Том 9 (Конец XIV - первая половина XVI века, подъем общественного значения литературы)

В лето 6859 князь великий Семион Семионович[498] седе на великомъ княжении володимерьскомъ и московском. В то же лето преставися Гедиман, князь великий литовъский Первый. И по немъ седе на великомъ княжении литовъскомъ сынъ его первый Наримантъ. И бысть ему брань съ иноплеменники, и впаде в руце их. В то время бывшу великому князю Ивану Даниловичю в Орде,[499] и окупил князь великий Нариманта у татар и отпустил его к Литве. Он же по своему обету, не дошед своея отчины, крестися, и нареченъ бысть въ святомъ крещении Глебъ. И того ради братья его не даша ему великого княжениа.

Но седе на великомъ княженьи брат его Олгердъ, а Наримантъ, брат его, отиде в Великий Новъградъ, Евнутъ же вселися, идеже ныне Вильна, а Скиригайло з братом своимъ с Кестутьемъ[500] вселишася при некоем озере за 20 поприщъ от Вилны. И въста Скиригайло на брата своего Кестутия и уби его.[501] Сынъ же Кестутевъ Витовтъ[502]

бежа в немцы и тамо собра себе друзи многи, и пришед оттуду, уби дядю своего Скиригайла и два сына его. И вселися на месте отца своего и дяде своего, и нарече имя месту тому Троки, и совокупися любовою з дядею своимъ съ Олгердомъ.[503] Той бо Олгердъ вина не пиаше и велик разум имяше, земля и княженьа притяжа к себе многи и удержа велию власть.

В лето 6858 князь великий Олгердъ литовский присла послы своя к великому князю Семиону Ивановичю на Москву со многими дарми, прося мира и живота братьи своей. Князь же великий Семионъ пожаловал Олгерда и братью его, Корияда и иных отпустил[504] к нему. И паки прислал Олгердъ к великому князю Семиону Ивановичю, прося за себя свести его дочери великого князя Александра Михайловича тверскаго. И князь великий Семион по благословению отца своего Феогнаста, митрополита всея Русии, вдастъ за него свесть свою великую княжну Иулиянию.

[505] И родишася от нея сыновъ седмь: первый Андрей Полътеский, 2. Володимер Бельский, 3. Иван Острожский, 4. Иаковъ, 5. Легбень Волыньский, 6. Василей Черторижьский, 7. Олерко Киевъский.

Посемъ время немало преиде, князь великий Олгердъ в недугь впаде и начят сыновомъ рядъ чинити: Иакова сына своего возлюби паче всех и даде ему великое княжение и град Вильну, а прочих сыновъ своих по уделомъ устроилъ. Благоверная же великая княгиня Иулианиа, виде своего мужа Олгерда последнее дышуща, и печаловашеся о спасении его, и созва сыны своа и отца своето духовнаго призва Давида, архимандрита печерьскаго. И увеща своего мужа Олгерда съветомъ благым и Божьимъ поспешениемъ, сподоби его святаго крещения. И нареченъ бысть въ святомъ крещеньи Александръ. И последи того великим чиномъ иноческим одеяся и святою схимою великимъ аггельскимъ образом украсився, и вместо Александра Алексий нареченъ бысть; и по малех днех преставися, и положиша тело его в церкви святыа Богородици в Вильне, юже самъ созда. По сем же супружница его, благоверная княгини Иульяния, немного время пожив, преставися, и в той же церкви погребоша тело ея.

Иаковъ же, сын Олгердовъ, впаде в латыньскую прелесть — Ягайло великий князь литовъский,[506]

и бысть советникъ и другъ безбожному Мамаю, егоже побил за Дономъ благоверный великий князь Димитрие Ивановичь. Витовтъ же Кестутьевичь совокупися любовью съ Ягайлом. И по семь Ягайло взят бысть в Краковъ, а на Вильне устави брата своего Витовта. Витовтъ же устроися на Вильне князь великий литовъский и нача съзидати грады многи, заруби Киевъ и Черниговъ, и взятъ Брянескъ и Смоленескъ, и приступиша к нему вси князи пограничныа, с вотчинами от Киева даже и до Фоминьского приложишася к Витовту.[507] Сия убо о сихъ известа суть.

ПЕРЕВОД

СКАЗАНИЕ О ВЕЛИКИХ КНЯЗЬЯХ ВЛАДИМИРСКИХ ВЕЛИКОЙ РУСИ