Том 2 (XI-XII века, переводная литература)

Егдаже прииде къ Царюграду,[45] вдаша его учителем, да ся учит. И въ 3 месяца навыкъ всю грамотикию и по прочая ся ятъ учениа. Научи же ся Омиру и геометрии, и у Лва[46] и у Фоте[47] диалексице, и всем философскым учениемъ к сим: и риторикии, и арифмификии, и астрономии, и мусикии, и всем прочим еллинскым художьствомь.[48]

Тако я навыче вся, якоже бы моглъ кто едино навыкнути от них. Скорость бо ся съ прилежаниемъ съключи, другъ друга преспевающи, имже ся учениа и художьства съвръшают. Боле же учениа, тих образ на себе являа, с теми беседоваше, с нимиже бяше полезнее, уклоняася от укланяющихся въ стропты, и помяшляше, како бы земными небеснаа пременшу, излетети ис телесе сего и съ Богомъ жити.[49]

Узрев же и такова суща, логофетъ дасгь ему власть на своемъ дому и въ цареву полату съ дръзновениемъ входити. И въпроси его единою, глаголя: «Философе, хотех уведети, что есть философия». Онъ же скорымъ умом абие рече: «Божиимъ и человечьскым вещем разум, елико может человекъ приближитися Бозе, и яко детелию учить человека по образу и по подобию быти сътворшему и». От сего же паче възлюби его и присно его въпрашаше о всем толик муж велии и честенъ. Он же ему сътвори учение философское, в малых словесех велии умъ сказавъ.

В чистоте пребываа, велми угажаше Богу, толми паче любезнеи всемъ бываше. И логофетъ всяку честь творя ему говеину, злато много дая ему, онъ же не приимаше. Единою рече к нему: «Твоя красота и мудрость нудит мя излиха любити тя, то дщерь имамъ духовную, юже от крестила изяхъ, красну и богату, и рода добра и велиа. Аще хощешь, подружие сию ти дамъ. От царя же ныне велию чьсть и княжение[50] приимеши. И болшаа чаи — въскоре бо и стратигъ будеши». Отвеща ему Философ: «Даръ убо велии да будет требующим его. А мне боле учениа несть ничтоже, имже разумъ събравъ, прадедьняа чьсти и богатства хощу искати».[51]

Слышав же логофетъ ответ его, шед къ царици,[52] рече: «Сеи философ юны не любит житиа сего, то не отпусти его от общины, но постригше и на поповство, вдадимъ ему службу. Да будет книгчии[53] у патриарха[54] въ святеи Софии.[55]

Некли поне тако и удержимъ». Еже и сътвориша ему.

Мало же с ними весма побывъ, на Узкое море[56] шед, съкрыся таи в монастыри. Искаша же его 6 месяць, и едва и обретоша, и не могоша его унудити на ту службу. Умолиша же и учительскии столъ приати и учити философии тоземныа и странныа съ всякою службою и помощию. И по то ся ятъ.[57]

Бе же Аннии патриархъ[58] ересь въздвиглъ, глаголя не творити чьсти святымъ иконам. И събравше съборъ, обличиша его, яко неправо глаголеть, и съгнаша и съ стола. Он же рече: «Насилием мя съгнаша, а не препревше мене. Не можеть бо никтоже противитися словесемъ моимъ». Царь же с патрикии,

[59] устроивъ сего Философа, посла на нь, рекъ тако: «Аще можеши уношу сего препрети, то пакы столъ свои приимеши». Он же, узревъ Философа юна теломъ, а не ведыи стара ума в немъ и, иже бяху послани с нимъ, рече к нимъ: «Вы подножиа моего несте достоини, то како ся с вами хощу прети?» Философ же к нему рече: «Не людскаго обычаа держи, но Божиих заповеди. Зри, якоже бо еси и ты от земля, а душа Богомъ съставлена, тако и мы вси. То на землю зря, прею, человече, не гръдися». Паки же Аннии отвеща: «Не подобно есть въ осень цветець искати, ни старца на воину гнати, яко юношу некоего». Философ же отвеща ему: «Самъ на ся вины обретаеши. Рци, в кую връсту есть силнеиши душа, телеси?» Он же рече: «На старость». Философ же рече: «На кую тя брань гонимъ: на телесную ли или на духовную?» Он же рече: «На духовную». Философ же отвеща: «То ты ныне силнеи хощеши быти, да не глаголи нам такых приточ. Не без времене бо ни цветець ищем, ни на воину тебе гонимъ». Посрамль же ся тако, старець инамо обрати беседу и рече: «Рци ми, юноше, како крьсту, разорену сущу, не кланяемся ему, ни лобызаем его. А вы, аще лице до перси токмо будет, иконную честь ему творяще, не стыдитесь». Философ же отвеща: «Четыре бо части крьстъ имат. И аще едина его часть убудет, то уже своего образа не являет. А икона от лица токмо образ являет и подобие того, егоже ради будет писано. Не лвова бо лица, ни рысии зрить, иже и видить, но перваго образ». Пакы же старець рече: «Како ся убо кланяете крьсту без написаниа, а бывшем инемъ крьстом, икона же, аще не има написана имене, егоже будет образ, то не створите еи чьсти». Философ же отвеща: «Всякъ бо крьстъ подобен образъ имать Христову крьсту. А иконы не имут вси единого образа». Старець же рече: «Богу рекшу к Моисеу: „Не сътвориши всякого подобиа".[60] Како вы, творяще, кланяетесь». Философ противу ему отвеща: «Аще бы реклъ: „Не сътвориши никакогоже подобиа",[61] — то право приши. Но есть реклъ „не всякого", сиречь „достоиное"». Противу же симъ не могии отпрети старець, умолча, посрамлься.

Чтение второе[62]