Том 2 (XI-XII века, переводная литература)

Такоже сладкыми словесы углаголавъ, повеле имъ посечи древо и съжещи е. Поклонь же ся стареишина ихъ, шедъ, лобыза Евангелье, такоже и вси. Свеща же белы приимше от Философа, поюще идоша къ древу. И вземъ секыру Философъ 30 и трижды удари и повеле въсемъ сещи ис корения и съжещи е. В ту же нощь дождь бысть от Бога. И с радостию великою похвалиша Бога. И веселися Богъ о семъ зело.

Философъ же иде въ Цесарьградъ. И видевъ цесаря, живяше без мълвы, Бога моля, въ церкви Святыхъ Апостолъ седя.

Есть же в святеи Софьи потирь от драгаго камения Соломоня дела, на немже суть писмена жидовьска и самареиска грани написана, ихъже никтоже не можаше ни почисти, ни сказати. Вземъ же ю Философъ почте и сказа: «Есть же сиче. Пьрвая грань: „Чаша моя, чаша моя, прорицаи то: дондеже звезда, въ пиво буди Господи и пьрвеньцю, бъдящю нощию". По семъ же другую грань: „На вкушение Господне створена древа иного; пии, упиися веселиемъ и възпии Алелуиа". И по семъ третия грань: „И се князь их, узрить весь съньмъ славу его, и Давидъ цесарь посреде ихъ". И по и семъ число написано: девять сотъ и девятеро». Ращетъ же е потонъку Философъ обрете от втораго на десять лета царства Соломоня до царства Христова девятьсотъ и девять лет.[134]

И се есть пророчество о Христе.

Чтение 4

Веселящю же ся о Бозе Философу, пакы другая речь приспе и трудъ не мнии пьрвыхъ.

Ростиславъ[135]

бо моравьскыи князь, Богомъ устимъ, светъ створь съ князи и с моравляны, посла к цесарю Михаилу, глаголя: «Людемь нашимъ поганьства ся отвергъшемъ и по крьстьяскъ ся законъ держащемъ, учителя не имамъ такого, иже бы ны въ свои языкъ истую веру съказалъ, да быша ины страны того зряще, уподобили намъ. Посли ны, владыко, епископа и учителя такого. Отъ васъ бо на вся страны всегда добрыи законъ исходить».

Сбравъ же цесарь зборъ, призва Костянтина Философа и створи слышати рець сию. И рече: «Философе, вемь тя трудна суща, нъ достоить тобе тамо ити. Сея бо речи не можеть инъ никтоже исправити, якоже ты». Отвеща Философъ: «И труденъ сы теломъ и боленъ, радъ иду тамо, аще имуть букви въ свои языкъ». Рече цесарь к нему: «Дедъ мои и отець мои,[136]

и ини мнози, искавше того, не обрели того суть. То како азъ то могу обрести?» Философъ же рече: «То кто можеть на воде беседу написати или еретичьско имя собе обрести?» Отвеща ему пакы цесарь, и съ Варъдою, уимъ своимъ:[137] «Аще ты хощеши, то можеть Богъ тобе дати, иже даеть всемъ, иже просять несумнениемъ, и отверзаеть толкущимъ».[138]

Шедъ же Философъ, по пьрвому обычаю на молитву ся наложи и с инеми поспешникы. Вскоре же ся ему Богъ яви, послушаяи молитвы своихъ рабъ. И тъгда сложи писмена и нача беседу писати евангельскую: «Испьрва бе слово и слово бе у Бога и Богъ бе слово»[139] и прочее.

Възвесели же ся цесарь, Бога прослави съ своими светникы. И посла и съ дары многы, написавъ къ Ростиславу епистолию сицеву: «Богъ, иже велить всякому чьловеку, дабы в разумъ истиньныи пришелъ и на большии ся чинъ стежилъ, видевъ веру твою и подвигъ, створи и ныня в наша лета, явле букъви въ вашь языкъ, егоже не бе давно было, токмо в первая лета, да и вы причтетеся великыхъ языцехъ, иже славять Бога своимъ языкомъ. И то ти послахомъ того, ему же ся Богъ яви — мужа чьстьна и благоверна, книжна зело и философа. И сь приимъ даръ болии и честьнеи паче всего злата и сребра и камения драгаго и богатьства приходящаго. Подвигнися с нимь спешно утвердити речь и всемь сьрдцемъ взискати Бога. И обьщаго спасения не отрини, нъ подвигни не ленитися, нъ ятися по истиньныи путь, да и ты, приведъ я подвигомъ своимъ в Божии разумъ, приимеши мьзду свою в того место въ сьи векъ и в будущии за вся ты душа, хотящая веровати въ Христосъ Богъ нашь отныня до кончины, и память свою оставляя прочимъ родомъ подобьно Костянтину[140] цесарю великому».

Дошедъшю же ему Моравы, с великою чьстью приятъ и Ростиславъ. И събравъ ученикы, дасть я учити. Въскоре же ся всь церковьныи чинъ преложь, научи я утрении и годинамъ, обедни и вечерьнеи и павечерниче и таинеи службе. И отверзошася по пророчьскому словесе уши глухыхъ услышать книжная словеса, и языкъ яснъ бысть гугнивымъ.[141] Богъ же ся възвесели о семь велми, а дьяволъ постыдеся.