Том 6 (XIV - середина XV века, литература времени национального подъема)

Послушайте же толкование сего правила что глаголеть. Святительское достояние Святаго Духа благодать, даръ мнети подобает. Како убо дерьзнеть кто благодать духовную яко наследие предати кому дарованиемъ? Сего ради непрощено есть епископомъ в себе место ихже хотять въ своих церквахъ поставляти и посажати. Котории бо яже стяжаша имения въ своего епископьства времени не имут власти оставляти имже хотят, но токмо яже от наследия сродниковъ пребываша имъ, якоже 32 правило иже въ Карфагени сбора рече, то и како самую епископью ко инымъ предадять яко наследникомъ своимъ пастырьскыя власти и строения нищихъ, имения оставляющих, и, пристрастия ради человечьскаго, или дружбы, или любве ради сродничьныя, яже Богови освящена суть подаровають имже хотять? Аще убо от некоего таковое что створится, створеному бо разрушену быти правила повелевають, створивый же отлученъ да будеть. Епископъм бо от сборовъ поставлятися повелено бысть.

И 23 правило Антиохийскаго сбора тако глаголеть: «Не подобаеть епископу, аще и на конець жития своего, иного оставляти наследника в себе место». Се же и израильтяномъ отречено бысть. На Моисиа бо яко вину въскладають, зане Арона и сынъ его на священничьство възведе. И аще бы Богъ не знамениемъ священьничьство их укрепилъ, изгнани быша были святительства.

И смотри же и святыхъ апостолъ правило 29-е что глаголеть: «Аще который епископъ мьзды ради сана святительскаго приобрящеть, или прозвитеръ, или диаконъ, да отлучится и самъ, и поставивый его, и да отсеченъ будеть от святаго причастия оттинудъ, яко Симонъ вълхъвъ мною, Петромъ».[785]

Тожде глаголеть и 30-е правило техъ же святыхъ апостолъ. Глаголеть сице: «Аще который епископъ мирьскых князий помощию святительство приобрящеть, да изверженъ и отлученъ будеть, и способници ему вси».

Назнаменати лепо есть: когда двоицею

казненъ бываеть вкупе священникъ, или паче — по святемь Генадии патриархи Новаго Рима[786] — трижда вкупе?

Слышите и толкование тому же — въ 25-мь правиле речено бысть: «Не подобаеть двократы мъщати о единомъ». Сде же и въ обою правилу сею сугубо наводить казни злобы ради преумножения и прегрешениихъ тяжести.

Ничтоже есть убо злейшее сего, еже божественое дарование куплением себе приобретаеть, мьздою или силою княжьскою. Такоже и продаяй то яко раба вменяеть Святаго Духа даръ. Якоже въ сборномъ послании Тарасьеви, святейшаго патриарха Костянтинаграда,[787] к папе старейшаго Рима Андреянови[788] тако писано есть: «Отраднее будеть Макидонию и прочимъ духоборцемъ, неже симъ; они бо тварь и раба Божия и Отца Святаго Духа блядословяху, а сии раба себе створять Его; еже бо аще кто продаеть, и купляй его владыка хощеть быти купимому, ценою бо сребреною притяжаваеть то».

Тако бо суть непрощена прегрешения такова! И того ради купующеи и продающеи мьздою или силою княжьскою святительство — и обои извержени и от церкви оттинудъ отлучени и изгнни бывают. Святаго же патриарха Генадия послание и проклятиемъ таковыа осужаеть, сице бо глаголеть: «Да будеть отреченъ таковый и всякого священьскаго достояния же и службы лишенъ и проклятию и анафеме преданъ будеть. И приемляй куплению благодать Святаго Духа, и продаваяй — аще клирикъ, аще простець — да будеть проклят».

Се слышите правила и заповеди святых апостолъ и святых отець. Кто же христианни и святымъ именемъ Христовымъ именуяся, смееть дрьзнути инако глаголати? Зане пишеть въ Святемъ писании, яко: «Вся, яже чресъ церковнаго предания и учительства и въображениа святых и приснопамятных отець обнавляема и творима или по семъ сдеятися хотяща, анафема да будеть». И по другихъ глаголех, яко: «Иже в небрежение полагающимъ священная и Божественная правила блаженых отець нашихъ, иже святую церковь утвержають и, все христианьское жительство украшающе, къ божественому наставляють благоговеньству, анафема да будеть».

Симъ сице имущимъ, как у васъ стоить на митрополице месте чернець в манатии святительской и въ клобуце, и перемонатка[789] святительская на немъ, и посох в руках[790]? И где се бещиние и злое дело слышалося? Ни в которых книгах.

Аще братъ мой преставилъся,[791] азъ есмь святитель на его место. Моя есть митрополия. Не умети было ему наследника оставляти при своей смерти. Коли слышалося преже поставления възлагати на кого святительскыя одежи, ихже нелзе иному никомуже носити, но токмо святителемъ единемъ! Како же ли смееть стояти на месте святительскомъ? Не блюдеть ли ся казни Божиа? А еще страшно и трепетно и всякиа грозы исполнено, еже створить: садится въ святомъ олтари на наместном месте! Веруйте, братия, яко лучше бы ему не родитися. И аще долготерпить Богъ и не низъпосылаеть казнь, к вечной муце готовить таковыхъ.