Том 12 (XVI век, литература «обобщающих предприятий»)

Бысть же яко за десят седмиц дней до отшествия его Богу: бывшу ему со своею великою княгинею Еленою[1185] и со благородными чады во преименитой обители Живоначалныя Троицы на памят великаго в преподобных чюдотворца Сергия, и празднова по чину, и ту сущую братию учреди, и оттуду прииде на Волок Ламский,

[1186] и доиде села своего Озерецкаго, и тамо, яко некоим от Бога посещением, явися на нозе его знамя болезнено. И тогда наипаче внимаше себе, яко приближается ему пременение от маловременнаго сего жития в вечный живот и во блаженный покой. И от того времени усерднейши простирашеся умными молитвами к Богу. Врачеве же велми прилежаху о нем, и ничтоже успеша. И прииде на Волок в болезни велицей. Тогда же на Москве и на Волоце и во всей области Руския земли мнози людие видеша в нощи за мало дней преже праздника великомученика Дмитрия[1187]

множество звезд спадоша с небеси и, яко дождевныя туча, проливахуся на землю. Видя же себе великий князь велми изнемогаема от болезни, и повеле вести себя ко Пречистой Богородице в Иосифов монастырь[1188] помолитися с великою нужею. Отнюду же и на Москву прииде. И тако изволением Божиим аще и крепце болезнуя, но обаче адамантьская его царева душа крепчайшее благодарение, и прилежныя молитвы, иже к Богу, непрестанно бяху во устех его.

И месяца декабря 3 день, в среду, повеле духовному си отцу, благовещенскому протопопу Алексию,[1189] служити Божественую литоргию и принести к себе святое причастие. Бысть же тогда дивно чюдо, еже сотвори Господь по истинному его благоверию: прежде бо ни на едину страну не може превратитися, егда же принесено бысть к нему святое причастие, и тогда воста сам на нозе свои и со многим благоговением и со слезами причастися Пречистаго Тела и Крови Христа Бога нашего. И пакы возлеже на одре своем. Тогда же прииде к нему Троецкий, Сергиева монастыря, игумен Иоасаф,[1190]

емуже повеле неотлучатися с Москвы. И повеле церковному освященному собору освятити и помазати себе святым маслом во имя Господне. И сему совершившуся, призва к себе Данила, митрополита всеа Русии,[1191] и братию свою, и боляр своих избранных и дьяков и повеле писати духовную грамоту и завет о управлении царствия сынови своему и наследнику. Сам же неуклонно желаше во иноческий образ облещися. Митрополиту же с клятвою завеща, глаголя: «Вем, яко никтоже хощет, да бых азъ инок был. Ты же, отче, не устыдися никогоже, но сотвори по воли Божии инока мя быти по обещанию моему, аще и грешен есмь». Таже яко в сон тонок сведен бысть и пояше сам: «Аллилугия, аллилуия, слава тебе, Боже». И абие возбнув, глаголаше: «Яко Господеви годе, тако и бысть. Буди имя Господне благословено отныне и до века».

И повеле принести к себе Богом дарованнаго ему сына и царя и великаго князя Ивана, еще ему тогда велми детску сущу, яко триех лет и триех месяцъ.[1192] И мало восклонся на одре своем, и, слезы от очию, яко струя, испущаше, начат благословляти его, возлагая на него крестъ злат, глаголя: «Сим святым животворящим крестом великий чюдотворец Петръ митрополит благословил прародителя нашего великаго князя Ивана Даниловича и всех иже от чреслъ его великих князей всеа Росии и до насъ. Тем же благословением благословляю и аз тебя, сына моего. Еще же благословляю тя благословением нашего же прародителя великаго князя Владимера — Манамашим честным крестом от самого Животворящаго Древа, на немже нашего ради спасения волное распятие претерпе Христос Богъ нашъ. Сего же честнаго креста непобедимая божественая сила да будет ти твердое оружие и всюду светлая и преславная победа на вся враги, видимыя и невидимыя. К сим же приими и венец царский Манамаш, и диядиму, и жезл, и прочую утвар царскую Манамашу,[1193] имже мы великии князи венчаваеми на великое самодержъство Росийскаго царствия. Приими убо сие благословение царскаго достояния, о, благое мое и долгожеланное чадо! Аще и велми юн еси, но обаче благодатию всесилнаго Бога, преспевая возрастомъ, самодержавно царствуй вместо мене, отца твоего, благочестно управляя скипетрокрестоносныя хорругви всего Росийскаго царствия, извечнаго нашего отечества. И да будеши благословен по пророчеству великаго святителя и чюдотворца Петра, митрополита всеа Русии, благословением благостынным свыше от вседержительныя руки милосердаго Господа человеколюбца Бога, егоже неизреченная благодать и премногая милость, и Пречистые Богородицы, всегда неотступна да будет с тобою; и арханггельская помощ и ограждение, и богоприятныя молитвы святых великих руских чюдотворцев и всех святых, и родителское благословение и молитва да поспешествует ти везде во всяко дело благо на многа лета, и семени твоему в роды и роды, от ныне и до века». И тако благослови его, целуя, со слезами и отпусти его во своя ему полаты.