Том 16 (XVII век, «смеховой мир»)

Отвеща кур лисице: «Помниш ли ты, госпожа моя лисица, притчу: „По каторай реке плыть, по той и славу творить. А у котораго господина жить, тому и служить и волю ево творить”. И во святом евангелисте пишет: „Не может раб двема господином работать”.[4127] Такоже и я, госпожа моя лисица, у крестьянина жил, хлеб ел и пшеницу я у них клевал, как жа добра им не хотеть? Тому и Бог не поможет, кто хлеба и соли не помнет. Хлеб-соль великое дело, без него человек не может жить ни единаго часу. А ныне твой есмь раб до смерти и добра хотети».

И рече куру лисица: «А ты меня, смерд[4128], смердиною зовеш а детей моих соромотиш, за то тебе быть снедену от меня. Слышала я притчу: „Одному господину служить, а другому не грубить”. А ты б меня тогда не оскорбил, а мужикам не дружил, а сам ты от меня топерь от смерти не избудеш».

И рече кур лисице: «Госпожа моя лисица, не одолей злобу злобою, одолей злобу благостынею. Царь же Давыд написа: „Блажени милостиви, яко ти помиловани будут[4129] от Бога”. А я, госпожа моя лисица, ведаю и сам то, что аз недостоин птицам небесный и зверем земным ясти, не одно время в полунощи зовуще, Бога прославляюще. Помнишь ли ты, госпожа моя лисица, при распятии Господни рече Господь Петру: „Петр, трижди ты от меня отвержися”. Петр же рече: „Господи, ниже не отвергуся от тебя николиже”».[4130]

И рече куру лисица: «Ты на то надеешися, что грамоте гаразд и отвещати умееш. И тем тебе не отговоритца. Повинен ты еси смерти. И тако мне тебя есть не для твоего храбраго перья, для твоих неправедных и небылых словес лживых».

И рече кур лисице: «На чем[4131] ты еси, госпожа моя мати лисица, слово молвила, тем бы ты и оправила ся еси[4132]».

Рече же кур лисице: «Госпожа моя лисица, человек ты еси не ратной и ратнаго оружия у себя не имееши. Прелстила ты еси меня лестными своими словами и лживыми. Поручил[4133] тебе меня Бог в кохти за мои великия грехи и за мое безаконие и безумство. Пощади, госпожа моя лисица, не отжени[4134] к

ласу неозрелова и не пролей крови неповинныя напрасна».

Лисица же удивися курову премудрому ответу, и она ш згнела ево крепко, хотела куру живот[4135] скончать.

Завопил же кур великим гласом и рече: «Дай мне, госпожа моя лисица, единое слово прамолвить. Звал меня, госпожа моя лисица, крутицкой митрополит в подьеки, глас мой хвалил[4136] велми сам митрополит, а петь бы мне у него на омбоне[4137] дышкантом тонко и высоким гласом. И ты, госпожа моя лисица, отпусти меня, и аз стану давать тебе оброку з году и в год, чем ты изволишь пожелаешь брать. Что мне даст митрополит, то я стану тебе давать. А буде ежели ты, госпожа моя лисица, похощешъ пожелаешь сама во власти итить, и мне можно упросить у митрополита, поставлю и я тебя в чин в просвирнической. И тебе будет добро кануны молить, госпожа моя, сладкия, а просвиры мяхкия, а приходу очень много. Да я же тебе оброку стану платить сверх того по пятидесяти рублей на год».

И рече куру лисица: «Подумала бы я на такую власть поити, и ты меня обмановашь. А когда я была галадна и когда я была недобычна, и тогда я приходила х крестьянину на двор, где у нево сидят куры, и тогда б я тебя, лихова злова человека, погубила б. А когда будешь у митрополита в подьяках, а я буду в просвирницах, и ты, лихой человек, огласишь меня митрополиту небылними словами, а я тогда от тебя, злаго человека, и от небылных твоих неправедных словес и до конца погибну. И мне гаваришь, как бы тебе от смерти своей избыть».

И рекла куру лисица: «Не сули ты мне журавля в небе, токмо дай синицу в руки. Не сули мне в год, сули в рот. А ты у меня и сам в руках, недарого мне твое красное перья и твои лестныя слава. А я теперь сама галадна, хочу я тебя скушать, чтоб мне с тебя здравой быть».

И тако сконча живот куру.

ПОВЕСТЬ О БРАЖНИКЕ{22}

СЛОВО О БРАЖНИКЕ, КАКО ВНИДЕ[4138]

В РАЙ

Бысть неки бражник, и зело много вина пил во вся дни живота своего, а всяким ковшем Господа Бога прославлял и чясто в нощи Богу молился. И повеле Господь взять бражникову душу, посла аггела своево, и взят аггел бражьникову душу, и постави ю[4139] у врат святаго рая Божия, а сам аньел и прочь пошел.

Бражник же начя у врат рая толкатися[4140], и приде ко вратом верховны апостол Петр, и вопроси: «Кто есть толкущися у врат рая?» Он же рече: «Аз есмь грешны человек бражьник, хощу с вами в раю пребыти». Петр рече: «Бражником зде не входимо!» И рече бражник: «Кто ты еси тамо? Глас твой слышу, а имени твоего не ведаю». Он же рече: «Аз есть Петр апостол». Слышав сия бражник, рече: «А ты помниши ли, Петр, егда Христа взяли на роспятие, и ты тогда трижды отрекся еси от Христа?[4141] А я, бражьник, никогда не отрекся от Христа. О чем[4142] ты в раю живеши?» Петр же отъиде прочь посрамлен.