Битва на Калке. 1223 г.

[Стб. 49] «В лѣто 6732. […] И того же лѣта пріидоша Татарове на землю Половецкую и на вежи ихъ. Акотянъ, князь Половецкый, бѣ тѣсть Мьстиславу, князю Черниговьскому, и посла Акотянъ къ зятю своему Мьстиславу с поклономъ и съ многыми дарми: злато, кони, паволокы, а ркя тако, „шли дары по Рускымъ княземъ: днесь [Стб. 50] насъ не будетъ, а утро васъ“. И совокупишася Рускыи князи съ многою силою, и се слышавше Татарове прислаша 10 мужь с поклономъ: „мы вас не заимаемъ, ни вашихъ градовъ Рускыхъ, но идемъ на своихъ конюховъ, на Половци“. И не послуша ихъ Рускыи князи, а ту 10 мужь побиша, и поидоша Русь противу съ силою своею, 17 дній. И се увѣдавше Татарове, прислаша къ княземъ Рускымъ: „мы на васъ не посягли ничимъ, а вы на насъ идете, ти судитъ Богъ межи нами и вами“. И поидоша татарове противу имъ, и снемшимся полкомъ обоимъ, и бысть побоище велико зѣло на рецѣ Калкѣ. И побіени быша Половци отъ Татаръ, а потомъ Руси 11 князей паде, и множество людій бещислено, оныхъ избыша, а инія изымаша. Сіе зло бысть Іюня 16».

Список конца 60-х — начала 70-х гг. XV в.

Полное собрание русских летописей. Т. IV. Ч. 1. Новгородская четвертая летопись. М., 2000. С. 202–203

«В лѣто 6732. [С. 202] Приидоша Тотари на землю Половечкоую и на вежи ихъ. Котянъ, князь Половецкіи, бѣ тесть Мьстіславу, князю Черніговьскому, и посла Котянъ к зятю своемоу с поклономъ дары многы, злато и коні, паво[ло]кы, а глаголюще тако: „шли дары по Рускымъ княземъ; днесь насъ не боудеть, а вас заутра“. И съво[ку]пішася князи Рустіи съ силою многою, и, се слышавше, Тотари прислаша 10 моужи с поклономъ: „мы васъ не заимаимъ, ні градовъ вашихъ Роустихъ, но идемъ на свои конюсѣ, на Половци“. И не послушася ихъ Роустіи князи, а тую 10 моужъ побиша, а идоша Русь противоу 17 дніи, и, се оуви дѣвше, Тотари прислаша къ княземь Рускимъ: „мы на васъ не посягли ні чѣмъ, а вы на насъ идете; то судить Богъ межь вами и нами“. И снемъшимся полкомъ обоимъ, и бысть на Калкахъ брань веліка; и побѣдиша поганіи Тотари Половець и князеи [С. 203] Роускыхъ, и Роускаа сіла падѣ. Тогда оубиенъ отъ Татарь надъ рѣкою над Калкомъ великии князь Киевьскіи Мьстиславъ Романовичь, княживъ лѣтъ 10, а иныхъ князеи 10; оубиша Александра Поповича, а с нимъ богатырь 70, и людеи множество, не бѣ числа, а иныхъ князеи руками яша. То первое выхожденіе Тотарьское на Русь; се же зло здѣяше іюня 16».

Список последней четверти XV в.

Полное собрание русских летописей. Т. XLII. Новгородская Карамзинская летопись. СПб., 2002.

С. 111

«В лѣто 6732. […] Калоч[ское] побо[ище]. Приидошя тотарове на землю Половецкую и на вежи их. А Котян, князь Половецкыи, бѣ тесть Мстиславу, князю Черниговскому, и посла Котянь к зятю своему с поклоном дары многы: злато, кони, паволокы, а ркя тако: „Шли дары по рускымъ князем, днесь нас не будет, а вас заутра“. И съвокупишяся князи руские съ силою многою, и се слышав татари, прислашя 10 муж с поклоном: „Мы вас не заимаем, ни градовъ ваших рускых, но идем на свои конюси на половци“. И не послушаше их руские князи, а тѣх 10 муж побиша. И идошя Русь противу 17 днии. И се увѣдѣвше, тотари прислаша княземь рускым: „Мы на вас не посягли ничим, а вы на нас идете, то судить Богъ межи вами и нами“. И снесшимься плъкомъ обоимъ, и бысть на Калках велика брань, и побѣдиша погании тотари половець и князеи рускых, и рускаа сила паде. Тогда убиен бысть от татаръ над рѣкою над Калкомъ князь великыи Киевскыи Мстислав Романович, княжив лѣт 10, а иных князеи 10 избиша, и Олександра Поповича, а с ним богатырь 70, а люди не бѣ числа, а иных князеи руками яшя. То первое выхожение тотарское на Русь, се же зло сдѣася июня 16».

Список конца XV — начала XVI в.

Полное собрание русских летописей. Т. XLIII.

Новгородская летопись по списку П.П. Дубровского.

М., 2004. С. 85