Том 2 (XI-XII века, переводная литература)

Кто премудръ и хытръ[353] въ васъ, да явит от добра житиа дела своя въ кротость премудрости.[354] Аще ли зависть горку имате и рвениа въ сердцихь ваших, ни хвалитеся, ни лжите на истину. Несть си премудрость съвыше съходящи, нъ земна и душьна,[355] неприязнина.[356] Идеже бо зависть и рвение и вьсяка зла вещь, ту нестроение.[357]

О Божии премудрости

А вышняя премудрость первое убо пречиста, потом же мирна, благопокорьлива и исполнь милостыня и плодъ благыхъ[358]...

Толк. Златоуст. Ищистимъ скверну[359] от душевною ушию. Якоже бо паче скверна и калъ ушима плътьскыма, тако и житийскыя повести, яже лихвы ради и заимании долговъ, скьвръны всякыя горее заграждаеть разумный слухъ, паче же не загражает тъкмо, нъ и нечистъ творить.

48. Апостоль

...бе-сумнениа и без лицемерия.[360] Плод же праведенъ и въ мире сеется творящим миръ.[361]

Толк. Нерасужающе назираниемь брашенъ или различиемь о мачании зелий.[362] Известне же о сихь къ коласаемъ беседуеть Павелъ.[363]

Яко от уныниа и сластолюбиа реть и нестроение и вражда на Бога бываеть

49. Сущее

Откуду брани и откуду свари въ въсъ? Не отсюду ли, от сластий ваших, воюющихъ въ удехъ ваших? Желеете и не имате, убиваете и завидите, и не можете улучити,[364] сваритеся и боретеся, и не имате. Зане не просите.[365]

Толк. Являеть, яко аще и раширяють слово въ учении.[366] Всяко плотяни суще и злейшая творяще. Таковыя и Павелъ уничьжаеть, глаголя: «Аще бо, рече, въ вас зависть и ревность, не пльтяни ли есте?»[367]

50. Сущее

Просите и не възмете, занеже зле просите,[368] да въ сластехь вашихъ ижчивете, зане зле просите, и прелюбодейци и прелюбодеиця.[369]

Толк. Севирово. Такъ бе и фарисей, егоже Лука въ Еуангелии похуляет.[370] Ставь бо, рече, посреде церкве, велегласно просяше и моляшеся, и яко достоинь сый улучити, и своа дела почитая, глаголаше: «Пощуся двакратъ в суботу, и десятину даю всего, елико притяжахъ». Почитает же, яко несмь грабитель, и обидя, и любодей, и лихоимьство держай. И яко паче множайшая глаголаше, толма паче исхожаху от Божиа слуха, и глаголъ бремя тъще от устну исхожаше, и въ безумие истааху, яко паче ярящася волны.

Неции мнящеся просяще и не приимають: противне и зле просящих сластий ради суетных. Нъ речеть, кто разума Божиа и възвышениа добродетельмь просяще и не приимают. Известо же и о сих, яко не себе та благаа прияти просиша, нъ да хвалими будут ихь ради. Есть бо сластолюбцемь радоватися о похвалахъ, имже не дается имъ, понеже въ сласти расточити хотять, егоже просять.

51. Апостоль

Не весте ли, яко любы света сего вражда Богу есть? Иже бо аще изволить друг свету сему быти, врагъ Божий бываеть.[371]

Толк. Миръ убо глаголеть всякь по плъти животъ, матерь тлениа, еяже причяститися хотя, врагъ бываеть Богу.

Аригеново. Понеже убо злоба ходатай есть нам любви, яже къ миру, добродетель же происходатаить любовь яже къ Богу. Темже добродетель и злоба въкупе пожити не можета.

Притъчникъ.[372] Иже съгрешении ради любить миръ, врагъ является Богу. Якоже бо и къ Богу любы, благочьстиемь известуема, абие врагъ обретается миру. Темь и не мощно есть работати Богу и мамоне,[373] и любити Бога и мира. Ихже хощеть, пришедъ, Господь другы Богу сътворити? Ножь бо и разделение въверже на землю.[374] Ибо слово учениа его разделяет и разлучяет земная и плотьскаа, того ради строяй вражду имети къ миру и единьство къ Богу. Темь и миръ даеть, а не яко миръ повелевает. Онъ бо даеть миръ къ плотьскымъ любовь творя. Господь же, миръ даяй, другы Богу сътваряеть нас.

<Толк.> Аще убо не всяко лепо къ реченымъ есть, но убо изрядне пьщевах положити е от истолкованиа на ползу ищемое. Веща бо Господь нашь Исус Христос въ Еуаглиихь: «Аще рука твоа или нога твоа съблажняеть тя, отсеци ю и поверзи от себе. Добро бо ти есть внити въ Живот хрому, неже две руце и нозе имущу въвержену быти въ Огнь. Или десное око съблажьняеть тя»[375] и прочяя. О том бо Хрусостомосъ[376] веща: «Не о удехъ си речена быша, нъ о друзехъ, ихже въ чину удъ имамъ издрядне». Се бо и выше речеся, и ныне глаголеть: «Ничтоже бо пакостьнее сужити злыи лукавы». Темь съ великою яростию врежающая ны отсекати повелеваеть.

52. Сущее

Или мните, яко лъжу Книгы глаголють вы: «Завистию възлюбляете дух, иже вселився въ нас,[377] болшу же дасть благодать»? Темьже глаголеть Соломонъ...

Толк. Завистию диаволею смерть вниде въ миръ[378] и вселися въ ны, Христос же, по Писанию, в селися,[379] да завистию бывшую смерть прокленеть. Не тъкмо же се, нъ и болшу нам дасть благодать. «Азъ бо придох, — рече, — да животъ имуть и лише имуть».[380] Яко въсхотевъ Богъ нас, вселися въ ны. Исаиа яверекъ: «Не ходатай, ни аггелъ, нъ сам Господь спасе ны, понеже възлюби ны».[381] Како же спасъ ны, болшу дасть благодать? Раздрушивъ съветника на ны сатану, темъ и наведе. Рекь: «Богъ гордымъ противится». Не гордъ ли есть, въпия: «Вселеную всю обоиму яко яице»?[382]

53. Сущее