Том 1 (XI-XII века)

В лето 6616. Заложена бысть церкви святаго Михаила Золотоверхая Святополкомъ княземъ месяца июля въ 11. И тряпезницю кончаша Печерьскаго манастыря при Фектисте игумене, юже заложи повеленьемь Глебовомъ,[761] иже ю и стяжа. В се же лето вода бысть велика во Днепре, и въ Десне, и въ Припете. Того же лета вложи Богъ въ сердце

архимандриту, игумену печерьскому, нача понужати Феоктистъ Святополка князя вписати

Федосья в синаникъ,[762] Богу тако изволшю. Святополкъ же радъ бысть,

обещася створити се, и се веды житье его. И нача Святополкъ узвещати житье Федосьево и веле ̀и вписати в сенаникъ, еже створи митрополитъ — вписа его в сенаникъ. Повеле же митрополитъ по всемъ епискупьямъ вписати Федосья в сенаникъ. Вси же епископи с радостью вписаша, и поминають его во всехъ сборехъ. В се же лето преставися Ерина,[763]

Всеволожа дщерь, месяца июля в 24. В се же лето кончаша верхъ святыя Борогодица Влахерны на Клове, заложеней Стефаномъ епископомъ, бывшу ему преже игуменомъ Печерьскаго манастыря.

В лето 6617. Приставися Евъпраксии, Всеволожа дщи, месяца июля въ 9 день, и положено бысть тело ея в Печерьскомъ манастыри у дверий, яже къ угу, и вчиниша над нею божницю, идеже лежить тело ея. В то же лето, месяца декабря въ 2 день, Дмитръ Иворовичь взя вежи половецькие у Дона, 1000 вежь взя, послани Володимеромъ княземъ.