Том 9 (Конец XIV - первая половина XVI века, подъем общественного значения литературы)

По предиреченных же веледушна мя твориши к терпению даже до конца, светлейшими епистолии твоей совещании

во скорбехъ и противствех моихъ. Но зане человеци в сем мире, скорбемъ подлежащие, въ разнныхъ

чинехъ плавають, сего ради за провожение долгаго времени в настоящихъ такоже умыслихъ нечто тобе от малыхъ написати. И за разумъ тех спригодно то видяшеся последующи сподвигнути слово: или дело народное, или царьство, или владычьство къ своей вечности паче приемлет правду или тръпение? Аще речемъ, яко тръпение паче есть потребно к соблюдению владычества или царства, тогда вотще сложены суть законы. Тогда обычаи святые и благые уставы разърушени и въ царствехъ, в начальствех, во градехъ, сожительство человекъ живеть безъ чину, или, аще к тому всемогий Богь безвестнаа и тайная премудрости своеа открылъ кому, или вселичне мудростию упремудрилъ, или думою укрепилъ, или ратнымъ духомъ въружил, вся сиа Духу наплъняти мнимъ о блаземъ. Кто можеть противитися Богу — помилованныхъ от Бога нищетою или несмотрениемъ казнити, и где паки положимъ святого апостола Павла поучениа: «Кто, — рече, — воиньствуеть своими оброки коли?»[655]

Сиречь да царю въиньствуеть, а своими оброки довлится, а не царскими. И паки святый апостолъ Ияковъ глаголеть: «Се мзда, — рече, — делателей, делавших нивы ваша, лишена от васъ, въпиетъ; и вопиениа жавших въ уши Господа Саваофа внидоша».[656]

И аще нивы жавших и делавшихъ тацехъ кричание въ уши Господа Саваофа внидоша, мъзды не взявших, колице ми мниши болши быти великы труды подъемлящихъ за царя и за царство, и крови проливающи, и самую душу полагающе, и мъзду малу приемлюще. Аще бо под тръпениемъ жити уставиши, тогда несть треба царьству или владычьству правители и князи; престанет убо начальство, владычьство и господьство, и живется без чину; с молвою силный погнетет безсилнаго, да тръпение имать. Ниже треба будеть судей въ царстве имети, иже коемуждо правду учинят, зане тръпение вся исполънитъ, иде же въ тръпении жити будуть.