Doktoro Jivago (Libro 1)

Komarovski funis. Kontredica sentimenti aparis. Quala skandalo, quala tumulto! Il spumifis. Lua poziciono esis en danjero. Ica evento povis nocar lua reputeso. Il devis po irga preco impedar singla babilado, sufokar omna rumori, se la evento esus ja koncata. Ultre to il sentis itere, quale katenizante ica fola, desespera puerino esis. On povis vidar quik, ke el esis partikulara persono. Elua esenco esis nekustumala. Yes, il destruktabis elua vivo en nereparanta maniero. Quale el furiis, quale el rezistis e rebelis por formacar elua vivo nova, segun elua volo.

Il volis helpar, en singla pensebla maniero, forsan il aranjus chambro por el, ma il nultempe tushus el, kontree, il konservus disto, yes, il ne produktus irga ombro, qua savas, quon el facus ankore. Quala molestadin il devis expektar! Che tala aferi esis la despito sempre proxima. La lego ne dormis. Esis ankore nokto e nula du hori pasabis, e tamen aparabis policisto. Komarovski irabis kun lu al apud-chambro por klarigar ed aranjar la tota afero. Lara ne esis en direta danjero, ma judiciala exameno esus ne-evitebla.

96

Naturala, il impedus to per omna forteso. Se on levus akuzo, il furnisus psikoatriala opiniono, qua pruvus, ke Lara esabis dum la ago neresponsiva. Ica opiniono efikus decido di ne-persequo.

Dum ica pripenso Komarovski divenis plu kalma. La nokto pasis. Lum-radii hastis de chambro a chambro e spionis sub tabli e sofai.

Komarovski vidis ankore unfoye aden la dorm-chambro por certigar, ke Lara esis en la sama stando. Lore il vehis a konocata advokatino, la spozino di politikala ekmigranto, Rufina Onisimovna Voit-Voitkovskaya. Elua ok-chambro-lojeyo esis nun tro granda por el ed anke tro chera. Pro to el esis pronta lugar du chambri. Komarovski lugis un chambro por Lara. Pos kelka hori on adportis Lara adibe. El esis preske sen koncio, havis febro e nervo-shoko.

2

Siorino Voit-Voitkovskaya esis progresema muliero, odiis pre-judiki ed amis omno, quo esis, segun elua vorti, „positiva e viv-kapabla".

Sur elua komodo jacis exemplero dal „Programo da Erfurt" kun autografo dal autoro. Sur fotografuro an la muro esis elua spozulo „mea bona Voit", dum festo populala en la Suisia, ensemble kun Plechanov. Amba viri portis vestoni e Panama-chapelo. Siorino Voit- Voitkovskaya desplezis ja dum la unesma regardo elua malada sub-lokacantino. El vidis en Lara maligna simulantino. La tota maladeso esis trompo. Lara ludis la fola Gretchen

en karcero.

Siorino montris elua desestimo por Lara per exaltita agemeso.

97

El lasis detonar la pordi, el kantis laute e vorticis tra la chambri, quin el aerizis singla dio. La lojeyo esis en la supra etajo di granda domo en Arbat. La fenestri en ica etajo esis plena de klare-blua cielo kam rivero kun inundo. Dum la duima vintro la lojeyo montris signi ed auguri dil printempo.

Tra la poka fenestri suflis varma sud-vento ed de la stacioni ululis la lokomotivi. La malada Lara en lito havis multe tempo por memorar pri pasinta eventi. Ofte el pensis pri la unesma vespero en Moskva, kande el arivis ek la Uralo, ante sep od ok yari dum elua infanteso.

Li vehis de la staciono en la fiakro tra la mi-obskura stradi di Moskva al hotelo. La lumo dil lanterni jetis la giboza ombro dil veturisto al dom-muri. La ombro kreskis e kreskis, atingis nenaturala grando, kovris stradi e tekti e desaparis. Lore la tota procedo komencis itere.

En la obskureso super li resonis laute la sennombra kirko-kloshi di Moskva, tramvoyo per kavali pretertumultis, ma anke la krianta spekto-fenestri e reklamo narkotigis Lara, quale se oli donus kontinua bruiso kam kloshi e roti. Sur la tablo en hotel-chambro el vidis granda melono, donaco da Komarovski e simbolo por la povo e la richeso di Komarovski. Kande Komarovski fendis per un kultelo-bato la glacioza, ronda frukto en du parti, Lara ne povis respirar, e ne riskis refuzar. Penigive el glutis la reda. aromoza peci. Komarovski esis la klefo di omna eventi, certe, ma nun il esis tote altra persono. Il postulis nulo e lasis vidar su nultempe. Nur ek la foreso il ofris sua helpo por Lara en nobla maniero.

98