Том 1 (XI-XII века)

В лето 6612. Ведена дщи Володарева за цесаревичь за Олексиничь Цесарюграду,[749] месяца июля въ 20. В том же лете ведена Передъслава, дщи Святополча, во Угры за королевча,[750] месяца августа въ 21. Того лета прииде митрополитъ Никифоръ в Русь месяца декабря въ 6 день. Того же месяца преставися Вячьславъ Ярополчичь въ 13 день. Того же месяца въ 18 Никифоръ митрополитъ посаженъ на столе. Сего же лета исходяща, посла Святополкъ Путяту на Менескъ, а Володимеръ посла сына своего Ярополка, а Олегъ самъ иде на Глеба, поемъше Давыда Всеславича,[751] и не въспеша ничтоже и възратишася опять. И родися у Святополка сынъ, и нарекоша имя ему Брячиславъ, В се же лето бысть знаменье: стояше солнце въ крузе, а посреде круга хрестъ, а посреде креста солнце, а вне круга обаполы 2 солнци, надъ солнцемь же кроме круга дуга, рогома на северъ. Тако же знаменье в луне темь же образомъ месяца февраля въ 4 и 5 и 6 день, въ дне по три дни, а в ночи и в луне по три ночи.

В лето 6613. Увалися верхъ святаго Андрея.[752] В се же лето постави митрополитъ Анфилохыя епископа Володимерю августа въ 27. Томъ же лете постави Лазоря Переяславлю месяца ноября 12. Томъ же лете постави Мину Полотьске месяца декабря въ 13 день. Томъ же лете явися звезда с хвостомъ на западе и стоя месяць. Того же лета пришедъ Бонякъ зиме на Зарубе

на торкы и береньдее.

В лето 6614. Повоева половци около Заречьска, и посла по нихъ Святополкъ Яня и Иванка Захарьича и Козарина,[753] и въгонивьше половце до Дуная, полон отяша <...>. В се же лето преставися Янь, старець добрый, живъ летъ 90, въ старосте мастите, живъ по закону Божию, не хужий первыхъ праведникъ. У него же азъ слышахъ многа словеса, яже вписахъ в летописиць. Бе бо мужь благъ, и кротокъ, и смеренъ, отгребаяся от всякоя вещи, егоже и гробъ есть въ Печерьскомь монастыре, у притворе, идеже лежить тело его, положено месяца июня въ 24. В то же лето пострижеся Еупракси, Всеволожа дщи,[754] месяца декабря въ 6 день. Того же лета помраченье бысть въ солнци августа. Тогда пострижеся князь Святоша, сынъ Давыдовъ, внук, Святославль, Никола, месяца февраля въ 17. В том же лете

победиша зимегола Всеславича и всю братию и дружину, убиша их 9 тысяч.

В лето 6615, кругъ луны 4, а солнечнаго — 8 лето. В се же время преставися Володимеря княгини[755] месяца маия въ 7 день. Того же месяца воева Бонякъ и зая коне у Переяславле. Томъ же лете прииде Бонякъ, и Шарукань старый и ини князи мнози, и сташа около Лубна. Святополкъ же, и Володимеръ, и Олегь, Святославъ, Мьстиславъ, Вячьславь,[756] Ярополкъ идоша на половце къ Лубьну,[757] въ 6 часъ дне бродишася чересъ Сулу и кликоша на не. Половци же вжасошася, от страха не възмогоша и стяга поставити, но побегоша, хватаючи коний, а друзии пеши побегоша.

Наши же начаша сещи я, а другыа руками имати, и гнаша я до Хорола. Убиша же Тааза, Бонякова брата, и Сугра яша и братию его, а Шарукань одва утече.[758] Отбегоша же товара своего, и взяша рускии вои месяца августа въ 12 день, а възвратишася въсвоаси. с победою великою. Святополкъ же прииде завътреню в Печерьскый манастырь на Успенье святыя Богородица, и братья целоваша и радостью великою, яко врази наши побежены быша молитвами святыя Богородица и великаго Федосья, отца нашего. И тако бо обычай имяше Святополкъ: коли идяше на войну, или инамо, оли поклонився у гроба Федосьева и молитву вземъ у игумена, сущаго ту, то же идяше на путь свой. В то же лето преставися княгини, Святополча мати месяца генваря въ 4 день. Томъ же лете, того же месяца, иде Володимеръ, и Давыдъ, и Олегъ къ Аяпе и другому Аепе и створиша миръ. И поя Володимеръ за Георгия

[759] Аепину дщерь, Асену внуку, а Олегъ поя за сына[760] Аепину дщерь, Гиргеневу внуку, месяца генваря во вторый на 10 день. А февраля 5 трясеся земля пред зорями в нощи.