Том 2 (XI-XII века, переводная литература)

Толк. Аще и не всяко стройне лежить предлежащее писание, нъ убо самоя ради тоя ползы изряднее положихом. Господь бо нашь и Богъ Исус Христос предлежащая Моисеем реченаа въ съвръшение приведъ, веща: «Слышите, яко речеся древним: “Не убиеши. Аще ли кто убиеть, достоинъ есть суду”? Азъ же глаголю вам, яко: “Прогневаяй брата своего, повинень есть суду”.[310] Слышасте ли, яко речеся: “Не прелюбы сътвориши”. Азъ же глаголю вам, яко: “Вьсякь, възревый на жену, яко похотети еи, уже съблудилъ есть въ сердци своем”».[311] Си толкуя, Севиръ, Антиохискый епископъ, въ 46 слове рече: «Мосеем писаная Законоположениа “не убиеши” глаголеть. Христос же, иже Закону разумъ и еже в немь Духа податель, еже бо не разгневити брата своего повеле, сию паче исполняя закону волю. Гневъ бо, от негоже убойство бывает, помрачивъ е болшаго ради повеления. Гневь бо аще придеть къ убийству, не прогневатися попусти. Тако и къ похоти несытьства подвигъ възрениемь осудивь, рекъ: “Не любодействуеши”, исполни и яви. Духовный бо Законъ Господь исполни обновлениемь Духа, раздреши же Писаниа древнее, яко паче от стеньнаго писаниа на скрижалех въображены округъ».

28. Сущее

Тако глаголете, и тако творите, яко чяюще Закономъ свободы судъ прияти.

Толк. Есть бо о суде правемь поучение. Законь же свободы глаголеть Законъ правьды, тако судяща, якоже обретает. Се же рече, понеже неции съгрешають, милосердиа Божиа надеющеся и глаголюще: «Человеколюбець сый, простить». Темь и наводить рекый: «Немилостивь судъ не сътворшему милости».

29. Сущее

Судъ бо безь милости не сътворшему милости.

Толк. Тверде убо глаголы нас устрашаеть, да не вещьми поболимъ.

30. Сущее

Хвалится милость на суде.[312]

Толк. Златоуста о милостыни.[313] Милостыни ремествьница есть мудра и приставьница делающим ю, и дружка Божиа есть, и присно искьрь его престоить и о немже хощеть, удобь просить благодати. Токмо да не обидима есть нами. Обидима же есть, егда от въсхыщениа ю творимъ. А егда чиста есть, много имать дръзновение: и связьнемъ та решить узы, раздрушаеть тьму, угашаеть огнь, умрьщвяеть червь, изгонить зубомь скрежетъ. Сей съ многою радостию отверзаются небесная врата, цесарица бо въистинну есть, подобны человекы творящи Богу. Будете бо, веща, щедри, якоже и Отець вашь небесный. Крилата есть и легка, криле имущи злате, летание имущи преукрашающе аггелы. Тамо веща: «Криле голубине посребрене, и межурамье[314] ея въ бльщании злата». Якоже паче голубь златъ и живъ летающь, векома назирающи окомь кроткомь. Ничтоже ока того краше. Добра есть и пава, нъ не к сей нивъчтоже. Птица есть красна и чюдна, выспрь всегда зрить. Девица есть криле имуще злате, бело имущи лице тихо. Крилата есть и легка, у престола стоящи цесарска. Внегда судимся, внезапу предстоит, и является, и изимаеть нас от мучения своима крилома одевающи. Такоя жертвы хощеть Богъ.

Яко не от веры токмо, нъ от делъ, и не от единоя неправедно, нъ от обою купно оправдается человекъ

31. Сущее

Кая есть полза, братие моа, аще кто глаголеть веру имети, а делъ не имат? Еда можеть вера спасти и? Аще же брат или сестра нага будета дневнаго житиа,[315] речеть же има кто от васъ: «Идета съ миром, грейтася и насыщайтася», а не дасть има требования телеси...

Толк. Еже глаголеть, се есть. Аще не дела явить кто, яко веруеть Богови, избыточно и имя его, не бо въ просте глаголяй быти Господень, тъ есть веренъ. Нъ тако любяй Господа, яко веры ради иже въ нь и на смерть дерзнеть, и яко тако есть предлежащимъ съмотрение и притче являють. Авраамь бо, веща, дело показа, яко верова

Богови, възнесъ на всеплодство сына своего. Такоже и Раавь[316] веровавьши, не ради о смерти. Се же глаголеть, утвержая верныя, и уча истиною быти верномь, и не глаголаниемь токмо и языком Господа любити, нъ деломь и истиною. Темь и множайшими образы являеть, яко аще не делы извещьше веры, всуе токмо именемь льстятся, ничтоже боле имуще бесовъ, ибо и они вероваша, яко Сынъ Божий бе, и яко Святый Божий[317] бе, и яко власть имать надь ними. Виждь и иного духовнаго разума. Не бо рече: «Кая полза, аще кто веру имать?», но «Кая полза, аще глаголеть кто веру имети?» Нъ яснее глаголеть: «Покажи ми вещь, отнележе имя приялъ еси». Аще глаголеши ся имея неправе же, всуе и имя ти верно. По коей бо вещи имя ти наречено? Аще не дела съведетельствують, то ни имя ти места прииметь когда.

32. Сущее

...какая есть польза? Тако и вере, аще не имат делъ, мертва есть о себе. Нъ речеть кто: ты веру имаши, а азъ дела имамъ, покажи ми веру свою от делъ своих, и азъ покажю тебе от делъ моих веру свою. Ты веруеши, яко Богъ единъ есть, добре твориши. И беси верують и ищазають.