Том 2 (XI-XII века, переводная литература)

Тропарь гласа 2. Живящий крестъ твоея благости, егоже дарова намъ недостойныимъ, Господи, тебе приносимъ въ молитву. Спасай князя[819] и люди молящая тя, Богородица ради, едине Человеколюбьче.

Седаленъ гласа 6. Днесь пророческое събысться слово, се бо покланяемъся на месте, идеже стоясте нозе твои, Господи. И древо спасения приимъши, греховныихъ страсти свободу улучихомъ молитвами Богородица, едине Человеколюбче.

Крестъ твой, Господи, освятися, темь бо бывають целения болящиимъ грехы, темь припадаемъ ти, помилуй насъ.

Тъкмо въдружися древо крьста твоего, основания подвизашася съмьрти, Господи. Егоже пожьре, любя адъ, отъпусти трепеща. Показа намъ спасение твое, святый. Славословимъ тя, Сыне Божий, помилуй нас.

Спасение съдея посреде земля, Христе Боже, на крьсте пречистеи руце свои простьре, събирая вся языки, въпьюща: «Господи, слава тебе!»

Кондак гласа 4, самогласен. Възнесыйся на крьстъ волею, тьзънууму и ныне граду твоему[820] щедроты твоя подаждь, Христе Боже. Възвесели силою своею вернаго князя нашего, победу дая ему на супостаты, пособье имуща твое оружие — мира непобедиму победу.

Икос, подобен. Иже по третьимь небесе въсхыщенъ бывъ на рай, и глаголы слышавъ неиздреченьныя Божия,[821] ихъже не леть языкы глаголати, чьто къ галатомъ пишеть яко рачителемъ? Писание почтьтосте и разуместе. «Мъне, — рече, — хвалитися да не будеть, тькмо еже о единомъ крьсте Господни»,[822] на немъже страдавъ, уби страсти. Того убо и мы известьно дьржимъ, крьста Господня, похвалу вьсехъ, есть бо намъ спасьное се древо.

Стихира гласа 6, подобна: Вьсе упование

. Моиси прообразуя, руце въздевъ на высоту и побежая Амалика мучителя крьстъмь чьстьныимь.[823] Тъ бо верьныимъ хвала, мученикомъ крепость, апостоломъ украшение, правьдьнимъ възбраньникъ, вьсемъ преподобнымъ спасение. Темьже и´ въздвижемъ видящи, вься тварь веселиться и праздьнуеть, славящи Христа, темь бо растоящая събьравшааго и отъ коньць благодатью.

Крьстъ, въздвизаемъ на немь възнесенуму, страсть пречистую пети повелеваеть твари всея, на томь бо убивъ нас убившааго, и умьрщвении въставихомъся. И удобри, и на небесьхъ жити сподоби, яко милосьрдъ, премъножьствъмь благости. Темь радующеся, възнесемъ имя его и того възвеличимъ великое съшьствие.

Крьсте преславьный! Тя хвалять чинове англьсции, въпьюще, дньсь възносима Божиемь велениемь. Възносиши бо вся ядью оступльша и въ съмьрть въпадъшася.[824] Темьже тя сьрдьци и устьнами верьнии лобызаемъ, съвящение приемлюще: «Възносите, — въпьюще, — Христа, преблагого Господа, и тому кланяйтеся — Божию подъножию!»

Ина стихира, глас 8, подобен: О преславное чюдо. О преславьное чюдо! Животворяй садъ, крьстъ пресвятый, на высоту въздвижемъ, являеться дньсь. Славословестять и´ вьси коньци земля. Прогоними же бывають вси демони. О, Божие дарование земльныимъ даровася! Имьже, Христе, спаси душа наша, яко милостивъ.

О преславьное чюдо! Широта крьста и дългота небесьмъ равьна есть. И Божиею благодатию свящаеть коньца земли. Симь бо языци варварьсции побеждени бывають, симь бо вера утвьржаеться и Божия лествица, еюже въсходимъ на небеса, възносяще песньми Христа Бога.

О преславное чюдо! Гьрзнъ испълнь живота, понесый Вышняго, отъ земля възимаяся, — крьстъ въздвизаеться дньсь, имьже къ Богу приведени быхомъ вьси и пожьрта бысть до коньца съмьрть. О древо чистое, имьже въсприяхомъ въ Едеме бесъмьртную пищю, Христа славяще.

По прокимне глас 8, самогласен. Егоже древле Моиси, прообразивъ собою, Амалика, низъложивъ, победи,[825] и Давидъ певьць подножью твоему, въпья, кланятися повелевааше,[826] чьстьному кресту твоему, Христе Боже, дньсь грешьнии кланяемъся. Устьнами недостойнами, тя, извольшааго пригвоздитися на немь, и, въспоюще, молимъ ти ся: Господи, съ разбойникъмъ царьствию твоему съподоби насъ.[827]

Стих. Възносите Господа Бога нашего

. Глас пророка твоего Мосеа. Боже, испълнися, глаголющий: «Узьрите животъ нашь, висящь прямо очима вашима».[828] Дьньсь крьстъ въздвизаеться и миръ отъ льсти свободися. Дньсь Христово въскрьсение обнавляеться и коньци земля радуються, въ бубънехъ давыдьскы песнь ти приносяща и глаголюща: съделалъ еси спасение посреде земля,[829] Христе Боже, распятие и въскрьсение, имъже насъ спасе, благый Человеколюбьче, вьсесильне Господи, слава тебе.

Стихира. Възнесыйся на небеса. На «слава и на ныне», глас 6. Четвероконьчьный миръ дньсь освящаеться, четвероконьчьну възвышаему твоему крьсту, Христе Боже нашь. И рогъ верьнааго съвъзвышаеться кънязя нашего, на томь вражиемь съкрушенъмь рогъмь. Велий еси, Господи, и дивьнъ въ делехъ твоихъ, слава тобе.

Заутреня

На стих<овне>, глас 8. Възнесеся на крьстъ, Христе Боже, и спасе человечьскыи родъ. Славимъ страсти твоя.