Том 9 (Конец XIV - первая половина XVI века, подъем общественного значения литературы)

В лето 5457 Августу, кесарю римъскому, грядущу въ Египетъ с своими ипаты, яже бе власть египетьская рода суща Потоломеева. И срете его Иродъ Антипатров,[472] творя ему велие послужение вои, и пищею, а дарми. Предаде же Богь Египетъ и Клеопатру в руце Августу. Августъ же начятъ дань подкладати на вселенней. Постави брата своего Патрикиа[473] царя Египту; Августалиа, другаго брата своего,

[474] постави Александрии властодержца; Ирода же Антипатрова асколонитянина за многия ради его почести постави царя надъ июдеи въ Иерусалиме; Асию же поручи Евлагерду,[475] сроднику своему; Алирика же, брата своего, постави в поверъшии Истра;[476]

и Пиона постави во Отоцех Златых, иже ныне наричются Угрове;[477] а Пруса,[478] сродника своего, в брезе Вислы реце во граде Марборок, и Турнъ, и Хвоини, и пресловый Гданескъ, и ины многи грады по реку, глаголемую Немонъ, впадшую в море. И житъ Прусъ многа времена летъ и до четвертаго роду; и оттоле и до сего времяни зоветься Прусьская земля.

И в то время некий воевода новгородьцкий именемъ Гостомыслъ[479] скончеваетъ свое житье и созва вся владелца Новагорода и рече имъ: «О мужие новгородьстии, советъ даю вамъ азъ, яко да пошлете в Прусьскую землю мужа мудры и призовите от тамо сущих родов к себе владелца». Они же шедше в Прусьскую землю и обретоша тамо некоего князя именемъ Рюрика,[480] суща от рода римъскаго Августа царя. И молиша князя Рюрика посланьницы от всехъ новгородцовъ, дабы шелъ к нимъ княжити. Князь же Рюрикъ прииде в Новъгород, имея с собою два брата: единому имя Труворъ, а второму Синеусъ, а третий племенникъ его именемъ Олегъ.[481]

И оттоле нареченъ бысть Великий Новградъ; и начя княз великий Рюрикъ первый княжити в немъ.

А великого князя Рюрика четвертое колено великий княз Володимеръ,[482] иже просветилъ Русьскую землю святымъ крещеньемъ в лето 6496. А от великого князя Владимира четвертое колено княз великий Владимир Всеволодич Манамах,[483] правнукъ. Егда седе в Киеве на великомъ княжении, советъ начятъ творити съ князми своими и съ боляры и велможи, тако рекъ: «Егда азъ малъ есмь преже мене царствовавшихъ и хоругви правящих скипетра великиа Русиа, якоже князь великий Олегъ ходил и взял съ Цариграда великую дань на вся воа своа и здравъ въсвояси возвратися; и потомъ Всеславъ Игоревич, княз великий, ходил и взял на Коньстянтине граде тяжьчайшую дань.[484] А мы есмя Божиею милостью настолницы своих прародителей и отца моего великого князя Всеволода Ярославичя[485] и наследницы тоя же чести от Бога. Ныне съвета ищу от васъ, моея полаты князей, и боляр, и воеводъ, и всего христолюбиваго воиньства; да превознесется имя святыа живоначалныа Троици вашея храбрости могутьством Божьею волею с нашимъ повелениемъ; и кий ми советъ противъ воздаете?» Отвещаста же великому князю Владимиру Всеволодичю его князи, и боляре, и воеводы: «Сердце царево в руце Божьи, и мы вси есмо в твоей воле». Княз же великий Владимир събирает воеводы благоискусны и благоразумны и поставляет чиноначалники над различными воиньствы — тысущники, сотники, пятдесятники над различными чинми боренья; и съвокупи многия тысяща воиньства, и отпусти их на Фракию, Цариграда области; и плениша я доволно и возвратишася съ многимъ богатеством.