Том 15 (XVII век)

И приехал Еруслон к багатырской голове, и вынял из сумокъ царьской желъчь, и помаза багатыря Рохлея. И тут Рохлей жив сталъ, и с Еруслономъ поцеловались, и назвали другъ друга братомъ. И Рахлей богатырь поехал в Задонскую орду в Штютен град, по благословению отца своего женитца Вольнова царя на дщери Понарии царевны, царствовати в Штютенъ граде; и Еруслон поехал ко князю Данилу Белому в царство.

И ехал Еруслонъ год времяни, и въехалъ во градъ ночью, никто ево не слыхал и не видал. И приехал к темнице, ажно у темницы стражей всехъ прибил, и ударил в темничныя двери, и вышыб вон. И вшед в темницу, и говоритъ Еруслон Лазаревичь: «Многолетное здравие царю Картаусу и государю моему батюшку, князю Лазарю Лазаревичю с двумя-на-десяти богатырями!» И говоритъ ему царь Картаус: «Человече, отъиди прочь от нас, не пролыгайся[1093]!» И говоритъ имъ Еруслон Лазаревичь: «Язъ, государь, не пролыгаюся! Куды вы меня послали, и я вамъ ту службу сослужил, и желчь из его вынял».

И зговоритъ ему царь Картаусъ: «Человече! Коли ты Еруслон называешыся, и службу нашу сослужил, Вольново царя убил и из него желчь вынялъ, — и ты тою желчию помажь намъ очи, и мы светъ Божий увидимъ, и тебя, Еруслон, увидимъ, и веру тебе поимем».

И Еруслон царю очи помазал, и отцу своему князю Лазарю Лазаревичю, и двоюнадесяти богатырям очи помазал: и они светъ Божий узрили, и Еруслона увидели, и возрадовались радостию великою.

И какъ утренняя заря заиметца, и Еруслон вышел из темницы вон, и садился на своего доброго коня, и поехал по граду. И не ясенъ соколъ напущаетца на гуси и на лебяди, напущаетъца Еруслон Лазаревичь на мурзы и на татары; прибил, и присекъ, и конемъ притоптал мурзъ и татаръ 170 000, а черных людей и младенцовъ в девять летъ — въ крещеную веру привел и крестъ целовати за царя Картоуса велелъ, а свою имъ татарскую веру велелъ проклинать. И велелъ бити челомъ царю Картоусу, а князь Лазарь Лазаревичь княземъ былъ, а дванадесять багатырми быть. А князя Данила Белого, поимав, сослал в монастырь, и велелъ пострищи, и дал ему наказание. А за тое его убилъ, что он мать его убилъ, княгиню Епистимию.

И покушал Еруслонъ хлебца у царя маленько, Картоуса, и простился с царемъ, и со отцемъ своимъ, и з богатырми, и со всеми людми, и вселъ на свой добрый конь, и поехал ис царства вон. Царь Картоус и отецъ ево князь Лазарь, много со слезами унимали: «Живи ты у нас, Иеруслонъ Лазаревичь, Божие да твое царство, владей имъ, а от нас прочь не отъезжай!»

И Еруслон поклонился царю Картаусу, и со отцемъ своимъ простился, и поехалъ ко граду Дербию, ко царю Варфоломею, а хощетъ видети прекрасную царевну Натасию Варфоломеевну; а в те поры Еруслону минуло двенатъцать летъ.

И едетъ месяцъ, и другой, и 3-й, и доехал Еруслонъ до царства Варфоломеева. Ажно под темъ царствомъ езеро велико, и в томъ езере лютое чюдо о трехъ головах, на всякъ день выходитъ на берегъ и поедаетъ многия люди. А царь Варфоломей велитъ на всякъ день кличь кликать, чтобы Богъ послал такова человека, кой бы в езере чюдо извелъ, «а язъ бы ему много далъ городов, и казны довольно ему, и коней добрых, и людей ему на службу, сколько ему надобно».

И вьехал Еруслон во град, и стал на дворе у вдовы. И услышал Еруслон кличь царьский, что много чюдо людей поедаетъ. И селъ Еруслонъ на свой доброй конь, и поехал к езеру.

И услышало чюдо, что приехал Еруслонъ, и выскочило вон; конь испугался, пал на окарачки, и Еруслонъ свалился с своего добра коня на землю, и ухватило ево чюдо, и поволокло во езеро. Еруслонъ ухватилъ мечь свой, — а доброй конь ево остался на брегу, и влез Еруслонъ чюду на спину, и отсекъ Еруслон у чюда две головы, и хощетъ третьюю голову отсечь.

И возмолилось чюдо: «Государь Еруслон Лазаревичь! Не дай смерти, дай живота! По сей день из езера не выйду, и людей есть не стану, а стану есть рыбу и тину, и траву болотную, а тебе дамъ подарокъ велий: есть у меня камень самоцветной, и язъ тебе отдамъ».

И говоритъ Еруслон: «Чюдо, аще ты мне камень отдашь, язъ тебя спущу жива». И пошло чюдо во езеро, — а Еруслон все на нам седелъ, — и взял у чюда камень самоцветной, и велелъ вынести из езера на брегъ. И Еруслон снял с чюда третию голову и селъ на свой доброй конь и поехал во градъ Дербию.

Ажно встречаетъ ево царь Варфоломей въ воротах градных, и Еруслон Лазаревичь не доезжаючи царя, слазитъ с своего добра коня, бьетъ челомъ о сыру землю: «Многолетное здравие государю царю Варфоломею! Многолетствуй, государь, во своемъ царстве, с князи и з баляры, и со всеми христианы на многие лета! Избыл еси твоего града губителя!»

И зговоритъ ему царь Варфоломей, и все возрадовались радостию великою, и емлетъ Еруслона за руку за правую, и целуетъ его во уста сахарныя, а самъ зговоритъ таково слово: «Ведаю язъ, Божий человекъ, не хотя Господь смерти грешникомъ, хотя нашъ град от таковаго губителя спасти, посланно за тобою, храбрымъ воиномъ. И как тебя зовутъ по имени, и откуда тебя сюды Богъ занес, и какова отца сынъ и матери?»