Том 16 (XVII век, «смеховой мир»)

ЧЮДО преславно Пресвятыя Владычицы нашея Богородицы и Приснодевы Марии, содеяся от чюдотворныя иконы ея, честнаго и славнаго Одигитрия, иже наричется Грузинская. Чюдо 25

. «Тайну цареву добро есть таити, а дела Божия проповедати преславно есть». Не хранити бо тайны царя — зело беду души наносит. Сице убо и преславныя дела Божия молчанию предати — наипаче пагубнейши души бывает, якоже бе и ныне содеяся напоследок в последнем нашем роде на утвержение истинныя православныя християнския веры и на посрамление неверным, не хотящим поклонятися и почитати Пречистаго вочеловечения образа Христа Бога нашего и рождьшия его Богоматере, Пресвятыя Владычицы нашея Богородицы и Приснодевы Марии. О них же написа блаженный Иоанн Дамаскин сице: «Прокляты да будут непоклоняющиися, ни чтущии Пречистаго образа Пресвятыя Владычицы Богоматере с Превечным Младенцем Господем нашим Исусом Христом, имже кончина будет, вечная погибель». Мы же убо, правовернии, вси целуем любезно и почитаем образ Пречистыя и Приснодевы Марии и с Превечным ея Младенцем — Господем нашим Иисусом Христом, яко на самую истинную Матерь нашу Богородицу Владычицу во уме своем зряще, и яко Пренебесней Царице страхом и любовию припадающе. Страхом убо греха ради, любовию же спасения ради. Понеже убо достойно, аще и недостойным, коснутися к поведанию чюдному Богоматери безсмертия источнику, к великому и славному чюдотворению. Понеже бо случися вещь предивна, и милость превелика Богоматере от чюдотворнаго ея от образа. Якоже некий едемский источник безчисленныя безсмертия сладкия воды источая, понеже бо праведным Божиим великим милосердием и изволением Ея, Пренебесныя Царицы, како возлюби и изволи, яко жива, и восхоте уселити жилище себе с Превечным Младенцем во убозем таковем месте, уселитися и пребыти, яко во Святей горе Синайстей. О великое твое заступление печалным, и бедным нам помощница, и спасение миру, и утвержение, милости пучина, Божия мудрость, источник мирови, Одигитрие! Воспоем, вернии, славным ея заступлением хвалящеся неизреченно, еяже изволением наипаче восхоте прославити последнее сие место в последнее время и честный своим осенением осенити, и прославити, и просветии. И излия богатно от чюдотворнаго своего образа великую свою неизсказанную чюдотворную исцеления благодать. Бысть же сице в нынешнее настоящее время в лето 7158-е (1649) октября в 25 день при державе благочестиваго и христолюбиваго царя и великаго князя Алексея Михайловича всеа Русии, и при сыне его благоверном и благородном царевиче князе Димитреи Алексеевиче[4528]

всеа Росии, и при богомолце отце их, великом господине святейшем Иосифе патриархе Московском и всеа Русии,[4529]

и при митрополите Никоне великаго Новаграда и Великих Лук,[4530]

и при строители святаго места сего, Черногорския пустыни, старце Сергии, яже о Христе з братиею, содеяся чюдо преславно от иконы Пресвятыя Владычицы нашея Богородицы, честнаго и славнаго ея Одигитрия, иже наричема Грузинская.

Приидоша убо некия две жены во святую ту обитель Пречистыя Богородицы, честныя и славныя ея Похвалы, в Черную Гору от веси, нарицаемыя Марьины Горы, растояние имущи от обители яко 100 поприщ и вяще. Имя единой Евфимия, друзей же Феодосия. Евфимия же убо поведа сие преславное чюдо, случившееся ей: «Бывшу ми, — рече, — в болезни 9 месяц и болевшу ми тяжкою немощию, яже наричется щепота. И от немощи тоя разслабишася вси составы тела моего, и никакоже с места своего востати не могущи отнюд. И сице лежащу ми в болезни той лютой долгое время сие. И слухоме слышах бывающая чюдеса преславныя от иконы Пречистыя Богоматере, честнаго ея Одигитрия, иже во обители на Черной Горе. И во уме своем помолившися, лютою болезнью одержима, и обещася ити во обитель Пречистыя Богородицы пеша. О великое и неизследимое милосердие Богоматере! В том часе бысть здрава, якоже никогда болезни имеющи». И слышавше сие преславное чюдо окрест веси тоя живущии людие, и хвалу воздаша Всещедрому Богу и Пречистей его Богоматере.