Том 15 (XVII век)

И приде ко иному отцу духовному, такоже вся исповеда ему своя согрешения, еже согрешихъ от юности своея и до днесь[1001], и доиде слово о блуде и о кровопролитии. Иерей же не прости ево грехъ: «Андрею, не подобаетъ нам таких на духъ приняти». И рече Анъдрей: «Глаголя Христос: „Приде в миръ призвати грешныхъ на покаяние". Ты же, иерей, не хощеши простити мя во гресех моих. Рече во Еваньели: „Аще свяжете на земли, будетъ связанъ на небеси, аще разрешите на земли, будетъ разрешенъ на небесехъ"». Иерей же рече: «Не хощу азъ таковаго греха носити на себе, яко не иматъ таковаго прощения человеку сотворивы грехъ». Андрей же и того иерея уби и поясом своим извлече его из церкви вонъ.

Так же прииде к третему иерею, исповеда ему вся своя согрешения. И тотъ иерей не прости ево за его многия грехи. Андрей же и третьяго иерея уби замком церковным до смерти.

И рече Андрей себе: «Иду во град Критъ, да тамо есть епискупъ. Той мя прииметъ на покаяние, прозорливъ бо есть, да иметъ мя простити, и богобоязнивъ. Аще не иметъ мя простити, поиду в далную сътрану ко царю во Арду и возъдвигну рать велию и град Крит зажгу, а людей в пленъ возму, а епискупа убью».

Благъ же и человеколюбецъ Богъ не хотя смерти грешником, ожидая их на покаяние. И прииде Андрей во град Критъ и поклонися епископу. Епискуп же приятъ ево и повеле сыскать мать Анъдрееву. И видевъ епискупъ Анъдрея украшена мужеством, яко хощетъ сосуд Божи быти избранный, и начя вопрошати наедине. Андрей же исповеда епископу своя согрешения по ряду, еже сотъвори от юности своея и до старости. Епискуп же убояся суда Божия и смерти и посла ево по матерь свою. И приде Андрей с матерью своею къ епископу. Епискуп же научивъ ихъ доволно и духовно и отпусти их.

И повеле епискупъ погрепъ выкопать трехъсаженной, а в ширину пол сажени на две сътраны. Призва епискупъ Андрея с материю и посла ево по чернилы и по бумагу. И какъ Андрей въниде в погрепъ, епискупъ же повеле железною цкою[1002]

покрыти ево и запечатать во погребе. И даде заповед 30 летъ: «И како наполнитца тотъ погребъ земли, и станетъ земля наверху погреба, тогда прощенъ будетъ от греховъ своих». А матери ево епискупъ нозри прореза и замкнулъ замком, а кълючь того замка повеле ввергнуть в море. А богатство ихъ повеле епискупъ раздати злато и сребро нищимъ. И повеле епискупъ Андреевой матери по миру ходить и Господа Бога Спаса нашего славити и милости просити о своем согрешении. И рече епискупъ: «Тогда прощена будешь, какъ того замка ключь из моря выдетъ».

Андрей же пребывъ в погребе, моляся Богу о своем согрешении и приводя душу свою во многия притчи и каряше себе. И сложи канонъ, иже поетца Великий в постъ пятыя недели в четвертокъ. И достиже тридесятого лета.

И приидоша к епископу гости[1003] со многих стран во град Критъ. И прилучися жена та, еже бе у ней замок на нозряхъ. И вопросиша у нея гости: «Какой у тебя на нозряхъ замокъ сей, коею притчею сотворися тебе?» Она же поведа имъ всемъ. И в то время повеле епискупъ на трапезу купить рыбы на торгу. И купиша рыбу, и спороша чрево ей, и выпаде из рыбы той ключь. И показаша ключь той епископу. Епископ же повеле призвати Анъдрееву мать и повеле приложити к замку тому. И отпряну замок от носу ея. И повеле епискупъ Андреву мать пострищи в иноческий чинъ.

И прииде епискупъ ко Андрею со всем собором к погребу. Андрей же седяше наверху погреба, дописываетъ девятую песнь канона великаго. И когда епискупъ Критский восхвали Бога и Господа нашего Иисуса Христа, яко сподобися Андрей прияти прощение греховъ своих. И постриже епискупъ Андрея во иноческий чинъ.

И принесе епискупъ канонъ той, что сложил Андрей, в церковь и прочьте ево всем людем вслухъ, на коеждом[1004] тропари метания[1005]

и поклоновъ положить людем всемъ повеле. И тако епискупъ похвали Бога вельми Господа нашего Иисуса Христа.

И призва епископъ Андрея к себе и рече: «Чадо мое, прости мя в семъ веце и в будущемъ. Иди и пребуди, чадо мое и брате, в монастыре моем три дни, а в четвертый день прииди и погреби тело мое грешное». И разболеся епискупъ в третий день и отиде ко Господу. Андрей же погребе епискупа в церкви Спасове.

Изволи Богу быть во граде Крите Андрею во епискупахъ 30 летъ. Богоугодно поживе и праведно, постомъ и молитвами и милостынею и слезами, и Бога умолив, и многия церкви воздвиже, и многия люди привлече ко спасению, и бысть ко всемъ людем милостивъ. И преставися в вечную жизнь о Христе Иисусе Господе нашемъ. Ему же слава ныне и присно и по веки вековъ. Аминь.

КОММЕНТАРИЙ