а храмины у них учинены плоские верьхи, и со всех храминъ в коемждо дому приведены застрехи в кладязь. А кладязи высечены в каменней земли, а земля каменна. И в тех кладязях стоитъ вода во весь год, а вода не портится. А вода у них бела дождевая, а не желта.

А вышед из града во врата и мало пошед от воротъ, что к селу Гепсимании, и в полугоре лежитъ камень. На томъ камени изсядеся на камени потоки тое крови, знать и до сего дни, на память православию; а емлютъ тое крови и с каменемъ на мощи християне для благословения.

О селе Гепсимании[262]