Великая княгиня Владимирская Мария. Загадка погребения в Княгинином монастыре

«Глава 10. О богородномъ терпении

великия княгини Марии Всеволожи и о

монастыриея

. Прежде сего за мало время боголюбивая великая княгини Мария, иже бысть благоплодная супружница сего [бого]хранимаго самодержьца Всеволода Димитрия Юрьевича, Щьварнова дьщи князя Чешьскаго, памяти дело достойно сотвори, подражающи нраву праведнаго Авраама: купи ценою часть земьли на строение церкви и монастыря въ славу Богу и Пречистеи Богородицы, идеже супружникъ ея, сий великий князь Всеволодъ церковь камену постави Успение Пречистыя Богородицы, идеже и доныне есть новий монастырь великихъ княгинь. Божиими же судьбами посещена бысть болезнию великою. Пребысть же въ той немощи лежащи седмь летъ и никогда же хульна словеси изглагола, но со благодарениемъ терпяше скорбь и нужу велию, поминающи терпение праведнаго Иева, и вольныя страсти Христовы за мирьский животъ и спасение. Со Иовомъ же глаголаше: „Аще благая прияхомъ отъ руки Господня, злаго ли мало не стерпимъ“. Прилагаше же и апостольское слово, яко „недостойны суть страсти нынешьняго времени противу будущей славе явитися въ насъ“. И тако доблественно пострада седьмочисленое то время летъ въ велицей бо болезни, въ ней же всегда благодарствуя Бога и сыны своя призывая къ себ и, наказуя ихъ, глаголаше: „Возлюбленная моя чада! Се азъ, яко видите мя, вельми болезнующа; по мале же отиду света сего маловременнаго ко отьцемъ своимъ. И вы убо, донъдеже пребудете въ суетнемъ семъ житии, первие же имейте веру и любовь къ Богу и Пречистей Его Богоматере, истинней Богородицы, и всею силою подщитеся страхъ Божий име въ себе. Святителемъ же и презвитеромъ и всему священническому чину не стыдитеся, ни гордитеся главы своея поклоняти, понеже служители суть самого Бога и Пречистыя Богородица и пастырие словесных овецъ. Почитая бо священники Божия, самого Бога почитаеть, а преобидяй священники Божия, самого Бога преобидить. Вся же иноки чьтите и потребными издоволяйте ихъ и никогда же ихъ оскорбите. Имейте же тихость и кротость и смиреномудрие и любовь и милость. Алчьныя насыщайте, жадныя напаяйте, нагия одевайте, больныя посещайте и себе въ чистоте соблюдайте. Милостыню всегда творите: та бо поставить васъ предъ Богомъ. Всякого человека не мините не привечавши. Сами же межю собою имейте нелицемерную любовь, и Богъ мира и любве будеть въ васъ и сохранить васъ отъ всякого зла и покорить враги ваша подъ нозе ваши. Аще ли же въ ненависти и въ распряхъ и въ которахъ будете межу собою, то сами погибнете и благословеное наследие державу отьчества вашего изгубите юже праотьцы ваши и отецъ вашь и протьчее сродство ваше многимъ трудомъ и потомъ приобретоша. Темъ же пребывайте мирно и любовно межю собою, брать брата своего послующе. Старейшаго же вашего брата Констянтина имейте, яко отьца и главу. Ты же, старейший сыне мой Костянтине, имей братию свою, яко сыновы и милуй ихъ, яко свой удъ. Слыши Иванна Евангелиста и Богослова глаголюша: «Аще кто рече: „Бога люблю“, а брата своего ненавидитъ – ложь есть». И того ради пребывайте въ любви, понеже любовь есть Богъ и пребываяй въ любви во Бозе пребываеть и Богъ в нем пребываетъ“. Старейший же сынъ ея Костянтинъ сладостне насыщаяся отъ устъ ея учение, яко губа воды напаяема внимаше и на сердцы своемъ полагая вся словеса ея, ибо отъ корени благаго благий возрасте плодъ. Его же во благоверии наказа и научи заповедемъ Божиимъ, яко исполнь ему сущу теломъ мужескяго возраста, паче же духовныя мудрости. Прилуче же ся ему тогда ити въ Новъгородъ Великий гсподьствовати и отъ отьца своего послану сущу, и пришедъ къ матери своей, въ велицей болезни лежащи ей, и приятъ благословение отъ нея и иде в Новъградъ. Мати же его уразуме иже къ Богу свое отшествие, и пострижеся во иноческий чинъ, и претворено бысть имя ей Марфа, и пребысть въ монастыри своемъ 18 дний и съ миромъ преставися къ Богу въ лето 6713 месяца марта 19 день, и положена бысть въ церкви Пречистыя Богородицы и Честнаго Ея Успения въ честней Ея обители, юже сама создала, въ приделе Благовещения на правой стране. У нея же последи положена бысть и вторая супружьница Всеволожа, дьщи Витепьского князя. Сущу же въ Новеграде Констянтину, и увиде, яко мати его Мария преставися во иноческомъ чину. Онъ же возрыдавъ плакася вельми и глаголаше: „Увый мне! Какова богатесьства лишихся, яко своима рукама не опрятахъ святое тело матери моея и гробу не предахъ“. И много о семъ плакашеся, понеже любимъ бысть отъ нея. Въ монастыри же ея въ приделе Христова Рожества отъ юга на правой стране положени быша великия княгини Александра да великая княжьна Евдокия, а на левой стране великая княгини Василиса, а в приделе Благовещения отъ севера на правой стране великая княгини инока Марфа Щьваровна, да великая княгини Анна, а на левой стране мученикъ Авраамий».