Том 9 (Конец XIV - первая половина XVI века, подъем общественного значения литературы)

Услышим же и ино ихъ богоугодно и спасително умышление, его же умыслишя на съвръшено искоренение всякого злаго и худаго ихъ обычая. Заповедь дана бысть от игумена сущим у них священником и диаконом назирати другъ друга въ всю седмицу, где и въ чемъ кто съгрешилъ есть въ слове или въ ином некоемъ бесчинии, и сицево прегрешение възвещати игумену. Вечеръ убо всякыя суботы по нефимоне[601] събирает игуменъ всех въ учененом некоемъ притворе. И събравшимся имъ, первее творит учение духовно новоначалникомъ

[602] и прочим простымъ братиямъ и, научивъ ихъ довольно, отпущаеть когождо въ келию его съ млъчаниемъ многым и безмлъвиемъ. Оставшеи же у него священници и диакони, научени бывше и они доволно от него, повелеваеми бывають открыти комуждо ему, аще в чем виде некоего съгрешивша: или въ слове, или въ смесе бесчинномъ, или яростию, или инымъ кыимъ сицевымъ прегрешениемъ. И открывшим ему съгрешенная имъ по всей седмици, сицевою епитемиею и исправляеть ихъ: повелеваеть имъ приклонится на коленех на землю и правое плечо свое обнажити. И повеленое абие сътворшимъ, инокъ единъ, повелевшу игумену, имея въ десней руце прутие строгано, въ образе веника, ходить по ряду, бия ихъ по нагу плеча, глаголющих 50 псалом. И сице отпущаются съ благословениемъ въ своя ихъ келия.

Познавше убо, как и откуду даются имъ вседневныи колачи, ныне же услышим, откуду прибываеть и прочая потребная брашна по Божию промыслу. Градовом жителие от многаго их егоже имут к нимъ благоговеиньства и любви за богоугодное пребывание и жительство ихъ — овъ убо бочку вина, овъ же елеа, овъ же рыбы, овъ же сыры и яйця посылають имъ. Инъ же некый, въ нужу некую и беду пад, приносить имъ кормъ, моливъ игумена, да велит сущимъ подъ рукою его братиямъ помолитися Господеви о немъ, да избавить его Господь от яже чает на себе скорби. И въ время обеда игуменъ глаголеть въ услышание всем: «Питавый нас днесь молит вас молитися Богу, яко да избавить и Господь от нужди его и печали, еяже чаетъ на себе. Помолитеся убо о немъ прилежно, кождо въ келии своей!» И преподобными молитвами ихъ избывъ онъ печали, еяже чаялъ на себе, пакы обилно прилагаеть имъ яже на потребу.

Предобре убо и премудре обещалъ священным своимъ ученикомъ человеколюбивый, рекъ: «Взыскуйте преже царствия Божия и правды его, и сия вся приложатся вамъ».[603] Сего ради и тии, поне же царствие Божие, сиречь спасение свое и ближних своихъ, прилежно и якоже богоугодно взыскують учении всякыми и частыми, яже от божественых Писаний, себе же и послушающая ихъ спасають, въ лепоту и правду и человеколюбивый Богъ спасаемых изобилуеть яже къ житию потребная, споспешьствующим ему въ спасение многых, «царствие Божие» от него приточне нарицаемо. Аще убо «наследие» дасться ему от Отца сущаа везде языкы и «удръжание конци земли»,

[604] якоже писано есть въ второмъ псалме; и въ ином псалме: «Въцарися Богъ надъ языкы»[605]

— како же инако царствовалъ, а не точию верою и обращениемъ еже к нему? Акы бо съдетель и промысленикъ всех царь есть выну; приемлет же царствие от Отца и яко человек, яже же сам глаголеть о себе въ втором псалме: «Азъ же поставленъ есмь царь от него».[606] Блажени убо въистину, елици възыскують растити выну ему толь прежелаемо ему царствие правдою его, сиречь прилежнымъ деланиемъ святых его заповедей, тружающеся беспрестани въ поучении и прочитании богодухновеных Писаней его, их же тайную силу съ усръдиемъ всякым простым людемъ изъясняюще и учение всяческая от себе примышляюще, плодоносять выну Владыце своему душя словесныя, уловлени дотоле от диавола. И сего ради всяко услышят от него сие «Благодать вамъ, раби добри и вернии! Въ мале явистеся верни, надо многымъ поставлю вас: внидете въ радость Господа своего».[607] Толика убо и о семъ довлеють въ славу Господа нашего Исуса Христа и на ползу, вкупе и ревность божественую, темъ, иже благодарствено слушают повести яже о благоверии. Ныне же ину некую услышим подобне душеполезную повесть, достойну памяти, подражаниа, аще убо поистине желаемъ благоугодити Господу нашему.