Древние Литургии

Еще помянути сподоби, Владыко, и иже от века Тебе благоугодившия в род и род: святыя отцы, патриархи, пророки, апостолы, мученики, исповедники, учители, преподобныя, и всякий дух праведный в вере скончавшийся.

Помяни, Господи, архангельский глас глаголющий:

Радуйся, Благодатная, Господь с Тобою, благословенна Ты в женах и Благословен Плод чрева Твоего, яко Спаса родила еси душ наших.

Изрядно Пресвятую и Преблагословенную, Пречистую Владычицу нашу Богородицу и Приснодеву Марию.

(Диакон поминает усопших).

[хор поет «Достойно есть» и «О Тебе радуется»]

Святаго Иоанна славнаго пророка, предтечу и крестителя, святыя апостолы, святыя пророки и патриархи и праведныя, святыя мученики и исповедники.

[Святых апостол Петра и Павла, Андрея, Иакова и Иоанна, Филиппа, Варфоломея и Фому, Матфия, Иакова и Симона, Иуду, Матфея, Марка и Луку, евангелистов. Святых пророк, патриарх и праведных. Святаго Стефана перводиакона, первомученика, святых мученик и исповедник, иже за Христа Бога умучившиеся и исповедавших доброе исповедание, святых младенец, избиенных от Ирода царя.

Помяни, Господи, и святых мученик: Прокопия, Феодора, Кира, Иоанна и Георгия, Леонтия, Сергия и Вакха, Космы и Дамиана, Савиниана, Павла, Вавилу, Агафангела, Климента, Евстратия, и иже с ними мучившихся.

Помяни, Господи, и святых мученик сорок, и сорок два, и шестьдесят и три, тридесять и три, святых мироносиц жен, и святую первомученицу Феклу, и святых жен–мучениц: Татиану, Февронию, Анастасию, Евфимию, Софию, Варвару, Иулианию, Ирину, Елпидию, Епистимию, Агафию, Марию, Екатерину.

Помяни, Господи Боже, и святых отец наших, архиепископов иже во святых Иакова апостола, брата Божия и перваго архиепископа, и даже до Феофила и Никифора, Иоанна, Леонтия.

Помяни, Господи, и святых отец наших учителей: Климента, Тимофея и Игнатия, Дионисия Ириния, Петра, Григория, Александра и Евстратия, Афанасия, Василия и Григория, и Иоанна, Амвросия, Амфилохия и Ливерия, Дамаса, Иоанна, Епифания, Феофила, Целестина, Августина, Кирилла, Леонтия, Прокла, Филика, Протаса, Ермиса. Евлогия, Ефрема, Анастасия, Феодора, Мартина, Агафона, Софрония.

Помяни, Господи, всех святых преподобных отец: Антония, Пахомия, Макария, Пимена, Аркадия, Савву, Евфимия, Онуфрия, Пафнутия, Анастасия, Косьму и Иоанна.

Помяни, Господи, святых отец избиенных от варвар в горе Синайстей и в Раифе и прочих преподобных отец наших, постников православных и всех святых. Не яко убо мы достойни есмы поминати их блаженство, но яко предстоящих страшному и трепетному престолу Твоему молящихся о нашем окаянстве.

Помяни, Господи, и пресвитеры и диаконы и иподиаконы и чтецы, прислужники, и певцы, и иноки, и девы, и вдовицы, и сироты, и воздерженники, и иже во честнем браце пребывающих, и иже с верою во причастии святей Соборней Твоей Церкви скончавшихся.

Помяни, Господи, и благочестивых и верных царей: Константина и Елену, Феодосия Великаго, Феодосия, Маркиана, Пульхерию, Леонтия, Юстиниана и Константина, и иже по сих благочестно и верно царствовавших, и всех, иже в вере и печати Христове прежде усопших христолюбивых редников.

Помяни, Господи, и наших прежде усопшия родители и братию, и други, и сродники.

(здесь Предстоятель поминает по именам усопших, их же желает помянуть)

Сих всех помяни, Господи, Боже духов и всякия плоти, православныя, иже помянухом и непомянухом, со времени праведнаго Авеля, до днешняго дня сего. Сам их упокой, во стране живых, во Царствии Твоем, в рая наслаждении, в недрех Авраама и Исаака и Иакова, святых отец наших, отнюдуже отбеже болезнь, печаль и воздыхание, идеже присещает и зрится всегда свет лица Твоего. Скончание же живота нашего христианское и благоугодное, и безгрешное в мире исправи, Господи, и сподоби нас десныя части избранных Твоих получити, их же желаем, егда хощеши и якоже хощеши, едине токмо без стыда и прегрешений, ради Единородного Твоего Сына, Господа же и Бога и Спаса нашего Иисуса Христа, Той бо един безгрешен явися на земли.

В первых помяни, Господи, Отца и Архиепископа нашего ВИКЕНТИЯ, егоже даруй святей Твоей церкви в мире цела, честна здрава и долгоденствующа, права правяща слово Твоея истины.

Диакон:

(обратившись лицом к народу:) О мире и благостоянии всего мира и святых Божиих церквей, и о них и за нихже кийждо принесе, или в помышлении имать, и о предстоящих людех, и о всех и за вся.

Народ: И о всех и за вся.

Предстоятель: Даждь им и нам, яко благий и человеколюбец, Владыко.

Народ:(поет на глас 6–й) Ослаби, остави, Боже, прегрешения наша, вольныя же и невольныя, яже словом, яже делом, яже ведением и неведением, яже во дни и в нощи, яже во уме и помышлении, вся прости нам, яко Благ и Человеколюбец.

Предстоятель: Благодатию, и щедротами, и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков.

Народ: Аминь.