Том 9 (Конец XIV - первая половина XVI века, подъем общественного значения литературы)

Тогда бе въ Цариграде благочестивый царь Константинъ Манамах,[486] и в то время брань имея с персы и с латыною. И съставляетъ советъ мудре и царьски, отряжает послы к великому князю Владимиру Всеволодичю: Неофита митрополита ефесьскаго[487] и с нимъ два епископа, милитиньска и митилиньска, и стратига Антипа антиохийскаго, игемона иерусалимъскаго Еустафия, и иных своих благородных. От своея же выя снемлет животворящий крестъ от самого животворящаго древа, на немъже распятся владыка Христос. Снемлет же от своея главы венець царьский и поставляет его на блюде злате. Повелеваетъ же принести крабьицу сердоликову, из неяже Августия, царь римъский, веселяшеся, и ожерелье, иже на плещу своею ношаше, и чепь от злата аравьска исковану, и ины многи дары царьскиа. И предаде их митрополиту Неофиту сь епископы и своимъ благороднымъ посланникомъ, и посла их к великому князю Владимиру Вселодичю, моля его и глаголя: «Прийми от насъ, о боголюбивый благоверный княже, сиа честныа дарове, иже от начатка вечных летъ твоего родьства и поколенья царьский жребий, на славу и честь и на венчание твоего волнаго и самодержавнаго царствиа. И о немже начнут тя молити наши посланницы, что мы от твоего благородиа просим мира и любве, яко церкви Божьа безмятежна будет, и все православие в покои пребудет под сущею властью нашего царства и твоего волнаго самодержавъства великиа Русиа, яко да нарицаешися отселе боговенчаньный царь, венчанъ симъ царьскимъ венцемъ рукою святейшаго митрополита киръ Неофита съ епископы». И от того времени княз великий Владимир Всеволодичь наречеся Манамах, царь великиа Русия. И пребысть потомъ прочаа времена съ царемъ с Констянтином в смирении и любве. И оттоле и доныне темъ венцемъ венчаются царскимъ велиции князи володимерьстии, егоже прислал греческий царь Коньстянтинъ Манамах, егда ставятся на великое княжение русьское.

В царство же Констянтина Манамаха отлучися от Цариграда церкви, и от правыа веры отпаде римъский папа Формос[488] и уклонися в латыньство. Царь же Коньстянтинъ и святейший патриархъ киръ Иларие[489] повеле събратися собору в царствующий градъ — святейшии патриарси александръский, и антиохийский, иерусалимъский. И с ихъ советомъ благочестивый царь Коньстянтин Манамах съ святымъ вселеньскимъ соборомъ четырми патриархы, митрополиты и епископы, иереи извергоша папино имя ис поминаней церковных и отлучишя его от четырех патриархъ. И от православныа веры отпадша, и от того времене и доныне лытають, нарекошася латына. Мы же, православнии христиане, исповедаемъ Святую Троицу безначялнаго Отца съ единородным Сыномъ и с пресвятымъ единосущнымъ и животворящимъ Духом въ единомъ Божестве веруемъ, и славимъ, и покланяемся.

Родство великих князей литовъских

. В лето 6830 по пленении безбожнаго Батыа[490] избежал от плена его некий князец именемъ Витянецъ,[491] рода смоленьскихъ князей, и вселися в Жомоть

[492] у некоего бортника. И поятъ у него дщерь в жену себе и пребысть с нею летъ 30 бездетен. И убьенъ бысть громомъ. И последи князя Витенца поятъ жену его раб его конюшецъ именемъ Гигименикъ.[493] И роди от нея седмь сыновъ:[494]

1. Нароминтикъ, 2. Евнутикъ, 3. Олгердикъ, 4. Кестутик, 5. Скиригайликъ, 6. Кориядикъ, 7. Мантоникъ.

Лета 6825 князь Юрьи Данилович[495] московский и князь Михаилъ Ярославич[496] тверьский поидоша во Орду о великомъ княженьи володимерском в споре. И князь Михаил Ярославич Тверьский убьенъ бысть в Орде. Князь Юрьи Данилович прииде из Орды на великое княжение. И виде многи грады запустевшая и людей мало събирающася, печалию одержимъ бе. По убьении бо князя Михаила Черниговъскаго[497] разсыпашася измаилтяне по всей земли Русьской, яко птици полеташа. И христианьский род овехъ мечемъ закалающе, других же в пленъ отвожаху, а оставшая смерть и глад погубляше. Сия случишася намъ грех ради наших.

Великий же князь начат разсылати по градомъ и местомъ собрати оставшаа люди. Посла убо сего Гегименика на Волоскую землю и на Киевъскую и обь сю страну Меньска наполняти плененыа грады и веси, у воставших имати дани царьскиа. И с ним посла некоего мужа славна именемъ Бореика и ины множайшихъ. Сей же реченный Гегименикъ бе мужь храбръ зело и велика разума, начятъ брати дани на людех и съкровища изыскивати и обогатися зело. И собра к себе множество людей, дая имъ потребная нескудно, и начят владети многими землями. Назвася от них князь великий Гедиманъ литовъский Первый великих государей русьских князей несъгласьемъ и междуусобными браньми.