Том 12 (XVI век, литература «обобщающих предприятий»)

Сему христолюбивому государю, великому князю Василию Ивановичю всеа Русии, благочестно царствующу и добре правящу хоругви Росийския земли, скипетродержание кореноплоднаго их отечества, извечнаго, Богом утверженнаго их наследия, всячески везде Богу поспешествующу ему и от всех враг, видимых и невидимых, избавляя его и на супротивныя помагая ему, и крепляя его, и окружныя страны покаряя ему, овы — миромъ, непокаривыя же мечем. И всюду Богомъ прославляем, якоже онъ Бога прослави; и велий подвигъ полагая, еже бы утвердити правду в людех; и сего ради всегда царское его сердце и ум бдя и мудръствуя, окормляя всех опасне во благозаконии, безаконнии же потоки крепце отганяя, да не погрязнет карабль великаго его державства в волнах неправды. Такова бяше многопопечителная его царева душа: по подобию зерцала всегда исчищается и божествеными лучами выну облистаема и вещми разсужения оттуду научается, якоже негде пишет: «Иже убо существом телесным равен есть человеком царь, властию же достойнаго его величества приличен Вышнему, иже надо всеми, Богу: не имат бо высочайша себе на земли, непреступим убо человеки высоты ради земнаго царствия, благословим же бывает получения ради горняго Царствия. Якоже око телеси водрузися, сице и царь в мире устроися от Бога дарованным ему поспешением к полезным: да промышляет убо о человецех и сам во благих да пребываетъ, во злых же да не претыкается».[1181]

Поистине убо царь нарицашеся иже царствуя над страстьми и сластем одолевати могий, иже целомудрия венцем венчанный и порфирою правды оболченый. Тако убо бысть и сий благочестивый царем царь великий князь Василий, истовый вож, умный правител, вседоблий наказател, истинный кормчий, изящный предстател, молитвеник крепок, чистоте рачитель, целомудрия образ, терпения столпъ, князем руским и боляром, и прочим велможам, и рядником, и чиновником, и воином, и всем людем еже о благочестии крепкий поборник, архиереем же и всему освященному собору благоразумный соглаголник и всем притекающим к нему, яко ко источнику благопотребну.

Бяше же сердцем смирен, житием же высок, кроток взором, воздержанием сияя, почтен Божиею благодатию. Понеже Бога чтяше, и Богъ почти его и превознесе имя его на земли, всех бо любляше и всем любим бяще, и вси к нему припадающе, не токмо ближнии, но и далнии, еже бы рещи, от Синая и Палестины, Италия же и Антиоха, и от всея подсолнечныя хотяще его токмо видети[1182]

и слово его слышати. Прочая же его благодеяния кто возможет подробну писати! Якоже пишет Богослов о саламандре, некоем животне, иже своим естеством огнь погашает, оно же невредимо пребывает,[1183] такоже и сий самодержавный государь Василий огнь безбожный погашаетъ; и якоже Кафос, река сладкая, аще и сквозе пучину морскую идет, и своея сладости никакоже не погубляя,[1184] тако и сий боголюбивый самодержец от моря морскаго ничимже не вредися, Богу его хранящу премудрости ради его умныя. Наипаче же всего всегда попечение о души своей имея, многим тщанием подражая богомудрому своему житию святаго и праведнаго своего прародителя, достохвалнаго великаго князя Димитрия Ивановича Донскаго; на престоле убо царьском седяй и землю Русскую управляя, а сердце свое яко пещеру имеяше; царскую багряницу и венец ношаше, в ризы же чернеческия всегда желаше облещися, еже и получи последи. О таковом же велицем деле имяше советников, избранных во иночестве духовных мужей, иже из могущих царское его душевное таинство хранити и желание сердца его деломъ исполнити на ползу души его, еже и бысть. С ними же часто духовную беседу простираше и о души своей умышляше, како и коим временем быти ему иноку: всегда бо памят смертную во уме имея и страхом Господнимъ выну огражаяся, и еже в житии сем, яко человекъ, согреши, и сия милостынями и слезами и честным покаянием омывая. И тако готовляшеся очищенною душею предстати Богу, к немуже всегда ум свой неотлучен имея и до последняго издыхания. И в таковом благоумии некогда, яко Божественым мановением, начат уразумевати, яко близу быти отшествию его от мира сего, и тогда начат подвижнейше быти, всячески тщашеся вместо земнаго царствия Небесное получити.