Том 16 (XVII век, «смеховой мир»)

Чюдо 28. Ина жена именем Марина с Ваймуши, жена Елисея, рекомаго Матфеева, немогии[4422] утробною болезнию два лета. И помолися с верою Господу Богу и святому Артемию, и бысть здрава от того часа от болезни тоя, благодаря Бога и святаго Артемия.

Чюдо 29. Иное чюдо хощу поведати. В лето 7114-го (1606) бе человек Аверкий, рекомый Мамантов, живяше на Выи. Бысть же у него правая нога разслаблена, и не можаше ей двигнути. И помолися с верою святому Артемию, и от того часа здрав бысть ногою. И славя Бога и святаго Артемия с радостию.

Чюдо 30. И сие убо проповедано будет чюдо святаго. Бысть убо того же лета человек некто именем Вавила Васильев, живяше в Шардонемы. Болен бе, очима не видя. И обет положи ко святому. И пришед, приложися ко гробу святаго, и отъиде восвояси, радуяся, здрав бысть.

Чюдо 31. И сие убо не покрыется молчанием чюдо святаго. В лето 7115-го (1607) некий человек двинянин Еуфимий, глаголемый Игнатьев, имея же у собя сына именем Исайю. Сему же беснующуся от нечистаго духа. И явися племнику[4423] его во сне святый Артемий и рече: «Ведита его в Верколу ко гробу святаго Артемия». И возбнув от сна, и вземше, ведоша его в Верколу. И певше молебная, и приложиша ко гробу святаго Артемия. И отъиде от него бес, и бысть здрав человек той. И отъиде восвояси, радуяся и благодаря Бога и святаго Артемия.

Чюдо 32

. В та же времена жена некая именем Евдокия Малахиева дщи, вдова с Веегоры, не владея бе ногама своима, от злых человек испорчена. А иная жена именем Дария, Федотова дщи, а Филипова жена, бе в недузе утробною болезнию одержима. И иная жена именем Екатерина, Михайлова дщи, Савельева жена, с Выи, в великой болезни не владея собою. И они помолишася святому Артемию с верою, и быша здравы от болезней сих, и славяще Бога и святаго Артемия.

Чюдо 33. В то же лето бысть некто человек именем Макария Гаврилов, живый в Нижной Шетогорки, лежаше болезнию одержим. И помолися святым чюдотворцем Николе и Артемию, и здрав бысть человек той молитвами святых Николы и Артемия. Прииде в Верколу и молебная отпев, отъиде, радуяся.

Чюдо 34. Во время же то бе жена именем Татияна, вдова с Выи, бысть болна велми хребтом и ногама, не можаше ходити. И помолися святому Артемию с верою и молением от святаго исцеление получи. Она же благодарения пения воздав святому Артемию и отъиде, радуяся.

Чюдо 35. Бысть человек в та же лета именем Герасим Игнатиев с Перемского. Прииде в Верколу, поведа: «Бывшу мне на мори, и небрежением шеймою

[4424] руку вредил, и не можаше рукою своею ни двигнути на много время. И помолися с верою святому Артемию и здрав бысть рукою». Мы же слышавше сие чюдо и писанию предаше.

Чюдо 36. Бысть некто человек Макария именем, рекомый Молчанов, и бе у него дщи, не видя очима своима. И моляшеся святому Артемию и тем молением от святаго исцеление получи. И пришел, приложися ко гробу святаго, и бысть здрава очми, и отъиде, радуяся и славя Бога и святаго Артемия.

Чюдо 37. Ино чюдо поведано будет, бысть в то же время. Бе некая жена именем Еуфимия, Верколской волости, одержима утробною болезнию. Ины жены именем Пелагия, а другая именем Марфа Еуфимиева дщи одержимы болезнию холодною еже дрожание.[4425]

И помолишася те жены святому Артемию с верою и здравие получиша от святаго. И жены же благодарение воздаше Богу и святому Артемию.

Чюдо 38. Бысть убо некий человек Калинник да Матрона Ивановы дети, рекомые Захаровы. У Калинника же бе болезнь утробная, а у девицы болеша очи. А ина жена именем Улита очми же болна велми от бури. И моляшеся святым чюдотворцем Николе и Артемию Верколским и многим молением здравие получиша от святых.

Чюдо 39. Бе некая жена именем Дария, не можаше чад родити. Иобет положи ко святому Артемию молитися, и от святаго исцеление получаше.

Чюдо 40. В лето 7116-го (1608). Бысть некая жена именем Анна Харлампиева дщи, рекомаго Ширяева, житие имеяше в Черевкове, мужа, Соловья рекомаго. Бысть же она в недузе, не бысть у ней ума и памяти два лета. И обет положите святым Николе и Артемию в Верколу молебен пети. Бысть здрава во уме молитвами святых и хвалу воздав Богу и святым его.

Чюдо 41. Многа убо чюдеса бываема и исцеления преславна святым и праведный Артемием. Их же множества ради несть лзе вместити, и в забвении ума невозможно есть по ряду писати. Мы же от многа нечто мало возвестим.