Том 6 (XIV - середина XV века, литература времени национального подъема)

А что клеплють митрополита, брата нашего, что он благословилъ есть его на та вся дела, тъ есть лжа. Понеже пишеть 34-е правило святыхъ апостолъ и Антиохийскаго сбора правило 9-е, съгласующе сему, глаголет бо: «Кроме болшаго своего да не творять епископи ничтоже, разве своего предела кождо, ни же болший, не сущимъ инымъ, — за единьство». Или утаилося есть намъ, како учинилося есть на смерти митрополичи? Виде грамоту, — записалъ митрополитъ, умирая. А та грамота будеть с нами на Великомъ сборе.

А се буди вамъ сведомо. Полтретия лета мне в святительстве; а как выехал есмь на Киевъ — две лете и 14 дний до сего дни,[792]

иже есть иуня месяца 23 день. Не вышло из моих устъ слово на князя на великого на Димитрия ни до ставления, ни по поставлении, ни на его княгыню, ни на его бояре. Ни доканчивалъ есмь с кимъ иному добра хотети боле его — ни деломъ, ни словомъ, ни помысломъ. Несть моеа вины пред нимъ. Паче же молилъ есмь Бога о немъ, о княгини, и о детехъ его, и любилъ есмь от всего сердца, и добра хотел есмь ему и всей отчине его. И аще кого услышалъ есмь где пригадывающа на его лихо, неневиделъ есмь его. А коли где пригажаломися сборова, ему болшее место велелъ есмь «многа лета» пети, а да потомъ инымъ.

Аще кого в полону отведена где изнашелъ есмь изъ его отчины, колка сила моя была, выимая от погани, отпускалъ есмь. Кашинцевъ нашолъ есмь в Литви, два года в погребе седящих, и княгини деля великой вынялъ есмь их како мога, клячи под них подавъ есмь и отпустилъ ихъ есмь зятю ея, князю Кашиньскому.[793]

Которую вину нашелъ есть на мне князь великий? Чимъ язъ ему виноватъ или отчине его? Язъ к нему ехал есмь благословити его, и княгиню его, и дети его, и бояръ его, и всю отчину его, и жити ми с нимъ въ своей митрополии, како и моя братия съ отцемъ его и з дедомъ, съ князьми великими. А еще с дары честными хотелъ есмь дарити. Кладет на мене вины, что былъ есмь в Литве первое.[794]

И которое лихо учинилъ есмь, бывъ тамо? Не зазри же ми никтоже, — что иму говорити.

Аще былъ есмь в Литве, много христианъ горькаго пленениа освободилъ есмь. Мнозе от невидящихъ Бога познали нами истиннаго Бога и къ православной вере святымъ крещениемь пришли. Церкви святыа ставил есмь. Христианьство утвердилъ есмь. Места церковная, запустошена давными леты, оправилъ есмь приложити к митрополии всея Руси. Новый Городок литовьскый давно отпал, и яз его оправилъ и десятину доспел к митрополии же и села. В Велыньской же земли такоже: колько лет стояла Володимерьская епископиа безъ владыки, запустошала; и язъ владыку поставилъ и места исправилъ. Такоже отприснаа села софийская отпала къ князем и к бояромъ, и язъ тых доискываюся. И оправдаю, чтобы по моей смерти было кого Богъ оправдаеть.

Буде вамъ сведомо, что брату нашему Одеюрееви мивропродиву[795]

не волно было сласти ни в Велыньскую землю, ни в Литовьскую[796] владыку которого, или звати, или дозрети которое дело церковное, или поучитити, или посварити на кого, или казнити виноватаго — или владыку, или архимандрита, или игумена — или князя поучити, или боярина. Святительскымъ недозираниемъ которыйждо владыко, не блюдася, по своей воли ходилъ какъ хотелъ. А попове и черньци и вси христиане — какъ животина бес пастуха.

Ныне же, Божиею помощью, нашим потружаниемъ, оправилося церковное дело. И годилося князю великому нас с радостию прияти, занеже в томъ болша ему честь. Язъ потружаюся отпадшая место приложити к митрополии и хочю укрепити, чтобы до века такъ стояло на честь и на величьство митрополии. Князь же великий гадает двоити митрополию. Которое величьство прибудеть ему от гадкы? Хто же ли се пригадываеть ему?

Которая есть моя вина перед княземъ перед великимъ? Надеяся на Бога: не найдеть въ мне вины ниединыя. И аще ли бы вина моя дошла которая, ни годится князем казнити святителевъ: есть у мене патриархъ, болший надъ нами, есть Великий сборъ; и онъ бы тамо послалъ вины моя; и они бы съ исправою мене не казнили. А се ныне без вины мене обещестилъ, пограбилъ, заперевъ, держалъ голодна и нага, а черньци мои на другомъ месте. Слугъ моихъ опрочь мене заточил у ночи. А слугъ моих нагихъ отслати велелъ с бещестными словесы. И хто можеть изрещи хулы, ихже на мя изрекли! Се ли въздасть мне князь великий за любовь мою и доброхотение?

Слышите же, что глаголеть сборъ святый, иже Перво-вторый именуемый, събравшися въ храме Божии Слова Премудрости, рекше въ Святей Софии. Глаголеть бо того сбора святаго правило 3-ее сице: «Аще кто от мирьскых, огосподився и преобидивъ убо божественых и царскыхъ повелений, преобидивъ же и страшных церковных обычаевъ и законоположений, дерзнеть святителя кого бити, или запрети — или виною, или замысливъ вину. — таковый да будеть проклятъ».