Том 12 (XVI век, литература «обобщающих предприятий»)

Глава 1. Всяко дело благо начинается и совершается о имени трисвятыя, единосущныя, вседержителныя и неразделимыя Троицы, Отца и Сына и Святаго Духа, иже есть Богъ нашь, о немже живем, и движемся, и есмы. Егоже благоволением и сия повесть хощет предложитися яже о блаженнем и приснопамятнем и всея Руския земли самодержцы, о великом князе Владимире Светославичи, иже всю землю превеликия своея державы просвети святым крещением. О немже преже сего обретаеми суть многия повести,

[869] глаголемы и пишемы, и похвалами доволно украшены, — но обаче не в едином месте, но на многи части, особь каяждо: ова в летописаниих, иная же инде, прочая же вкратце писана в житии его, многая же в похвалах его. И от всех сих яко от многоразличных цветецъ хотящу собратися во едину словесную пленицу благословением и повелением господина пресвященнаго Макария, митрополита всеа Русии, в царство боговенчаннаго царя и великаго князя Ивана Васильевича, государя и самодержца всеа Русии, иже бысть от семени сего блаженнаго Владимира седмыйнадесят степень, от Рюрика же двадесятый степень.

Егда же повеленно есть нам сия снискати, и тогда зазрех своему недостоинству, совестию обличаем от безмерных моих согрешений, паче же не имый учения нраву и обычаю и удобну слову, еже касатися сему великому делу. Но обаче убояхся лениваго раба осуждения[870]

и смерти от преслушания — и не собою уповающи, но ради богоподражателнаго послушания повеленное нам без рассуждения писати дерзнухом, уповающе на молитвы сего Божия избраннаго сосуда, святаго и равноапостольнаго царя и великаго князя Владимира, нареченнаго во святом крещении Василия, яко да испросит у Бога ослабу многим моим согрешением, и тако надежду имуще неотъемлемую благодать человеколюбия Божия, поминающе реченное богоотца Давыда:[871] «Правду твою, и милость, и истинну не скрых в сердцы моем от сонма многа».

[872] Такоже и церковный учитель и светило всего мира Павел апостолъ к Тимофею писаше, глаголя: «Еже слыша от мене многими послухи, сия предай верным человеком».[873]

И блаженный апостолъ Лука, начиная святое Евангелие писати, к Феофилу глаголя: «Понеже мнози начаша чинити повесть о известованных в нас вещех, якоже предаша нам иже исперва самовидцы и слуги бывши Словеси, изволися и мне последовавшу выше всех испытно по ряду писати».[874] Последи же той же Лука к тому же Феофилу писаше Деяния Апостолская; потомъ же и инии мнози просвещением Святаго Духа писаша многих святых Жития и Мучения. Тако и сего блаженнаго Владимира достойно и в лепоту яже о немъ многоразличная истинная поведания во едину повесть снискати во славу Христу Богу, творящему дивная и преславная, и еликоже слово разума подасть нашему недоумению, той сам Господь Богъ нашь, о немже сие начинающе поведание, молим и спрызываем всех празднолюбныхъ собори, от всех требующе благоприятны молитвы на торжество предложения Слову.

Приидете, отцы, возвестите нам и научите ны, и еже ко Христу предстателствомъ вашим помозите нам! Приидете, братия, и спотрудитеся, и совет благъ к разумению предложите нам, и недостаточная наполняйте, слова венецъ на ползу слышащим украшающе! Приидете, чада, и со вниманием послушайте и страху Господню научитеся! Приидете, вси единоземнии нам, и благоверием преспевающе сликоствуйте настоящему торжеству сего преславнаго в самодержцех великаго князя Владимира, общаго нашего отца и учителя, имже истиннаго Бога познахомъ и святым крещением просветихомся! Приидете, вси окрестнии страны, и разумевайте дела Божия и, покаряющеся, просветитеся, ревнующе благому произволению дивнаго сего самодержателя Владимира!

Почто же наречеся Владимиръ? Владыческое бо имя преименито есть всякому имяни, понеже единъ Богъ — владый миром, видимымъ и невидимымъ, и всею тварию. Дивно имя Владимиръ, Божияго звания тезоименитое наречение! Таковым дивным именованием преже сего Владимира не получи никтоже именоватися. Сей же самодержавный не туне Владимир именовася, иже никимже отъ человекъ не обладан бысть, но сам владый над всею Русиею и многимъ странам одолевая. И тако самовластно, душелюбителным изволением, наипаче же Святаго Духа осиянием, идолскую прелесть до конца возненавиде, истиннаго Бога, Творца веком и твари всея содетеля и господа, многожелателно взыска и люботрудно обрете, его же благодатию весь обогатися, и владычественымъ и царьственымъ именованиемъ преславно прославися.