Том 2 (XI-XII века, переводная литература)

В Селуньстемь[24] же граде бе мужь етеръ добророденъ и богатъ, именемь Левъ, предержа санъ другарескъ[25] подъ стратигомъ.[26] Бе же благоверенъ и праведенъ, схраняя вся заповеди Божия исполнь, якоже инъгда Иевъ.

[27] Живя же с подружьемь своимъ, роди семь отрокъ,[28] от нихъже бе мезинецъ семыи Костянтинъ Философъ, наставникъ и учитель нашь. Егдаже роди и мати,[29] вдаша и доилици, дабы и доила. Отроча же не хотяаше ятися по чюжь сесьць никакоже, разве по матерьнь, дондоже отдоенъ бысть. Се же бысть по Божию смотрению, дабы добра корене добра леторасль нескверньнъмъ млекомъ въздоена была.

Потомъ же добрая та родителя свещавша не сходистася, говеюща собе. Нъ тако живяста о Господи яко и братъсестра за четыри на десять лета, дондоже я смерть разлучи, никакоже не преступлеша того совета. На Судъ же ему хотящу ити, плакашеся мати отрочати сего, глаголющи: «Не брегу о всемь, разве о младенци семь единомь, како хощеть быти устроенъ». Онъ же рече еи: «Веру ими ми, жено. Надеюся Бозе, яко дати ему хощеть Богъ отца и устроителя такого, иже устроить вся крьстияны».[30] Еже ся и събысть.

Семи же лет отрокь бысть, виде сонъ[31]

и поведа отцю и матери. И рече, яко: «Стратигъ събравъ вся девица нашего града и рече къ мне: „Избери собе от нихъ, еюже хощеши подружию на помощь и сверсть собе". Азъ же глядавъ и смотривъ всехъ, видехъ едину краснеишю всехъ: лицемь светящюся и украшену велми монисты златыми и бисьромъ и всею красотою. Еиже бе имя Софъя, сиречь мудрость. Ту избрахъ». Слышавъша же словеса си родителя его, рекоста къ ему: «Сыну, храни законъ отча твоего и не отверзи наказания матере своея.[32] Светилникъ бо заповедь закону и светъ.[33] Рчи же премудрости: „Сестра ми буди", а мудрость знаему себе створи.[34] Сияеть бо премудрость паче солнца, и аще приведеши ю себе имети подружье, то от многа зла избавишися ею».[35]

Егдаже вдаста и въ учение книжное, спеяаше паче всехъ ученикъ в книгахъ памятью доброю велми, яко и дивитися всемъ. Единою же от дьнии, якоже обычаи есть богатицищемъ глумление творити ловитвою, изиде съ ними на поле, ястрябъ свои вземъ. И яко пусти и, ветръ ся обрете по смотрению Божию, взятъ и и занесе. Отроча же оттоле, въ унынье и въ печаль впадъ, два дьни не ясть хлеба. Чьловеколюбиемь бо своимъ милостивыи Богъ, не веля ему привыкнути житиискых вещехъ, удобьно уловити же, якоже древле улови Плакиду[36] в лове еленемь, тако и сего ястрябомъ. В себе помышль житья сего утеху и каяаше, глаголя: «Таково ли есть житие се, да в радости место печаль пребываеть? От сего бо дьни по инъ ся путь иму, иже есть сего лучии. А в молве житья сего своихъ дьнии не иживу». И по учение ся имъ, седяаше в дому своемъ, учася изустъ книгам святаго Григория Феолога.[37] И знамение крестное сътворь на стене, и похвалу написавъ святому Григорию сицеву: «О Григорие, телом человече, а душею аггеле. Ты телом человек сый, аггелъ явись. Уста бо твоя, яко единъ от серафимъ, Бога прославляют и вселенную просвещают правыа веры казаниемъ. Темже мя, припадающа к тебе любовию и верою, приими и буди ми просветитель и учитель».[38] И тако хваляше Бога.

Вшед же въ многи беседы и въ умъ велии, и не моги разумети глубины, въ уныние велико впаде. Странныи же некто бе ту, умеяи грамотикию. И к нему шед, моляся и на ногу его падая, вдаяся ему, глаголя: «О человече, добре деи, научи мя художству грамотичьскому». Он же, съкрывъ талантъ свои, погребъ, рече к нему: «Отроче, не тружаися. Отреклъ бо я есмь отнуд никогоже не научити сему въ вся моя дни». Пакы же отрокъ съ слезами ему кланяася, глаголаше: «Възми всю мою чясть от дому отца моего, еже мне достоит, а научи мя». Не хотевшу же оному послушати его. Тогда отрок, шед в дом свои, въ молитвах пребываше, дабы обрел желание сердца своего.[39]

Въскоре же Богъ сътвори волю боящихся его. О красоте бо его и о мудрости и прилежнемъ его учении, еже бе растворено в нем, слышавъ царевъ строитель, иже нарицается логофетъ,[40] посла по нь, да ся бы съ царемъ училъ.[41] Отрокъ же, услышавъ се, с радостию пути ся ятъ и на пути поклонися Богу, нача молитву, глаголя: «Боже отець наших и Господи милости, иже еси сътворил словом всяческаа, и премудростию твоею сьздавыи человека, да владеет сътвореными тобою тварьми. Даждь ми сущую въскраи твоих престолъ премудрость,[42] да разумевъ, что есть угодно тебе, спасуся.[43] Азъ бо есмь рабъ твои и сынъ рабыня твоея».[44] И къ сему прочюю Соломоню молитву изглаголавъ, въставъ, рече: «Аминь».