Том 2 (XI-XII века, переводная литература)

Уведевъ же римьскыи папежь,[173] посла по нь. Дошедъшю же ему Рима, изиде самъ апостоликъ[174] Андриянъ[175] противу ему съ всими гражаны, свеща несуще, уведевше, яко несуть мощи святаго Климента мученика и папежа римьскаго. И тъгда Богъ чюдеса нача творити: ослабленъ же чьловекъ ту ицеле, а ини мнози различныхъ недугъ избыша. Тако же и плененеи пленьшихъ я, нарекъше память святаго Климента, избыша.

Приим же папежь книгы словеньскыя, освяти и положи я въ церкви святыя Мария, яже ся наричаеть Фатанъ,[176] пеша же над нимъ литургию. И по семь повеле папежь двема епископома Фуръмосу[177]

и Гоидриху[178] святити словеньскыя ученикы. Яко я святиша, тъгда пеша литургию въ церкви святаго Петра[179] словеньскымъ языкомъ. И въ другыи дьнь пеша въ церкви святы Петрунилы.[180] И въ 3 дьнь въ церкви святаго Андрея,[181]

и оттуду пакы у великаго учителя язычьскаго Павла апостола в церкы[182] в нощи пиша святую литургию словеньскы надъ святымъ гробомъ, имеюще на помощь Арсения епископа, единого суща от седми епискупъ,[183] и Настаса[184] вивлотикаря.

Философъ же съ своими ученикы не престаяше достоиную хвалу Богу въздая о семъ. Римляне же не престаяху идуще к нему, въпрашающе о всемь. И сказание сугубь и трыубь приимаху от него.

Жидовинъ же етеръ, такоже приходя, сътязашеся с нимъ и рече ему единою: «Несть уже не пришелъ Христосъ по числу летьнюму, о немже глаголють книгы и пророцы, яко от девы ся есть родити».[185]

Почьтъ же ему Философъ вся лета от Адама по роду, сказа ему потонку, яко пришелъ есть, и селико летъ есть от толе до селе. И научивы и, отпусти.

Постигъшемъ же многымъ трудомъ, болети нача. И тепящю ему язю болезненую многы дьни, единою видевъ Божие явление, начатъ пети сиче: «О рекшихъ къ мне: „Идемъ въ дворы Господня" възвеселися духъ мои, и сердце обрадовася».[186] Облекъ же ся въ чьстьныя своя ризы тако пребысть весь дьнь, веселяся и глаголя: «Отселе несмь азъ ни цесарю слуга, ни иному никомуже на земле, нъ токмо Богу Вседержителю бехъ и есмь въ векы. Аминь».

Въ утреи же дьнь въ святыи чьрньчьскыи образъ оболкъся и свет къ свету приимъ и имя си нарече Кюрилъ.[187] В томъ же образе пребысть 50 дьнии.[188] И яко приближися година, да покои приимъ, преставиться на вечную жизнь, и въздвигъ къ Богу руце свои и створи молитву, слезами сице глаголя: «Господи Боже мои, иже еси ангельская вся чины и бесплотныя съставль силы, небо распьнъ и землю основалъ, и вся сущая от небытья в бытье приведъ, иже еси всегда весде послушалъ творящихъ волю, боящихъся тебе и хранящихъ заповеди твоя. Послушаи моея молитвы и верное твое стадо схрани, емуже мя бе преставилъ, неключимаго и недостоинаго раба твоего, избавляя вся от всякоя безбожныя и поганьскыя злобы и от всякого многоречиваго имени и хулнаго еретичьска языка, глаголющаго на тя хулу. Погуби триязычную ересь и въздрасти церковь свою множьствомъ, и вся въ единодушье съвокупле. Створи изрядны люди, единомысляща о истинньнеи вере твоеи правемь исповеданьи, въдохни же въ сердца ихъ слово твоего учения. Твои бо есть даръ, аще ны еси прия недостоиныя на проповедание еуангелья Христа твоего. Острящаяся на добрая дела, творяще угодная тобе, еже мне бе далъ, яко твое тобе предаю. Устрои я силою твоею и десницею, покрывая кровомъ крилу твоею,[189] да всяко хвалять и славять имя Отца и Сына и Святаго Духа въ векы. Аминь». Лобъзавъ же вся святымъ лобзаниемъ, и рече: «Благословенъ Богъ нашь, иже не дасть насъ в ловитву зубомъ невидимыхъ врагъ нашихъ, нъ сеть ихъ скрушися, и избави ны[190]

от истления». И тако почи о Господе, бывъ 42 лет, въ 14 дьнь месяца февраля, въ индиктъ 2, от твари всего мира 6000 и 300 и 70 и 7 лет.[191]

Повеле же апостоликъ всемъ грекомъ, иже бяху в Риме, тако и римляномъ, съ свещами съшедъшеся, пети надъ нимь, створити провожение ему, якоже самому папежю створили. То же и створиша.

Мефодии же брат его въпроси апостолика, глаголя, яко: «Мати ны есть закляла, да иже наю пьрвее на судъ идеть, да пренесеть брат въ свои манастырь[192] и ту и погребеть». Повеле же папежь вложити и в раку и забити и гвозды железны. И тако держа и 7 дьнии, готовя и на путь. Рекоша же къ апостолику римьстии пискупи: «Понеже есть Богъ, по многымъ землямъ хожьша, привелъ и семо и сде дущю его изялъ — сде ему достоить лежати яко чьстьну мужю». Рече же апостоликъ: «То за святыну его и любовь римьскыи обычаи преступле, погребу и в моемъ гробе въ церкви святаго апостола Петра». Отвеща же братъ его: «Понеже мене не послушасте и не дасте ми его, аще вы есть любо, да ляжеть въ церкви святаго Климента,[193] с нимьже есть семо пришелъ». Повеле же апустоликъ тако створити.

И пакы сбравшемъся епископомъ всемъ и чернецемъ и всемъ людемъ проводити и чьстно. Хотяще же положити и, рекоша епископи: «Отгвождьше раку, видимъ, аще есть целъ, еда есть что взято от него». И тружьшеся много, не могоша отгвоздити ракы по Божию повелению.