Том 16 (XVII век, «смеховой мир»)

Бысть убо человек именем Панкрат, преехав с Пинеги на Великий Устюгь в лето 7109-го (1601) и привез с собою образ святаго Артемия гробницы. Егда и от того образа многа исцеления быша. Бе убо некия две жены, единой имя Анна, другия же Улита: одержими бе трясавицею пять лет. Той же священник Иван взем стружек гробницы святаго и положи женам ко кресту на гойтяны, и в том часе здравы быша месяца апреля в 11 день. И благодарите Бога и святаго Артемия.

Чюдо 20. Всегда же бывайте обычным человеколюбием Божиим, молитв ради праведнаго Артемия различная исцеления бывают недужным, овогда от гроба святаго, иногда же от образа его, овогда же стружек святаго гробницы емлюще, иногда тайно, иногда яве, иногда же покрова, еже речется береста, з гробницы святаго взимающе, исцеление получаху.

В лето 7109-го (1601) месяца апреля в 20 день бысть чюдо святаго Артемия. Бе некий человек, живяше во граде Великаго Устюга, сын боярской именем Иван Захарьин сын. Бе одержим трясавицею. И вземши у некоего человека береста святаго гробницы, и ношаше у себя на гойтяне. И от тое болезни здрав бысть молитвами святаго Артемия и воздав хвалу Богу и святому Артемию.

Чюдо 21. Ниже убо и сие посещение, бывающее святым, неудобно молчанию предати, но проповедаем преславное чюдо. В лето 7113-го (1604) декабря в 6 день, на память святаго Николы чюдотворца, прииде в Верколу некто человек именем Ларион Артемиев сын. Рожением вологжанин, житие имея на Колмогорах, рекомое Глинки. Поведа священником и всем християном: «Бывшу убо ми в недузе, очима болен, и бе не видя ничтоже от Покрова Святей Богородицы до недели Цветоносныя, еже речется Вербная.[4416] Бе же убо не вниде брашно во уста моя дней девять. И от тое великие болезни хотех удавитися и смерти себе предати, но не даша мне людие, вожаше мя, за руку держа. И явися ми святый праведный Артемий в видении, аз же в той час прозрех очима и видех святаго Артемия: ризы на нем белы, в левой руце имея посошек невелик, а в правой держа крест.[4417]

И огради мя крестом и рече ми: „Человече, что стражеши, но востани, исцеляет тя Христос мною, рабомь своим Артемием. И поиди в Верколу, приложися ко гробу моему и исповеждь священнику и християном”. И взем руку мою, и крещаше мя рукою моею, и невидим бысть. Аз же воспрянув и здрав бысть, яко николиже боле. И от многия радости слезы испущая и благодарение воздая Богу и святому Артемию, дивному в чюдесех, и приидох дозде». Людие же слышавше и прославиша Бога и святаго Артемия о бывшей чюдеси.

Чюдо 22. В то же время, на память святаго Николы, человек некто именем Иев Иванов сын, пинеженин из веси, рекомыя Летопалы, поведа нам: «Бывшу мне в недузе разслаблен месяц пять, не могий двигнутися. И нача молитися святому Артемию. И явися ми святый в видении, рече ми: „Иди ко гробу моему, помолися, и исцелееши” Аз же возбнув[4418], в той час здрав бысть и, хвалу воздав Богу и святому Артемию, прииде дозде днесь».

Чюдо 23

. Месяца декабря в 16 день поведа нам человек некто именем Иван Яковлев, рекомый Дежнев, тоя же веси Верколские. Бе дщи его именем Анна, бысть не виде очима ничтоже два лета, белмо бе на очесех ея. И помолися святому Артемию, и приложися ко гробу его, и бысть здрава очима. И отъиде в дом свой, радуяся и хваля Бога и святаго Артемия.

Чюдо 24. В то же лето месяца генваря в 23 день некий человек именем Харитон Семенов, кевролец, исповеда. Бысть на мори на Новой земли, рекомое на Вайгаче.[4419] И одержим бысть болезнию, завратися рука его ко плечю и бысть так все лето, не могий двигнути. «И явися ми святый Артемий во сне и рече ми: „Иди в Верколу, и помолися у гроба моего, и сотвори канон, и молебная пой, и исцелееши”. Аз же пришел, и сотвори по глаголу святаго, и приложился ко гробу его, и здрав бысть рукою моею молитвами святаго Артемия».

Чюдо 25

. В та же времена бысть некая жена именем Акилина, Еремея Ушакова жена. Бе в недузе, не владея ничем в разслаблении. И помолися святому Артемию с верою, и явися ей святый Артемий и дарова ей здравие. Она же, радуяся, хваля Бога и святаго праведнаго Артемия.

Чюдо 26. Во времена же та бысть некий человек именем Алексей Павлов сын, рекомый Шестаков, кевролец. Лежа в недузе в щипоте[4420] четыре недели. Имея у себя сына именем Антония, от нечистаго духа лежа без ума и без памяти месец шесть. И врачев призываше и ничтоже успеша.[4421] И воспомянуша чюдеса святаго Артемия, и начат молитися с верою, и обеты положивше молебная пети. И быша здравы, благодарение воздая Богу и угоднику его святому Артемию.

Чюдо 27. Бе убо некая жена именем Фотиния дщи Назарова, а жена Сергия рекомаго с Выи, очима не видя ничтоже. И с верою помолися святому Артемию и бысть здрава очима. И радости исполнися, хвалу воздав праведному Артемию.