Том 2 (XI-XII века, переводная литература)

Толк. Златоуста. Аще бо въ Отца и Сына и Святаго Духа праве кто веруеть, житиа же права не имат, ничтоже ему приобретение вера на спасение. Велико бо вера и спасено, и бес тоя никакоже спастися. Нъ сама о себе не довлееть, нъ требуеть и жития права. Аще бо и земле наследовати не възмогоша, толико пострадавше въ пустыни, зане поропташа и съблудиша,[318] како же мы небеса улучити възможем, нестройне и въ лености поживше? Вера бо по крещении[319] мертва бысть, аще кто без делъ имать ю, и не известить ея праведными начинании. Заклад бо есть блага житиа крещение, ибо Господь нашь въ образъ наш крещься от Иоанна, на гору въсходить, и къ диаволу брань въсприимаеть, и всю его раздрушает силу.[320] Нам образь дая, да вемы, яко по божественей бани дела требе суть, и подвизи нас ожидают, еже къ противнику, делъ явлениа.

33. Сущее

Хощеши ли разумети, о человече тъще, яко вера без делъ мертва есть? Авраамь бо отець[321]

не от делъ ли оправдися,[322] възнесъ Исаака, сына своего, на жрътвникъ?[323]

Толк. Святаго Кирила.[324] Понеже блаженый Иаковь Авраама глаголеть от делъ оправьдавшася, възнесъша Исаака сына на жрътвьникь, Павель же глаголеть его от веры оправдана,[325] да не мнимь ею противящася себе. Преже бо имети ему Исаака, верова и мьзду верованиа въсприя — Исаака. Нъ обаче и егда възнесе Исаака на жертвьникь, не токмо дело творяше повеленое ему, нъ и веры не отступи, яко о Исааце хощеть семя его умножитися паче звездъ, помышляя, яко от мертвых въздвигнути можеть Богъ. Обаче Павелъ съведетеля своим словом и споспешника творить блаженаго Давида, мужа, живша въ благочьстии и мудре устраяет, яко Духомь глаголавша веры ради оставление,[326] и възвещаеть всем человекомь уже о Христе настоящее время.

34. Сущее

Видиши ли, яко вера поспешьствоваше деломь его и от делъ вера съвръшися, и събышася Книгы[327] глаголющая.

Толк. Кирил. Принеси словесную жрътву и сущиемь естьства законы извещай, и неотроченыя любве попери жало, и на земли ничтоже, токмо разве еже о Бозе любы.

35. Сущее

Верова же Авраамь Богови, и въменися ему въ правду, и другъ Божий наречеся.[328] Видите ли убо, яко от делъ оправдается человекь, а не от веры единоя токмо?

Толк. Кирил. Старость убо имат правду, иже верою чьстыи — всехъ Бога и Владыку.

36. Апостоль

Такоже и Равь блудная не от дель ли оправдися, приимши сходникы и инемь путемь изведши?[329] Якоже бо и тело без духа мертво есть, тако и вера без делъ мрътва есть.

Толк. Севирианово.[330] Слыши Писаниа, съведетельствующа ея оправданиа,[331] яже бе въ блуде: бисьръ въ кале светяся,[332]

злато в тимении поврьжено, цветъ благочестия въ трьнии подавляем, благочьстная душа, въ злочестиа стране затворена.

Яко дрьзы и бе-щинны языкь умрьщвяет имущаго и, егоже потреба дрьжати на похвалу и на славу Божию

37. Сущее

Не мнози учителе будете,[333] братие моа, ведуще, яко больи грехъ приимемъ.

Толк. Златоуст. Понеже учащему, а не творящому не токмо приобретениа несть, нъ и тъщету велику и судъ наносить. Въ таковемь нерасуждении жившу житие свое, без дела бо учящему, грех великь есть. Не съгрешаяй же въ деле и учении, и силенъ есть все тело обуздати, таковый да учить, и верою таковою да повелеваеть съ словомь правом, съ словомь светломь, съглашаяй вере, являя, яко все тело свое можеть въхластити, и ниединояже любве имети кь житийскым себе оставляеть.

38. Сущее

Много бо съгрешаем вси.

Толк. Севирово. Ибо много съгрешаемь вси. Идеже кто, веща, Христовь ученикь, требе есть намъ противу реченым делы благы преходити, могущиим на милость преклонити всехь судию и Бога, а не въ страстехь изьнемогше, яко человеци, затворени быти и не отчаятися своего спасениа.

39. Сущее

Аще кто словом не съгрешить, съ съвершенъ мужь, силенъ обуздати все тело.

Толк. Кирил. Ищедшу убо уму и смыслу свершеное показавшу бездельство, и ничтоже удрьжаниа имети о языце, и безатвора имети и къгда, нъ паче достоить въсприимати всегда достойное слову, глаголати же, всегда похвалы исполнь. Лепо же паче въ реченых мудрость, отречено бо есть святымь глаголати буесловие, рекше гнилословие,[334] якоже рече всемудрый Павелъ. Поминает же всегда святое Писание, глаголющее: «Слово ваше да есть въ благодати солию растворено».[335] Да и благодать дасться слышащимъ.[336] Приемлет же богодьхновенное Писание кроткаго въ словесех, похуляеть же языкъ невъздержьливъ. Рече бо: «Аще кто словомь не согрешить, сь съврьшенъ мужь, силенъ обуздати все тело». Глаголеть бо и Давидъ: «Положи, Господи, съхранилище устомъ моим, и двери ограждены оустнах моих».[337] И пакы рехъ: «Съхраню пути моа, не съгрешити ми языком моим». Добро убо есть хранилище, еже не съгрешающь языкь имети.[338]

40. Апостоль

Се бо и конемь узды въ уста вълагаем, да повинуются нам, и все тело ихъ обращаем. Се же и корабли толици суще, и от жестокь ветръ затачаеми, обращаются от мала кормила, аможе аще стремление правящему хощеть.